Nhiara 79 - Alkitab bahasa Luang

Rsumbain pa rwaka Uplerlawna Nalewna ir la lodna-hairi dom to'a

¹ Asaf sniumbainni: Uplerlawnu ne! La'a hairi-hairi mak edonna katg O'a re, e rdeh'a nan oleka noh di maka ha Mpualir niana. Rhi'a akdeha-aktiahlia O roma kreimu. Yerusalem ho'mana rweyata-rwaniaga.

² O rimormiormu maka nhi'inde ratlin la O lirmu re limni-lakni rurni-kliakallu de edonna rtamin walia mere knunu-kner neka pa onu-ma'nu rmeh'a ra'an dodioinia. De inonni re ranietra nekpa ohpora-ahdiawra rma rwaruiya ya'anni.

³ La'a loi liawna-talan lawna mak kden la Yerusalem ho' de O rimormiormu rarni wau liora, de emeknekama ger wawuaga. Ne la' riy id mana hadamon olek pa nkilli miat la tniamanni.

⁴ Lodna-hairi mak kden la noh mamni walli-walli re ho' de rkeni am lia nurnu tutnu pa rahe'i-ramali ami.

⁵ Matroma! Hota yawenanmu mai am di de edonna nhoru mua'ta? La'a hya' ler nanpena O ralammu nwoki o? Hota hankeranmu-ralmha'armu emeka ai mak ta'enniana rwarum nana pa nodi liarni? O' de emeka muanke' ida mak kaya'a la patke'eni onnila patke'eni naliai.

⁶ Mere awuak pa Mtio'gernia yawenanmu de la'a hairi-hairi mak edonna katlin la O'a, Matroma, de la' lodna-hairi mak edonna kola tieru-kawur nehla la O'a.

⁷ Yoma ir maka kwunu-kwenn ahorga O rimormiormu, de Yakop duratni-waitni ami, ne la' a gen mamni-tien mamni mana rweyata-rwaniaga momuoga.

⁸ Uplerlawnu ne! Yana Mukmua ami yoma la'a up mamni-tgar mamni do'oni-halli wawannu. Pleta-plet pa Mtiulla-msiayn nan ami Matroma, yoma am madwie'er olek wa.

⁹ Uplerlawnu ne! Mtiulan la mai ami Matroma! Yoma O' de maka kamori-kalewn ami, O'a. Yana Mpuahla a do'a-hal mamni. Mpue'er doinia am lia'a a arwal miamni, totpena nanmu yan namdiaru mere hota riy honona ratu ra'unni-ramta'at O'a.

¹⁰ Yana Muolin doinia am lia pa lodna-hairi dom to'a ratian am die riwra: “Hoi, miy Matromlawanmi etla hanmeni de?!” Matroma! Mual memna totpena am mamkek memna la am mat mamni de Ompuahla nana mak kwunu-kwenna rimormiormu re wniahlani.

¹¹ Mutail to'ola mak ha rtoran nana re yatipnu-yatnianni. Eee! Awuak pa la'a riy meni maka reti olek la de hota kmati, de rollia la'pa rmormiori, yoma la'a O plolmu-mnehemu.

¹² Matroma, pena Ompuahla lodna-hairi mak kden la noha mamni walli-walli re hihi'ini-yapyapni la O'a, de Mpuahla nana la tiewra wo'it ralamni yoma hare er maka kapolu-kaliella O'a.

¹³ Totpena O rimormiormu mak emeknekama O pipmu-dummu hota ama'uli-mawed reri O' pa nodi liarni la'pa nerun la'a durit mamni-wait mamni pa nodi liarni.