Nhiara 78 - Alkitab bahasa Luang

Rnairia riy Israel tuini-wedni pa ra rwatutga ira

¹ Asaf nwatutu-nwaye' de nnairia nhiara: Ina-nara ama-hyal miy re! Mtia'wa reri tlinmi la a li'ru-tu'nu nnio'a-nia'tu ri.

² Agiwra ukot nohora it tuini-wedni totpena awuagahniorta miy la'a hya' ed maka ha rhi' nana la' ler ululu totpena miy mnia'erit nana hya' maka riy edonna rna'erit nan ma'ta.

³ La'a hya'a-hya' maka itat niohor oleka re de it upni-tgarni rakot nohora oleka mai it wa.

⁴ Hota it edonna tawunmua hare honona la it a'nani. La' hare honona de takot momuoga la'a tuw li'iru maka kmai ri, totpena rat niohora Itmatromlawanni Makdenrer die, tulanni-kniarni mak kamehi-kayona, mak ktutga Itmatromlawanni rurni-laini pede riy ema rtaplelleltarga.

⁵ E' ed mak kala deullu-tatarni la'a riy Israel, Yakopa duratni-waitni re, dewade Itmatromlawanni Nhopan pa it upni-tgarni re rwatutu-rwaye'a upni-a'nani rella'a nhioru-tniau deulu-tatar de.

⁶ Totpena tuw li'iru re honona rat niohora E'a, ne hota ratuiya pa nernierun lol la'a tuw li'iru.

⁷ Ne hota la' hade totpena ir mana rha'ar reria aranni la Uplerlawna, ne edonna rhoratdoinia hihi'ini-yapyapni, me rhu'ru-rhelam la E deullu-tatarni.

⁸ Totpena yana ir rlernohora upni-tgarni nhiolli-lietni maka nhi'inde sukni ratehra ralamni pa ra'o'ta watu. It upni-tgarni re, rimormiori miaka kakleha pesiay. Ne edonna rdenrer lia'a Uplerlawna.

⁹ Emekwalia Efraim duratni-waitni re. Ir rodia keki-rautu tera-ra'pa ho'mana rawlar lia' ar ralma.

¹⁰ Yoma ir er maka orgahani nekpa rawlari dioinia nnio'a-niatu muaka Uplerlawna Nora ir pa rkohu lim tar lia, mere rwaldioinia pa edonna rlernohora Uplerlawna deullu-tatarni.

¹¹ Honona re rhortaplin muemna Uplerlawna tulanni-kniarni, la'a hihi'ini-yapyapni mak kamehi-kayona, maka ir mana e ramkek nan walia.

¹² La'a ir upni-tgarni gaini ralamni, de Uplerlawna Ntut muemna preheni-mkaini la'a Soan rai mtatanni wawannu, la'a noha Mesir de.

¹³ Noma Nodi gota ir upni-tgarni nlola tah'i lawan de letgarni yoma Uplerlawna ed maka kwek'era tah'i lawan de pa emeknekama lutur watu mak klol ir walli-walli.

¹⁴ Uplerlawna ed mak ka'it nana ir pa rlernohora kakma mak kayariri la'a leler gahani, ne la'pa nmel wa demade Nala ai mormiori mak kaririri totpena rlernohora la'a lera melmelli.

¹⁵ E' ed mak kahra wawah'a wa'ura-wat muetma, mak kden la wo'ora-kawru na'nama gera mak kwatiawua gen kdieldelam rehi nwau lior pa ra'ana-remun lola.

¹⁶ De wa'ura-wat muetma mak kerna-khau de, de Uplerlawna Nhopan pa gera rpira-rra'pa lola pa rwal lia emeknekama gerlawna.

¹⁷ Mere yehwani re yeher to'ama rhi' do'a-ryap hiala la'a Uplerlawna. La'pa rden nek la wo'ora-kawru re rhi' o'ta watnu la Uplerlawna Makden la Tutullu-Lolo'oni.

¹⁸ Honona re rtota Uplerlawna pa rta'aga, de rtot pa rwak yamanan la pa ra'ana.

¹⁹ Honona re rmalawan la Uplerlawna pa ratiana: “Plollola pa Uplerlawna Nodi plolli pa hota Nala yamanan la wo'or keran di wawannu?!

²⁰ E' ed maka kaklie'era wa'ura-wat muetma, pede gera npira-nra'pa lola. Mere hota plol toto' pa Nal roti me ha'ihi pa it ta'ana?! Yanpa takenniana?”

²¹ La'pa Orgahi-Orha'a Natlin nan hare lirni dewade hankeranni-ralmha'arni nha'ata pa Nala ai liomlomra na nlomar doin rimormiorni re, de makden Israel, Yakopa duritni-waitni re.

²² Yoma ir edonna rpesiay Uplerlawna Nodi plolli pa Na Namori-nalewan nan ira totpa yana rmati la talla ralamni.

