Nhiara 91 - Alkitab bahasa Luang

Rden la Uplerlawna limni ralamni

¹ Orgahi-Orha'a Uplerlawna-Mempulwatnu ed Mak Kodi Plolli-Ktaryatu. E' ed Makden la Tutullu-Lolo'oni! Hota Nruwun rer lia-na'ahla rer lia la he-he' to' mak kayaheu lia E nayanni.

² Hota ukot la Itmatromlawanni Makdenrer die, giwra: “O' de emeknekama wo'or watu niutni mak ka'ara yaro'wa genni (benteng) mak nhi'inde a'uyade'ela. O' de Uplerlawnu maka agha'ar reri a mormio'ru la' O'a.”

³ Plola hota Itmatromlawanni Nwe'er doinia o la'a yatni-halli mak kayade'a la o'a me la'a nnieni-nhien maka kodia matmiati-molmuolu.

⁴ Hota E ed maka kala liwarni kakteran reria o'a totpena hadoma edonna narie'yu. Natiak reri o' pa emeknekama mak kodia tera-wehla katiak re'ru yoma plola pa Uplerlawna Nhi' nana hya' ed maka Enakottarg olekwa (setia).

⁵ La hade pede la' melmel mana yan mumta'ata hegana-kawnu yatni-rha'ani onde rimormiori yatyatni-halalli. Yan mumta'ata yahni' pa plin-plinnianama riy rhapar tiklia o la leler gahani yoma rhokru pa rra'pa.

⁶ La' melmela yan mumta'ata yanhi'pa mlier la nnieni-nhien lawna me yan mumta'ata wnieyata-wnianiawua maka ha rlernana la lera nwawuau ro'onni.

⁷ La'pa riy riwnu ida rwaran doinia aranni la'a o walmu malwiru, me la'pa mkillia walmu malganan de, riy riwnu termida kdieulu-kliatna la genni, mere hota la' omuemeha de hadomdom edonna nheik na'nu.

⁸ La'pa omkillia walmu-walmu de mumkek nana riy yatyata-halal re rho'wa reria namni petanni yoma Uplerlawna Nwahla nana ir yatni-halli.

⁹ Yoma mhua'ar aranmu la Itmatromlawanni Makdenrer die, Uplerlawna Makden la Tutullu-Lolo'oni de totpa hota E' ed maka kruwun reri-ka'ahla reria o'a,

¹⁰ hota o' edonna mlier la mehra-mau liawna me la'a o rommu-lepmu mana hadom edonna ntaiya.

¹¹ Hota Uplerlawna Nhopna hopopanni ratiak reri o'a la meni-meni to'a.

¹² Uplerlawna hopopanni re rkim o'a totpena yana mtiuini me watgau mana hota edonna rtai lia o'a.

¹³ Hota mpuahapra niy o'tani me mliereti-mlierlahwa ohpora-ahdiawra mere ta'enniana rhi' wano'a-warar o'a.

¹⁴ Itmatromlawanni Niwra: “La'pa he' ed maka ralamni nden rer lia mai A'u, de Ulewna de. He' ed maka kwayow nan A'u, de Ariuwun reria.

¹⁵ La'pa enpolg A'u de hota Awuahla. Nler la kropanni de pleta-plet pa Atiulan la. Hota e' ed mak Ulewna me Aghi' totpa riy rhu'ru-rhelma me rwetweta la nanni.

¹⁶ Hota Aghi' e' ralamni pa nahepru yoma A'g ed mak kamori-kalewn e'a me Agala pa nmor niana tuwnu me lawan nana liawanni.”