Nhiara 83 - Alkitab bahasa Luang

Rsumbain pa rwaka Uplerlawna pa orgahani mak ka'ara totpena Nmeh'a Namori-nalewn ira

¹ Asaf nhiar ya'ulli-yawedni: Matroma!

² Uplerlawnu ne! Yana Mhuerer niohora inonmu, me yana Mriw reria limmu pa Mumkek reri ami.

³ Mumkek la! Arwalmu re kokokna-rariarni, me riy maka ralamni edonna kal O'a re rmalawan la O'a.

⁴ Honona re de rna'ohma-rnakatia O rimormiormu totpena rtota la yatyatni, me rwahaur nohora riy maka Omriuwun reri re pa riwra rora rawenna.

⁵ Rwahaur pa riwra: “Mmiai pia it twakoha-twanannia riy Israel, totpena nanni re rmolu wa”.

⁶ La' meni-meni to' de lodna-hairi re rla' lir id pa riwra rmalawan la O'a,

⁷ de mak kden la Edom nora Ismael, rimormiori mak kden la Moab nora Hagar,

⁸ riy Gebal, Amon, Amalek me Filistea, me la' walia Tirus letni honona.

⁹ Me la' walia riy Asyur mana rma rtulan ir la ara ralamni, de rma rtulan Lota duratni-waitni re.

¹⁰ Pede Matrome! Mhi'a hare de emeknekama Mhi' olek la riy Midian la' ler maka Muala rimormiormu pa ral ir la yawa. Ne Mpunu-mpuen ira emeknekama Mhi' olek la ray Yabin me ahu namni Sisera. La' ler de Mpunu-mpuenna Yabin nor wutga riy mak ka'ara re la'a gerlawna Kisyon.

¹¹ La ler ululu de Muolin doinia rimormiormu re rwakoha-rwanannia ir la'a leta Endor, pa la'pa ntut lia hohoni de inonni re rwal lia tani mi'na pa riy ra rawuli-ratniamni.

¹² Matroma! Mhi'a lodna-hairi mak kmalawan O'a re de o'tani-matni pa emekwalima Mhi' oleka la Oreb nora Seeb me Sebah nora Salmuna maka Omual la yawa pa rmat meman wa.

¹³ Yoma riwra: “Samounu de mmiai pia it tamtatan la Uplerlawna tanni mak Enhollia.”

¹⁴ Matroma! Mhi'a ir de emeknekama koda-awu muaka anni nod lia'a-nod miaya me emeknekama wetra' lawna harni maka ha rataiya.

¹⁵ Mhi' ir emeknekwalima wewan mak kden la wo'ora apannu maka ai nlomar doin momuoga.

¹⁶ Muala anin lawna ma Mhuokra-mliaiya, me Muala kakmor lahu ma Muteplia ihranu re.

¹⁷ Matroma! Muolin doinia re pa arwalli ral ir la yawa nampena rahe'i-ramalia ira. Hota emkade totpena honona re hota ra'uli-rawedi ra'unni-ramta'ata O'a onnila O rurmu-laimu plolmu-mnehemu.

¹⁸ Muolin doinia re totpa riy rhi' ir pa ramta'ata me ramola-rama'a ir pa nodi liarni nhi'nande rmat miemna.

¹⁹ Totpena rat niohora de la' O' nanpena ed Makden la Tutullu-Lolo'oni, Orgahi-Orha'a Uplerlawna-Mempulwatnu kmemeha O' inhatti, Mak kodi plolli la'a nohkerna-rai miaran di.