Nhiara 80 - Alkitab bahasa Luang

Rsumbain pa rwaka Uplerlawna Namori-nalewna mak kden Israel la'a arwalli re

¹ Hadi de Asaf sniumbainni maka ha rala la mak khi' o'ta la mak kwatunu-kwahniara. Rwahniar de rtotnohora nhiar bunga bakung maktutrier niohora (kesaksian):

² Matroma, O' ed mak khi' makheri-maklai la Israel mutnu. Mhueri tlinmu-mtiatar matmu la'a wakwa'ku di! Yoma O' ed mak kodia Yusup duratni-waitni re emeknekama pipmu-dummu. Matromlawnu ne! O' ed mak kaliwna-kamtatna la O hopopanmu-lili'irmu mak knairia liwarni re wawannu, de la'a hopopanmu-lili'irmu maka ha rweta la Kerub. Mtiutga plolmu-mnehemu hititmu-repreparmu

³ la'a Efraim nora Benyamina me Manasye totpena ramkek memna. Matroma! Mhueri tlinmu-mpuali matmu! Plet pa Mmuai pia Muala rurmu-laimu mua Mumori-mulewn ami.

⁴ Uplerlawnu ne! Mhuria ralam kalwiedmu owa'an mai ami pa Mua Mumori-mulewn ami. Mhi' a noha mamni totpena narehi-nalawna owa'ana emeka la' ler ululu de.

⁵ Orgahi-Orha'a Uplerlawna-Mempulwatnu Makodi Plolli la Haneknek Wawannu O inhatti! Nihya' pede la'pa ami e msumbain la O' de Mpuayotil nek am pia? Hota O yawenanmu de nla ntut mueman la'a hya' lera-hya' wolla, hya' wenu-anni o?

⁶ Omhi' am pia mko'a-mkakru me maluli-mahon nekpa emeknekama am ma'ana-memun nek lui-nuhru to'owa.

⁷ Muolin doin olek am pia hairi-hairi mak krehgorgorga ami re rawo'or nohora a nohanna-taniarat mamni, pa nariei niande a' arwalli miamni mana rayadil lakni pa ramali ami.

⁸ Matroma, Uplerlawna-Mempulwatnu Makodi Plolli la Haneknek Wawannu O' inhatti! Mhuria ralam kalwiedmu owa'an mai ami pa Mua Mumori-mulewn ami. Mhi' a noha mamni totpena narehi-nalawna owa'ana emeka la' ler ululu de.

⁹ Yoma O rimormiormu, makden Israel ri, de emeknekama lokrahi ona mak Omdi'na nana la Mesir. Ne Omhuokra-mliai dioinia hairi-hairi Kana'ana la genni-tienni na'nama Mtiamin targa lokrahi on de la'a gen die.

¹⁰ O' ed maka kwahiar tiarga tani la'a au die, totpena ga'arni nwahipin lola pa ne'era-nhakra noha di uhunu-ewatni ewatni-lahwani.

¹¹ Lokrahi ona tutnu-akni re rwalawar la wo'or-kawru pa naruwnu-na'ahla hare honona mak kla' hande. Ne tutnu-akni re rtut lia lyanti pa narehia ora-au lialawna,

¹² me tutnu-akni ra'itar rer lia pa nla ntut lia Laut Tenga. Uhwanu nekane yeher to'a nlergot pa ntut lia gerlawna Efrat.

¹³ Matroma! Hya'a nariei pia dodo'ondi de Ompuaye'er doinia lokrahi lutarnu pa nhi'nande mak kla'a-kmai re rlernan talan pa pala tniewarni la lokrahi wo'oni?

¹⁴ Wawi piora-wawi diawra rakihia onni pa pala matia. Mak kpora-kdawra re ra'an doinia la.

^15-16 Matroma, Uplerlawna-Mempulwatnu Makodi Plolli la Haneknek wawannu O' inhatti! Ampakwak pa Mpualdioin pa Mmua Mulewn ami. Mdien la Ilyamou-Watyatoha de matmu nreprepar la mai O rimormiormu. Mumori-mulewna rimormiormu mak emeknekama lokrahi (anggur) onni mak ha Mtiamn olek de, ne maka orgahamu Mual oleka uhwanu pa ratultul liola.

¹⁷ Mere la' dodo'ondi de arwalli re retn oleka pa rtutnia. Pede Matrome! Muolin doinia a' arwal miamni re totpena hankeranmu nwenna re!

¹⁸ Mere Mutiak reria rimormiormu maka Matro'mu ha Nwalir oleka, de noha-rai miaka Omehmueha Mhi'a oleka pa naruri-na'orta onnila O rerieimu.

¹⁹ Ne hota am miana edonna mhoitio'or doin owa'an O wa. Mumori-mulewna ami, totpena hota am mhu'ru-mhelma ma'uli-mawedi rie'ru.

²⁰ Matroma, O' ed Makdenreri! Uplerlawna-Mempulwatnu Makodi Plolli la Haneknek Wawannu, O' inhatti! Mhuria ralam kalwiedmu owa'an mai ami pa Mua Mumori-mulewn ami. Mhi' a noha mamni totpena narehi-nalawna owa'ana emeka la' ler ululu de.