Nhiara 85 - Alkitab bahasa Luang

Rsumbain pa rwaka Uplerlawna pa Nal ir pa rler owa'an la kalwiedni-paitiotni emeka la' ler ululu

¹ Korah duratni-waitni nhiar ya'ulli-yawedni maka ha rala la mak khi' o'ta la makwatunu-kwahniara:

² Matromlawnu ne! Makdenreri O'a. La' ler ululu de Mtiulla-msiayn nan am pia Mhernu-mpuau doini a mehra-mau mamni totpa amler owa'an la kalwiedni-paitiotni pripanni-fa'anni la Israel nohoni di.

³ La' ler de O rimormiormu do'oni-halli ho'mana edonna Mkienia la ralammu pa Mpuahla mere Mumou-muwitna hare honona.

⁴ O ihramu-ralammu mak kamehra re mana orgahamu Mtie'el nohor neka wa.

⁵ Uplerlawnu ne! O' ed maka kamori-kalewn ami! Mhernu-mpuau doini a mehra-mau mamni totpa amler owa'an la kalwiedni-paitiotni emeka la' ler ululu de. Yana Mkenia a nhioli yat mamni rella' O ralammu pa hota amler la kropan lawna-krieut lawna.

⁶ Hota yawenanmu de nohor rer am pia nodi mieman la a durit mamni-wait mamni la' li'iru?

⁷ Matrome! O' orgahamu Mual owa'an am pia amler owa'an la kalwiedni-paitiotni, totpena O rimormiormu a hononam di mlerla he'i-hepru, yoma la'a O tniulla-sniayanmu la mai ami.

⁸ Matrome! Makdenreri O' ee! Orgahamu Mtiut muemna tniulanmu-sniayanmu mak kodi liarni la mai ami, de Mual memna mormiori-lewlewanmu de!

⁹ A orgah'u giwra utlin memna hya' ed maka Uplerlawna, Itmatromlawanni Makdenrer die Niwra Nwahla la hya' maka awuak oleka de. E' Nano'targa kalwiedni-paitiotni pripanni-fa'anni la' ita, E rimormiorni mak klernohor reri E'a ri, hornama yana tawali owa'an pa tler la do'a-hala ralamni.

¹⁰ Plola pa Enwahi' targ olek pa Nala mormiori-lewlewna la'a riy maka ka'unni-kamta'at E'a, totpena Orgahi-Orha'a E' inhatta makodi hithitni-repreparni tutullu-lolo'oni plolli-mneheni Nor ita tden wut lia la' it nohoni Israel di.

¹¹ De hota Itmatromlawanni Ntut muemna tulla-sniayanni mak kodi liarni la riy mak klernohor reri E'a. Ne Itmatromlawanni Nala riy mak kden la plol wawannu totpa rler la kalwiedni-paitiotni, pa rdella mtiertierannu.

¹² Orgahi-Orha'a mak khi'a-kyap rer lia plol wawannu Nden la lyanti pa Namkek rer lia riy mak katlin reri E'a.

¹³ Itmatromlawanni Makdenrer die, ed maka kala samomuounu pede hota nohanna-taniarat maka ha Nala mana hota nalgota wo' samomuou.

¹⁴ Emeknekama riy id nala'ul pua nwale'era loi-talla totpa o'ta-mata ida nleretia, de rira rhopliala do'oni-halli pa rden nek la plol wawannu totpena rwahyaria loi-talla la'a Itmatromlawanni maimiaini.