Nhiara 86 - Alkitab bahasa Luang

Sniumbain maka rwak pa rlernana tniulla-sniayni

¹ Daud sniumbainni: Matromlawnu ne! Mhueri tlinmu la a sniumbainu pa Mpuahla nan a'u! Yoma a' di de riy mak ksusa, mak kla ta'eni-kmai tia'enia a'u.

² Mutiak samomuog a'u Matroma! Yoma aliernohor reri O'a. Mumori-mulewna tniutmu-nhianmu nhieli-liarmu a' di. Yoma a'g e gha'ar to'a a mormio'ru la' O'a.

³ A Uplerlawnu O'a, pede yana Muolin limmu la mai a'u. Yoma la' lelera-melmel de a'g e siumbain to'ola O'a.

⁴ Matroma! Mhi'a tniutmu-nhianmu nhieli-liarmu a' di pa a ralmu nahepru yoma nhi'inde arian a ralmu pa siumbain tiy O'a.

⁵ Samomuounu ed rer lia O'a, Matroma pede O nhiolmu de sukmu Mumou-muwitna do'a-hal mamni. La'pa he' ed maka ksumbain la O'a, de Omtiutga sniayanmu mak kodi liarni la' ira.

⁶ Matromlawnu ne! O' de Makdenreri O'a! Mutlin rer lia a sniumbainu, Mutail rer lia'a hya' maka a'ukotkota, totpena Mtiulan la mai a'u.

⁷ La'pa alier la kropna-krieutu asiumbain rer lia O'a. Yoma Ompuahla nan a li'ru.

⁸ Matroma, uplera-upmati maka lodna-hairi dom to'a rhoi-rtania edon emek O'a. La' id mana ta'enniana nhi' nana hya' maka nhi'inde Omhi'a.

⁹ Hairi-hairi maka ha Mhi' nana re hota la' emkameni ho'mana hare honona rmai lia O' de pa rhu'ru-rhelam la O nayanmu, pa ra'uli-rawedia O prehemu-mkaimu.

¹⁰ Yoma la O' inponmu me la O hihi'imu-yapyapmu mak kamehi-kayona, yoma la O' nanpena ed maka ha rweta la Uplerlawna-Mempulwatnu.

¹¹ Matromlawnu ne! Makdenreri O'a. Orgahamu Mpuatutu-mpuaye' a lia'a O ralma-riormu, totpena agala a ralmu tetema ga liernohora O loimu-talanmu mak kaplollola. Mhi' a' pua a gal toto' a ralmu pa a ga' upali nia'nu totpa u'uli-uwedi O nanmu totpena nanmu nden rer niek la tutullu-lolo'oni.

¹² Matroma! O' de a Uplerlawnu O'a. La' a ralmu tetema de agiwra u'uli-uwedia O prehemu-O mkaimu pa nodia liarni.

¹³ Yoma O kalwiedmu-paitiotmu, la'pa tniulanmu-sniayanmu mai a' die namehi-nayon rehia, O' ed maka kanawar doinia a lia matmia'tu la'a hu'ula liena-hoi kietra ralamni.

¹⁴ Uplerlawnu ne! Riy mak kpo'ona-kraka rwatikil pa riwra rler temna a'u. Riy maklekla-makdiaini re rawok pa riwra rwenn a'u. Ir edonna rwadan nohor O'a.

¹⁵ Mere onnila O' de Orgahi-Orha'a Uplerlawna-Mempulwatnu mak kmori-kdar lia tniulla-sniayanni, pede O Mdien rer lia ralma-rior mak edonna plet pa kwahla rira yatni-halli, yoma la'a O kalwiedmu maka penpuenu-tetem de nodia pa nodi liarni.

¹⁶ Matroma! Mlin reri-muat rer a' pua yana ralammu werta la tniulanmu-sniayanmu mai a'u. Mual a' pua ururi-ulai, totpena Mumori-mulewn a'u. A' di, tniutmu-nhianmu nhieli-liarmu emekwalima a i'nu la' ler ululu.

¹⁷ Mual a' pua aliernana O kalwiedmu Matroma! Totpena la'a riy maka nhi'inde ralamni sukni tia'ala mai a'u re ramkek reria de Matro'mu Makdenrer die, ed mak ktulan la mai a'u ne Nhi' a ralmu pa namtiertiernu, dewade rmola-rma'a la'a hya' maka ha rhi'a re.