Nhiara 92 - Alkitab bahasa Luang

Nhiar mak ha ra'uli-rawedi Uplerlawna

¹ Hadi de nhiar ya'uli-yawedi maka ha rwahniara la Sabat lerni:

² Plola! Lol talanni pa mpahniara pa ma'uli-mawedia O'a Matroma. O' di de, Makdenreri O'a, Uplerlawna-Mempulwatnu Makdella Tutullu-Lolo'oni!

³ Hota lol talanni pa amakot nohora O tniulanmu-sniayanmu mak kodi liarni, la' yawyawar ralamni, me la' melmel ralamni ampahaur nohora la' emkameni la hya'-hya' honona maka Omukottaru re Omhi' nan momuoga.

⁴ La'pa amakot nohora O kalwiedmu-paitiotmu de, amala hitara-fiola tiwla-prai ma mamuki-mahepur nohoru.

⁵ Yoma tulanmu-kniarmu ed maka khi' a pua umuki-uhepru. Awuahniara yoma uhepur nohora hihi'mu-yapyapmu re.

⁶ Matroma, O'a de Makdenreri O'a! La'a hya' maka ha Mhi' nana re, ramehi-rayona e! Wniarormu-wnialaimu, rimormiori ta'enniana rwaror nana re.

⁷ Hota la riy mak kpodku, de raplin niohora, me la'pa riy mak kaplinu-kaplo'a de hota raplin niohora loini-talanni.

⁸ Raplin niohora de, la' emkameni ho'mana riy yatyata re emeknekama wewnihi maka kpoti-kadwu pa yeher to'a pa rler la pripanni-fa'anni, de hota rwaldioin la de rler la wnieyata-wnianiawu matmiati-molmuolu.

⁹ Mere O'a de Orgahi-Orha'a mak kodi plolli pa nodi liarni. O' de Makdenreri O'a.

¹⁰ Amatga Matroma hota O arwalmu re rakniuhi-rahnio'or la genni. Riy yatyata re hota knunu-knera.

¹¹ Omhi' a' die a ru'ru-la'yu emeknekama orpau puora, me Omhuri wu'ru la a o'tu pa Mtiera-mdiem a lia pripna-fa'ana.

¹² Alina-muat memna a' arwa'lu, mak khi'inde kaprir pia kmer-kmer temn a'u re rawlar diodioinia genni-tienni yoma Uplerlawna Nal ir la yawa.

¹³ La'pa he' ed maka kden la ploini-ple'erni de hota emeknekama korma maka ka'uhwu plele'era, ne mormiorni emeknekama agari on lalawan mak kden la Libanon.

¹⁴ Tamkek la de emekwalima ora-au mak ha rtamin la roma krei onni pa npoti-nkaduw la Uplerlawna romni herni-gaini.

¹⁵ Hota ir emolmolan nekama orwo'a-awuo' mak kawo'ol la'a tuwnu mahnek oleka la' annia ululu memna, mere e npoti-nkaduw nohor ma'ta uhwanu-tawnu pa nodi liarni.

¹⁶ Hota riwra: “Itmatromlawanni de Makdenreri E'a, Nden nek la plol wawannu. Edon Nhi' hya' mak edon kaplola. Ne E' ed maka kruwun reri-ka'ahla reri a'u”.