Nhiara 89 - Alkitab bahasa Luang

Nhiar maka ha rwahniara la'a ha rler la kropna-krieutu ralamni

¹ Etan, Esrahi duratni-waitni de, nwatutu-nwaye'a de nnairia nhiara.

Itmatromlawanni Ndenrer lia plolli-mneheni wawannu

² Matromlawnu ne! Makdenreri O'a! O tniulanmu-sniayanmu mak kodi liarni de nden rer lia a nu'ru tutnu pa wuahniarniar reria. Lera-ler nekpa Omhi'a hya' ed maka Mukottarga pa Mtiulla-msiayni Mura'a-mupalu rimormiori. La' hade ed maka hota a'ukotkot reria la tuwu pa nerun la tuwu pa la' tuwu.

³ A'ukota giwra O tniulanmu-sniayanmu de nodi liarni pa edonna nhoru. Ler-lera nekpa Omhi'a hya' ed maka Mukottarg oleka de. Nhiolmu-lietmu mak emkade hota edonna nherun doinia pa nodi liarni emeknekama lyanit mak kawnianin lia genni pa ndella genni.

⁴ La O lirmu de Omiwra O' orgahamu Mhi' nan oleka lira kniohlima id la'a riy maka orgahamu ha Mpualir niana, de Miwra: “Aliokar targ olek la' Daud, mak kla' A hopopnu-lili'iru de, gaini ralamni wa

⁵ de Giwra: “La liwangenmu de, hota Agala la o pa nodi liarni pa la ntut lia o di'nanmu-lohormu. Upmu-a'namu duratmu-waitmu hota ramtatan ma'ta la mtatangenmu nodia tuwu la' tuwu.””

⁶ Matroma, Makdenreri O'a! Mak khopun tar lia Ilyamou-Watyatoha re honona re ra'uli-rawed reria hihi'mu-yapyapmu mak kamehi-kayona. Makden la momuounu-witwitanni re rwahniar nohora O'a yoma hya' maka Omukottarga hota Omhi' nana, Matroma.

⁷ La'a lyanti hananni de mak kdella hande id mana edon nor O' ramneha. La' Ilyamou-Watyatoha id mana edonna ror wutga O inponmu pa ramneneha.

⁸ Makden la momuounu-witwitanni honona rru'u-rtowar rer lia O nayanmu, me ra'unni-ramta'at wenna O'a narehelia O hopopanmu-lili'irmu honona mak kle'lu reri-kpepan reria O'a.

⁹ Matromlawnu nee! Makdenreri O'a! O' de Orgahi-Orha'a Uplerlawna-Mempulwatnu Makodi Plolli la Haneknek Wawannu. He' rurni-laini ror O' pa rapniar wutu?! La' hya'a-hya'a to'owa de Matromlawnu Mhi' nana hya'a ed maka Omukottarg oleka wa pa Mtiulla-msiayni Mura'a-mupalu rimormiormu.

¹⁰ O' nanpena ed maka kodi plolli la yo'ora-anni riwtu-hora de. O' ed maka kadarga yo'or tutulu anin makodia pheni.

¹¹ Rahab, niy lawan lor gahani de, O' ed maka Mpuwlia tepra. Mual olek limmu mak karuri-ka'orat de pa ma Mutowra O arwalmu re honona.

¹² Lyanti nor nohkeran di de O' gahamu, yoma hya' makden la' noheri woru-lyanti nayanni de O' ed maka ka'ohi-ka'ara re.

¹³ O' ed maka khi' nana anni matni ra'i me tranna. Wo'ora maka ha rweta la Tabor me wo'ora maka ha rweta la Hermon rahepur nande rora riarni-riarin nohora ya'ulli-yawedni la O'a.

¹⁴ O' de mak karehi la ara. Riy edonna rpar nana O tnioranmu-riautmu, me O rurmu-laimu de ho'mana riy edonna rlol ewatni.

