Nhiara 9 - Alkitab bahasa Luang

Ra'uli-rawedi Orgahi-Orha'a yoma Nawerta-natailia rira do'oni-halli la plola wawannu

¹ Hadi de Daud nhiara ya'ulli-yawedni maka ha rala la mak khi' o'tani la mak kwatunu-kwahniara. Rwatunu-rwahniara rlernohora Mut Laben nhiarni:

² Agodia a ralmu tetema pa a'u'uli-uwedi O'a Matroma me ukot nohora tulanmu-kniarmu hihi'imu-yapyapmu mak karehi-kalawna.

³ Agiwra uhe'i-uhepru nohora O'a. A'u'uli-uwedi reri O'a, yoma O' di de Uplerlawna-Mempulwatnu Makdella Tutullu-Lolo'oni!

⁴ Arwa'lu rwaldioini pa rawlari yoma ra'eramna'nu, Matroma. Rawlar die honona dudunti-wetwetria pa pala tuinia lol etnu-liolli, me pala matia.

⁵ Yoma la' O lodanmu-hairmu de Muetlia rira plolli-halli la' plol wawannu pede la'pa Muodnian a lia'a li'ru-tu'nu wawannu.

⁶ Orgahamu maka kukmua lodna-hairi mak kaplin niohor O'a, me Mpunu-mpuenna riy yatyata-halala pede hota riy rhoratdoin memn oleka ira.

⁷ A arwa'lu ror wut nieka letlawanni honona re de Mpueyata-mpuaniaw momuoga re, pa la riy id mana hota rhoratdoin oleka tuini-wedni wa.

⁸ Itmatromlawanni Makdenrer die, ed maka kodi plolli pa nodi liarni. Nariria liwan genni-mtatan genni totpa hota Nhudi-npara rimormiori nohkeran di wawannu honona.

⁹ Dewade Nawerta-nataili riy honona la noheri woru-lyanti nayanni Nodi rhi'ina-rella. Yoma la' he-he' makdella hairi-hairi, de E Netlia ir plolli-halli re la' plol wawannu.

¹⁰ La' Itmatromlawanni Makdenrer die, nanpena ed maka kruwun reri-ka'ahla reria maka ha radunti-rawetria maka kpolu-kwak rer lia E'a.

¹¹ Matroma! Riy mak katg oleka O' nanpena rha'ara mormiorni la O'a. Yoma O' edonna Mhortaplinga riy mak kola tieru-kawur nehla la O'a.

¹² Ya'uli-yawedi rer lia' Itmatromlawanni makodi plolli la' Sion. Mikot nohora E hihi'ini-yapyapni la'a luwu-a'na lodna-hairi mak kden la noheri woru-lyanti nayanni di.

¹³ Yoma nhioratni nden rer lia' rimormiori mak kterna mak kpolpuolu-khawaun nohora koko'oni-hererni. Pede riy mak kwunu-kwenna re, Nwahla memna ir hihi'ini-yapyapni de.

¹⁴ Matromlawnu ne! Arwa'lu rdeh'a rer a'u! Dodo'ondi de awuak de matmu reprepar la tulu-lyanti me tlinmu mana Mhuer tiarga la a polpuo'lu. Matrome! Mtiulla-msiayni a' pua Mulewna a lia' matmiati ralamni

¹⁵ totpena u'uli-uwed re'ru la'a mak kden Yerusalema re gaini ralamni, me hota a'g ed maka krarni-krarin nohora yamuki-yahepru, yoma tniulanmu-sniayanmu mai a'u.

¹⁶ La'pa hairi-hairi mak edonna katg O'a, de hota rhokal du'urnu rodia onni la hu'ula-ka'ara maka orgahi ha rahi niana. Dari miaka kanietra, me tniokal mak ha rwe'ela la' talla liola hota orgahi nekpa rler targ owa'an la.

¹⁷ Riy rat niohora de Orgahi-Orha'a Nawerta-nataili rira do'oni-halli la plola wawannu. Riy maka kyata-khala de orgahi nekpa rhokal gaini, me rwag onni la orgahani hihi'ini-yapyapni owa'ana.

¹⁸ Matmiati-molmuolu ed maka ktoran reria riy yatyata-halala aranni, mai luwu-a'na lodna-hairi mak kden la lyanti nayanni mak edon kha'wa nana Uplerlawna.

¹⁹ Yoma mak kakleha-kaplara re hota Uplerlawna edonna Nhoratdoin memna la, me la' riy mak kpolu-kwaka mana hota edonna lului-nunuh'rga pa nreiniande nakleha nhia'argeni.

²⁰ Matroma! Mupriri-mukdeda pa Muwerta-mutailla' luwu-a'na, lodna-hairi, ne yana Mhur niohora rimormiori maka katulu-kapetna inonni la'a Matro'mu gaini.

²¹ Mhi' ira totpena ramta'at nohora diwarni-da'alli Matroma totpena rat niohora de rimormiori to' ira.