Nhiara 8 - Alkitab bahasa Luang

Orgahi-Orha'a Makodi Plolli la Haneknek Wawannu Nala preheni-mkaini la rimormiori upni-tgarni

¹ Hadi de Daud nhiara ya'ulli-yawedni maka ha rala la mak khi' o'tani la mak kwatunu-kwahniara. Rwatunu-rwahniara rlernohora Gitit nhiarni:

² Orgahi-Orha'u nee! A Matromlawan mamni O'a! Plolmu-mnehemu O kotmu-nanmu nwewar la noheri woru-lyanti nayanni, prehemu-mkaimu narehia lyanti.

³ O Mpuatutga upa-a'na lokmera-papay pa rat niohora ra'uli-rawedi O'a. Omhi'a genmu-tienmu pa naruri-nalai wia pede arwalmu re ta'enniana nawo'la nana. Omuala mak edon rtelan nan-raut nan O' la yawa pede rakleha lira-waw la' temni.

⁴ La'pa umkek la lyanit maka O Mhi' nana, me wolla-wtiona maka O limmu ha ne'er taru re,

⁵ de rimormiori die hya'a de Uplerlawnu ne, pede Omiwra Mhuoratreria?! Rimormiori pa nden la rimormiori, ne nihya'pa Mhilpai-muanatga e'a?!

⁶ Rimormiori nek de, Omuala pa namtatna la liwangeni-mtatangen tiutulu maka ha ratota-rawawa totpena nlernana ya'uli-yawedi pa emekwali O'a. Mere la' noheri woru-lyanti nayan di de O omueh'a nampena tulmu narehi e'a.

⁷ Omuala limmu enni honona re pa rru'u-rtowar momuou lia nayanni,

⁸ de nhiuri-wnia'ana, makawrika-kawriai, mak kawlola-kawniai'ti, mak kpora-kdawra,

⁹ onu-ma'nu, i'na-ya'an lalawna mak kden la lora, ne mormiorni-dardiarni dom mak kwo'la-klekur la gera-tah'i ralamni.

¹⁰ Orgahi-Orha'u nee! A Matromlawan mamni O'a. Plolmu-mnehemu O kotmu-nanmu nwewar la noheri woru-lyanti nayanni.