²³ La'pa emkade ho'mana Uplerlawna ed maka kodi plolli la lyanti pa penatni-puohrani re mana ema rhar dodioinia la.

²⁴ Endella Ilyamou-Watyatoha pa Nalernia metma-wetra' lawna pa nmai die nerun lola lyanti totpena ra'an lola-remun lola. Metma-watra' lawan de, rweta la manna.

²⁵ Uplerlawna ed mak kala ya'ana-yemnu re la ira, de harahu muemna. Emkade pede ir ra'an memna Uplerlawna hopopanni-lili'irnu yamananni.

²⁶ Uplerlawna Nhopan pa anin tipru nteni, me la' E plolli pa anni ngota tranna.

²⁷ E' ed mak kalernia onu-ma'nu la'a E rimormiorni, de liawanni emeknekama eni-tani.

²⁸ Nalernia onu-ma'nu re de, rtai mdududga ohwialli mak ir rhol lia re walli-walli.

²⁹ Noma ra'an nande hlieh'wani rtepra, yoma Uplerlawna ed mak kala hya' maka ha rwahaka.

³⁰ Mere emkade ho'mana ya'an te'eni re yeher to'ama npali, pede la'pa ertepartar mua'ta la ya'ana

³¹ dewade Uplerlawna Nahankeran nande Nwaldioinia pa Nukmua re, de Nwunu-nwenna tuwari-laweru Israel mak karuri-kalai re.

³² La'pa emkade ho'mana rimormiorni re edonna rwadur et lia do'a-hala ralamni. Uplerlawna hihi'ini-yapyapni mak kamehi-kayona re edonna rhi' ir pa rpesiay et miemna E'a.

³³ Pede plin-plinnianamde Uplerlawna Nkuh dioini-nho'or doini ira. De Uplerlawna lehga ir aranni pa anin-anni mak ha rdella nohkeran di wawannu rwal lia hamamuamua.

³⁴ La' dom de ramkek nana Uplerlawna Nwunu-nwenna ir nohwalli onnila ir nhiolli-lietni, nhi'nande rwaror nan owa'ana nhiolli-lietni mak khal olekwa, pa riwra rawali owa'an la Uplerlawna. Ir rsumbain pa rwak toto' meman la E'a.

³⁵ Yoma ir rhoratnana de Uplerlawna ed maka nhi'inde kruwun reria ira, ne E' de Uplerlawna mak kden la tutullu-lolo'oni mak kamori-kalewn ira.

³⁶ Mere edon nalo'on wali ne ralahar walia Uplerlawna la' ir lirni-tunnu re, de hya' maka irakota de edon naplol kuku'eti.

³⁷ Rahmena rlernohor reri Uplerlawna me edonna rhoratreria Uplerlawna nnio'oni-niatnu maka ha rora Uplerlawna rhi' oleka la kniohlima id wa.

³⁸ Mere Uplerlawna Nsayn reria re, ne edonna Nwahla do'oni-halli re mere Nala rpa rmou-rwitna. Edonna Nwunu-nwen ira. Mere Natahan rer nieka hankeranni-ralmha'arni, pa edonna Nalgot yawenanni la ira.

³⁹ Yoma Uplerlawna Nhoratreria rimormiori re edon rmormior pia nodi liarni. Ir emolmolla ai miokla mak kmokla-kmahu mere tamkek owa'an de nmol tietema.

⁴⁰ Nhi'inde rmalawan la Uplerlawna, ne rhi' E ralamni pa namehra, la' lera maka ha rden ma'ta la la'a wo'ora-kawur mak kdurdurna.

⁴¹ Nhi'inde riy Israel re rta'aga ir Uplerlawanni nhi'nande Uplerlawna ralamni nmayo'a yoma E' de Nakleha do'a-hala.

⁴² Ir edonna rhoratnana-rnehlanana Uplerlawna rurni-laini la'a ler maka E Nwe'er doin ir la'a ir arwalli.

⁴³ La' ler de E Nhi'a hihi'a-yapyapi mak kamehi-kayona totpa mak kden la rai mtatanni Soan, la'a noha Mesir de ramkek memna.

⁴⁴ Gerlawna ror wutga elwa klihira mak kden la hande honona re Uplerlawna Nhi'a pa rwalia rar mermera, pede nreiniande ta'enniana remun ger de.

⁴⁵ Uplerlawna Nala laran motmota riwnu-halli na npoiya re, me Nolin doinia kakhargera (katak) niutni-niutin pa na nweyata-nwaniaga nohanna-taniarat maka ha rmori-rdar liola.

⁴⁶ Uplerlawna Nala orna nor wut nieka kongoha pa nahorga yawuli-yatniamin maka ha riwra rreiki-rwo'ora.

⁴⁷ Uplerlawna Nalernia otan watu pa ntur wuenna lokrahi miaka ha rtamnia, me la' walia nu'nu-kara maka ha ra ra'ana, de howna kgara nkeran pa onni-ga'arni nkerna-nhau me tawni napliau.

