Nhiara 81 - Alkitab bahasa Luang

Nhiar maka ha rwahniara la'a lerlalawna

¹ Asaf kieheni-nhiarni maka ha rala la mak khi' o'ta la makwatunu-kwahniara. Rwatunu-rwahniara rlernohora Gitit nhiarni:

² Mmiai pia twahniara nhiara ya'uli-yawedi la Uplerlawna, mak karuri-kalai nian ita. De trarni-trarin nohora Yakop Uplerlawanni pa tamuki-tahepur nohora.

³ Taliwra tiwla-prai pa tpolu nhiara la. Mia'ala hitara-fiola pa mriaktia!

⁴ La'pa nte'ela lerlalawna, de mieuga noknoka re, de miega noknoka la' wolla warwuaru me la'pa wolla temni.

⁵ Yoma la' lera re de riy Israel rhi' oleka harella deulu-tatra id wa, yoma rlernohora Yakop Uplerlawanni lirni mak ha Nakot taru.

⁶ E ed maka khi' hadella la'a deulu-tatra la'a riy Israel la' lera Enpehela ga'a pa Nwalerna riy Mesir. A'g e utlina yawal maka uplin niohor ma'ta niwra:

⁷ “Arian oleka mak ha mikwar reria re wa la' miy wawayanmi, me la'a kriou-lo'or maka kwerat wenna la'a miy limmi de ho'mana agaul doinia la.

⁸ La'a miy susmi de mpiol lia mai A'u, dewade A'ulewan olek miy wia. Awuahla miy lirmi de A'ulair nohora kukru-gauru ne umoin targa ino'nu la kukru-gauru ralamni. A'g ed maka kta'aga miy lia'a ger ormata Mariba.

⁹ Israel miy re! A ralmu nwak toto' meman pa miy mliernohora A li'ru. La'a rimormio'ru miy hononmi mitlina hya' maka Ukottarga la' miy!

¹⁰ De la' miy hononmi de riy id mana yana nkola tieru-nawur nehla la' uplera-upmati. La'pa do'ona-dakna doma rwatutu-rwaye'a miy lia uplera dom mana yana mliernohora.

¹¹ Yoma Amueh'a neka miy Uplerlawanmi, de Matromlawanmi Makdenreri A'g inhatti. Mak ka'it talan la miy pia mliergot la Mesir. Mliernohora A'u yoma Agiwra gal memna ra'u-pa'lu, kalwiedni-paitiotni tiy miy. Emkade pede A'g e emolmolan nekama ma'nu id mak knem la'a-knem mai totpa nmai die ntotan nana ya'ana pede nala a'nani ra'ana pa rpeher wa.

¹² A'ukot emkade, mere A rimormio'ru re edonna ratlina-ratailla mai A'u. Mak kden Israel edonna rlernohora la'a hya' maka Ukota-ulde'eta.

¹³ La' hade pede Agolin doinia re pa yeher to'ama ra'o'ta watu. Ndella pa plolli nek la ir ralma-riorni la'a hya' maka ha riwra rhi'a.

¹⁴ Mere Awuaror owa'ana de Ah! Maka a ralmu nwak toto' meman de totpena A rimormio'ru, mak kden Israel re riwra ratlina-ratailla mai A'u.

¹⁵ La'pa emkade de hota Awualdioin pa Upalia ir arwalli pa wuatei-wuahapra re. La'pa he'a-he' to' pa niwra nhi' ir la arwalli, de A'g ed maka katowra re.

¹⁶ A' di de Orgahi-Orha'a A'g inhatti! La'pa A rimormio'ru ratlina-ratailla mai A'u de hota ir arwalli maka sukni atia'ala mai A'u, de ramta'at pa rdiwdiwra, ne hota Agukmua re pa nodi liarni.

¹⁷ Mere A rimormio'ru de, hota Awualir dioinia metma watra lawna samomuou pa gala la ra'ana, ne Agal walia gan tiuru pa ga upehera re.”