Nhiara 90 - Alkitab bahasa Luang

Uplerlawna ed maka kruwun reri-ka'ahla reria rimormior nohkerna wawannu

¹ Musa, maka khima-kre'a Uplerlawna de, sniumbaini. De Musa nsumbain pa niwra: Matroma! O' ed maka kruwun reri-ka'ahla reri ami la tuwu pa nerun la' tuwu pa la' tuwu.

² La'pa O' edon Muohi-mua'ar ma'ta wo'ora-kawru uhu-dari nor wutga nohkerna-rai miaran di, O' de Uplerlawna-Mempulwatnu makden pa nodi liarni. Rwe'tu la Ga'ara mak edon kayawuhi, me Tap miaka edonna kmara.

³ Mere Matroma! Omhuopna rimormiori rawal lia eni-tani. Dewade rwal lia enliu'wu-tanmiakmu pa nden owa'an la genni.

⁴ La'pa anni riwnu ida, de Omuiwra emeknekama lera id hade yoma la' O yamkekmu de anni riwnu ida de emeknekama ler wonyira onde jam ida-woru mak plet pa rlardoinla mela ida.

⁵ Omkiuh dioinia-mhuo'or doinia am pia emeknekama am die mi'a id mak edon nalo'on wali ne nhorwua. Rimormior am die emeknekama wewan mak kmori.

⁶ La' yawyawar de na'uhwu mere la'pa ler nheri dewade napliau lia genni.

⁷ Amamta'at pa mdiwdiwra yoma O yawenanmu de. La' hankeranmu de ed maka ku'uta mkoha-mnanni am lia a gen mamni.

⁸ Omkienia a do'a-hal mamni la O' gaimu, nhi'nande a do'a-hal mamni maka yade'a re mana Omumkek eti-lahwa.

⁹ La a mormior miamni de hoho'a yoma la'a hankeranmu. A mormior-dardiar mamni de plet pa nhorwua emeknekama aran no'a a irun mamni mak kwarangota.

¹⁰ Ammormior niana anni terampwo'itu, la'pa amaruri, de amlernana anni terampwo'awa. Mere anni-anni maka amler la ga'a ho'mana eneknek to'ama yawuhi-yawe'eta, kropna-krieutu maka amlernana la'a a mormior miamni la lera ho'ke'eni, noma ammat mieman wa.

¹¹ He' ed mak kat niohora O yawenanmu de rurni-laini?! La'pa ramkek memna hankeranmu-ralmha'armu de riy ramta'at wenna.

¹² Matroma! Mhi' am pia amat niohor la a inon mamni de a mormior miamni edon naplahwa, totpena amat niohora hya' ed mak kaplola pa a mhi' nana me amlernohor reria talan mak kaplola la' ler maka amden ma'ta la nohkerna wawannu di.

¹³ Matrome! Hota O yawenanmu de edon nhor lia tuwu? Matroma, Muwal pia ma Mtiulla-msyaini rimormiormu ri owa'ana. O' de Makdenreri O'a.

¹⁴ Mtiutga owa'ana ralam kalwiedmu pa Mtiulla-msiayni am lia'a yawyawar ralamni totpena mahepur nande mpatunu-mpahniar reri la' a mormior miamni di plahwani.

¹⁵ Mual am pia mlernana yahe'i-yahepur la a mormiori-dardiari mamni di pa nherun doinia lera-lera kropna-krieutu maka amlernana la'a anni-anin maka mto'or la re.

¹⁶ Mtiutga hihi'imu-yapyapmu mak kamehi-kayona la'a O rimormiormu ami me plolmu-mnehemu rurmu-laimu la'a a durit mamni-wait mamni.

¹⁷ Matroma! Uplerlawna-Mempulwatnu mak amkola tieru-mkawur nehla. Mtiutga ralam kalwiedmu mai am pia Mtiera-mdiem ami, totpena a tulan mamni-kniar mamni plola pa rla' ga'a.