⁴⁸ Uplerlawna Nolin limni pa otan watu ntur wuenwenna nhiurni-wnia'anni, na'nama Nala layera pa nwarahi eti-lahwa honona re.

⁴⁹ Uplerlawna Ntutga hankeranni-ralmha'arni, pede rler la kropanni-krieutnu lui-nuhru polpuol inni-wakwak amni. Nhopan doinia hopopna-lili'iru re rma rwalehga riy aranni.

⁵⁰ Uplerlawna edonna Ntahan nana ralmha'arni onde Nhoratnana ir mormiorni, mere Nlawrernia nnieni-nhien werwerta de namrereh'wa la noh de tetema.

⁵¹ De Ntota riy Mesir a'na muan yanullu honona pa Nwunu-nwenan momuoga, de nawniatniatia rom'ara nenenna.

⁵² Dewade Itmatromni orgahi Nodia E rimormiorni pa rlergot de emeknekama mak kheri-klai nhiuri pipi-duma, de Nodia lola wo'or letna-kawur loini.

⁵³ La'pa E Nodia re, Natiak samomuou ira totpena ir edon rler la hadoma, nhi'nande ramtiertiernu, ne edonna ramta'at wa. Mere ir arwalli re de pala mati momuoga la tah'i ralamni.

⁵⁴ Ne E rimormiorni re de E Nodi la'awa la noha-rai miak kla' E gen wamueheni. De la wo'ora maka Uplerlawna orgahi ha Nwarui nian oleka wa.

⁵⁵ Itmatromlawanni Nhokra-nlaiya mak kholi noha-klet rai lia hande, de E rimormiorni orgahi ramkek memna. Noma Nwahakra nohanna-taniarat re honona la'a noh de totpena riy Israel re honona rlernan momuoga ne rdeh'a nan momuoga arwalli re ira nhiol genni.

⁵⁶ Mere riy Israel ra'o'ta wat pua edonna rlernohora Uplerlawna titni pede rta'ag owa'ana Uplerlawna Makden la Tutullu-Lolo'oni.

⁵⁷ Rlernohora upni-tgarni pa rmalawan la Uplerlawna lirni. Ne la' hadi de Uplerlawna edonna Npesiay ira yoma wniehwani re emeknekama ra'p'ihi mak koili.

⁵⁸ Rhi' to'a gen wamueheni maka rnairia pa rala hoihoi-tantiani la uplera-upmati nhi'nande Uplerlawna emeka Nayah'a re me Nawenan doinia la.

⁵⁹ La'pa Uplerlawna matni Nki'ir tutga re dewade Nawenan pa Nwanikli-nwayotlia re.

⁶⁰ Ne Nto'or la Silo mak ha Ndella pa Nden wut lia rimormiorni.

⁶¹ Ento'or la luwuau nnio'tarnu pa arwalli reyahru nana. De luwuau nnio'tarnu mak ktutga Uplerlawna rurni-laini plolli-mneheni inhatta mere Nolin doinia pa arwalli re rwarui niana.

⁶² Enawenan la E rimormiorni maka E orgahani ha Nwalir niana na'nama Nala arwalli re wehlani rlatan nana.

⁶³ Tuwari-laweru re mak kler la ar ralma rwunu-rwenna, pede riy hadamonan la pa rora hararara re rmehlima.

⁶⁴ Imam-imam re ho' de wehla plalahwa rlatan nana re, ne hawa pat maka ha rto'or nana ta'enniana rhi' yapolu-yatniani matmiatni.

⁶⁵ Plin-plinnianamde Itmatromlawanni Nma Ntulan la' ira, emeknekama riy maka khedu mhuakru la dud rialma. Me emeknekama makatu ka'ara nerun owa'an la ar ralma yoma arka ngai dioin olek la e gaini.

⁶⁶ Uplerlawna Nhokra arwalli re pede Nala ir la yawa nhi'nande hota rmola-rma'a pa nodi liarni.

⁶⁷ Mere Uplerlawna Nwayotlia Yusup duratni-waitni, de nahmena Nwaliria Efraim luwnu-a'nani.

⁶⁸ Mak ha Nwaliri Yehuda luwnu-a'nani, ne wo'ora Sion maka E ralamni ha Nala.

⁶⁹ Itmatromni Nariria romni totpena emekwalima E genni mak kden la Ilyamou-Watyatoha. Ne romni de naruri-na'orta emeknekama nohkerna-rai miaran maka karuri-ka'orta pa nodi liarni.

⁷⁰ E' ed maka kwaliri-kwaloh nana Daud mak kla' E hopopanni, ne na' nana la nhiuri-wnia'ana letgarni.

⁷¹ Na' nana la geni miaka Daud orgahani nhuri-nwa'ana duma pat maka kayori-kadari totpena nodia riy Israel, Yakopa duratni-waitni re, de E rimormiorni inhatta.

⁷² Daud ed maka kodia re, de nodia ralma ploi-ple'era me ntutga talan la ira de nodia o'ta kriahlu.