¹⁵ La'a tnioranmu-riautmu de, Mhi' neka mak kalwiedweda me la'pa Muwerta-mutaili rimormiori de Mdien rer lia plollolli wawannu. Mhi'a-myap de Mtiulla-msiayni Mura'a-mupalga rira emekto'a hya' mak Omukottarga oleka de.

¹⁶ Matrome! O' de Makdenreri O' e! La'a riy mak kwahniar pa ra'uli-rawedi O'a, de hota ralamni re rahepuepur reri. Yoma ir er maka klernana ra'amu-palmu.

¹⁷ Eee! Onnila O kalwiedmu la' ami pede lera-ler nekpa mahe'i-mahepur pa ma'uli-mawedi O'a!

¹⁸ Yoma O' ed mak kal am pia amlernana O rurmu-laimu plolmu-mnehemu la'pa ma'unut nan memna la ar ralma, onnila Omtiutga O kalwiedmu de mai ami.

¹⁹ Matroma, Makdenreri O'a. O' de Israel Uplerlawanni Makdella Momuounu-Witwitanni. O' ed maka kwalir niana ray mak kruwun reri ami. Omtiutmuata-mkiewra'a riy id pa nhi'a a ray mamni.

Uplerlawna Nano' targa la Daud Niwra hota duratni-waitni rodi plolli pa nodi liarni

²⁰ La' ululu ma'ta, de Omukot la hopopanmu-lili'irmu makla' makwohorulu-ktatrulu, la'a mi'ini-lo'oni ralamni, de Muiwra: “Atiutmuata-kiewra'a olek riy id la makla'a makawunu-ka'ara id wa, de Aga'nan hade la lima-rora lewatni na'nama A orgah'u mueh'a riana la heyanna.

²¹ Awualir nian olek Daud, A hopopnu-lili'iru de, me Aghopan pa rhuria wu'ru huwu mikmikri la wawannu totpena Ariana pa nla'a ray.

²² Hota A ru'ru-la'yu ed maka kruwun reri-ka'ahla reria de, ne A tniornu-riautu hota ed mak karuri-kalai niana de.

²³ Hota riy edonna ratowar nana la ara ralamni, me takenniana riy yatyata-halala rala la yawa.

²⁴ La' hameni to' pa ror e pa ra'ara de Uplerlawna A'g ed maka kwenna re. La'a he' to' pa maka ralamni nkoil la e'a, de Uplerlawna A'g ed maka klehga riy de aranni la' temni.

²⁵ Hota Atiulla-siayn reria de, ne edonna wuarei lia onni totpena Aghi'a pa naruri-nalai lia lodna-hairni pa nala arwalli la yawa.

²⁶ Hota lodna-hairni de Aghi' pa nawniau lia Laut Tenga pa nodi liarni pa nwewar la'pa ntut lia gerlawna Efrata.

²⁷ Pede hota enakot la mai A'u niwra: “O' de a' A'mu O'a, de Uplerlawna maka akola tieru-gawur nehla. O' ed mak kruwun reri-ka'ahla reri me mak kamori-kalewna a'u, O' inhatta.”

²⁸ Hota A'g ed mak khi' e' la A a'nu yanulu, ne tnioranni-riautnu narehia ray-ray re honona.

²⁹ Hota Atiulla-siayni reri e' pa nodia liarni yoma hya' maka A'ukottarg oleka la' e' de npit wuenna-nkor wenn oleka wa.

³⁰ La'a liwangenni-mtatangenni de, A'g edonna ghap dioinia e la' genni ne la'pa lyanti nkaduw rer mia'ta nohkerna, de di'nani-lohorni, duratni-waitni edonna rwarei lia mtatan genni wawannu.

^31-33 Mere la'pa duratni-waitni rpera-rdaitia maka A'ge'er taru-tiatar taru de hota A'g ed maka kliwra-kaklia, yoma pnierni-dniayatni re, ne hota agala riwtu-hora ga ururu-ukhara yoma la'a do'oni-halli re.

³⁴ Mere hota la Daud de A'g edonna golin doin A li'mu la mere plol toto'a pa Aghi' hya' maka Akottarg olek la e'a, yoma la'a A sniaynu de nden rer lia e'a.

