Nhiara 88 - Alkitab bahasa Luang

Rsumbain pa rwaka tniulan la Uplerlawna

¹ Korah duratni-waitni nhiarni maka ha rala la mak khi' o'ta la mak kwatunu-kwahniara, totpa rwahniar de rlernohora Mahalat Leanot (kropna-krieutu lui-nuhru) nhiarni. De nhiar maka ha rakot nohora Heman, riy Esrahi de, wniatutnu-wniaye'eni:

² Matromlawnu ne! Makdenreri O'a! O' de Uplerlawna maka kodi plolli pa orgahamu mak kamori-kalewn a'u. La'a lelera-melmel de apuolu-wuak tiy O'a.

³ Matrome! Mhueri tlinmu-mpual miatmu la'a a polpuo'lu!

⁴ Yoma la' a mormio'ru di de lier nek la yatyatni-halalli yatlorni-yatra'ani, pa awuarora de matmiati e nherit rer oleka nhiari gaini wa.

⁵ A'g emeknekama mat miaka kekeneka rhuriernia la tani niahi ralamni wa. Yoma amuadwie'er rer olekwa.

⁶ Arie' teman la riy mak kmati olekwa, de riy' maka ha rwenan nana, pa ha rwaklolia la'a tani niahi ralamni. Matro'mu edonna Nkil miat la a'u pede edonna Mumori-mulewn olek a'u.

⁷ Omniakul targa a lia'a hu'ula kriawa tniamin matgeni kokio'oni, mak kmela-kalma.

⁸ O yawenanmu de nutni-ndahla mkokoh a lia'a a ge'nu.

⁹ Omhi' a' pua olieta-patoga a lia a talanwa'lu pa ramkek nana a' die riwra rho' doinia motni la nurnu ralamni (riwra ramot memna). Udnieh'a la ko'oni pa takenniana liergot wa.

¹⁰ A yamke'ku npona-nmah wua yoma alier niek la kropna-krieutu lui-nuhru. La' lera-ler nekpa apuolga O nanmu agiwra: “Matrome! Mtiulan nan a'g e!” Asiumbain la O' de arian reria a li'mu rora pa apuolu-wuak la O'a.

¹¹ Matrome, la'pa Muolin doinia a pua amuat die, hota a'g edonna umkek owa'ana O hihi'imu-yapyapmu mak kamehi-kayona re! Mak kmati olek wa re ta'enniana ra'uli-rawedia O'a onnila hya' maka Omhi' nana re!

¹² Matrome! Mak kden olek la tani niahi ralamni re edon rlernan owa'an O tniulanmu-sniayanmu la nohkeran di wawannu toh! La'pa rler olek la'a matmiati-molmuolu de ta'enniana rakot nohor owa'ana riwra Omdien rer lia ira!

¹³ Matroma! La'a riy maka kden la melmelli-kalkalamni la tani niahi ralamni e rat niohora hihi'imu-yapyapmu mak kamehi-kayona pa rakot nohora? Edonna toh! La' pa rler la noh mati-rai miolu de, Mhuoratdoin olek ir wa pa hota emkameni owa'an pa rakot nohora hihi'imu-yapyapmu mak kden nek la plol wawna?!

¹⁴ Apuol rer tiy O'a, Matroma. La'pa yawyawar ma'ta la' lera-ler nekpa awuatniar la heyanan pa apuol rer lia O'a.

¹⁵ Nihya' pa Ompuayotlia a'u Matrome? Nihya' pede Muolin limmu me Mpue'er rormu la a'u?

¹⁶ La' kuku'a-keke'a ma'ta a'u la'pa ntutu-nte'ela lera-mela ri, de lier nek la polpuol inni-wakwak amni. Lera-ler nekpa matmiati niwra nte'la la mai a'u. Emeknekama gera nlol olek la a tiernu onnila hare honona maka Omuala pa aliernana re.

¹⁷ O yawenan lawanmu de ed maka nku'uta mkoha-mnanni a lia a ge'nu. Onnila Omlier temna a' die pede alier oleka la yatyatni-halalli yatlorni-yatra'ani.

¹⁸ La' lera-ler nekpa hankeranmu mai a' die emolmolla ger wawuau liawan maka kapet reri a'u, de takenniana hota aliewna.

¹⁹ La'pa a talanwa'lu nor wutga a i'nu-na'ru a'mu-hya'lu maka nhi'inde agor wutg ira, nek de O Muhala mai a'u. A'ukeh oleka talanwali pa nhi'nande amuehmeha pa wuaho'a-wuahai to' a lia melmelli-kalkalamni.