³⁵ Hya'a-hya' honona maka A'ukottarg olek la de plol toto'a pa hota Aghi' nana re. Nnio'a id mana A'g edon ghernu-wuau dioini oke' et lia.

³⁶ La'a hya' lir maka ukottaru la Daud de, Aliokar de Awuet la A na'nu mak kmou-kwitan la do'a-hala. Totpena rat niohora de hota A'g edonna ulahara A li'ru della Daud.

³⁷ De la' A li'ru mak emkadi: La'a liwangenni-mtatangenni, de hota emeknekama ler ed ma'ta la lyanti pa nhit la nohkerna wawannu, de emekwalima e duratni-waitni mana rakperan rer mia'ta la Daud mtatangenni wawannu.

³⁸ La lodna-hairni de emeknekama wolla makden rer lia lyanti.

Knio'a-kniakru yapolu-yatniani la'a Daud duratni-waitni mak kla' ray, yoma nla' yaw la ara ralamni

³⁹ Mere la' dodo'ondi de Matroma, O' e Muwenan la' ray. O e Mpuanikli-mpuayotlia ray maka ha Mtiutmuata-mkiewra' olekwa.

⁴⁰ Omkei dioin oleka nnio' maka Omukottarg olek la Daud, hopopanmu-lili'irmu de, nor duratni-waitni. Wutnu-laini ho'mana Omrinin targ oleka la' loka-da'la ralamni wa.

⁴¹ O' ed maka kwo' dodioinia letni-ruhunni lutarni-wa'arni, pa la'pa lutru wniedi tniawa la'a yawunu-ya'ara (benteng) mana Mhi'a la haga'u-hamda'ara.

⁴² Riy mak klol hande honona de rwarui-rwate'la hyonni-hyanni, pa lodna-hairi mak rehgorgoru mana rhi'a e' la yawedi ltieri pa niniha-malmialia.

⁴³ Omuala unut lawna la e arwalli re pa nhi'nande mak ksukni tia'ala re niniha-malmialia.

⁴⁴ Keki-rautu maka ha nnairi re mana palapatia. Omuakleha tniulan la e' la ara ralamni.

⁴⁵ Omtiewar wat miemna e plolli-mnehenni, me mtatangenni mana Omhuapar wutga la eni-tani.

⁴⁶ Enakleh oleka rurni-laini pa emekto'ama nla' olek la mto'oni-pe'eni lerni, pa nhi'inde riy rahe'i-ramalia.

Rsumbain pa rwaka Uplerlawna Nwaldioinia pa Ntulla-nsayn nan owa'an ira

⁴⁷ Matromlawnu, ne! Yan Mude' pa nodi liarni. Hota mowen nianpena O yawenanmu de namdiaru?

⁴⁸ Mhuoratreria a mormio'ru hota edon naplahwa wal lia' nohkeran di wawannu. Omukoki-muyapia rimormiori de hota edon nalo'on wali ne nawali owa'an la eni-tani.

⁴⁹ Hota he' ed maka kmormiori pia edonna nmati?! Hota he' ed maka edonna kler la hoi-kietra ralamni?!

⁵⁰ Matroma, tniulla-sniayania ululmu de mak Omuno'targa la Daud etla meni? Omuno'targa emkade yoma la'a Omdien rer lia kalwiedmu wawannu.

⁵¹ Mhuoratreria Matroma, la'a emkameni la riy ramola-rama' a'u, O hopopanmu a' di! Aitutulu-ukwar neka lir yatni-tun yatni mak kwatiawua hairi-hairi dom to'a re.

⁵² Matroma Makdenreri O'a! Matroma! Arwalmu re honona rapolu-raliella ray miaka ha Mpualir niana. La'pa lol meni-meni to' mana rlernohora pa rapolu-raliella.

⁵³ Matroma, ya'uli-yawedi nden rer tiy O'a pa nodi liarni. Plola (Amin) Plola (Amin).