Nhiara 77 - Alkitab bahasa Luang

La' susa lerni, it ralamni namtiertiernu onnila itsoratreria Uplerlawna hihi'ini-yapyapni ululu mak kamehi-kayona

¹ Hadi de Asaf nhiar ya'ulli-yawedni maka ha rala la mak khi' o'ta la mak kwatunu-kwahniara. Rwahniar di rtotnohora Yedutun.

² Aghaun pa apuol lia Uplerlawna. Aghaun totpena hota Natlin la a li'ru.

³ La'pa alier la polpuol inni-wakwak amni, dewade asiumbain la Itmatromlawanni. La'a mela plahwani de awualtior pa asiumbain la E'a pa nodi liarni, mere a ralmu edonna namtiern eti.

⁴ La'pa a nhiortu nko'i nana Uplerlawna, adien to'ola'a ihru teplu-ralam mawla ralamni. La'pa awuarora-wualai niohor E'a (yoma edon Ntulan mai a'u), demade emeknekama aruple'a ntai a'u pa a' ino'nu nakleh et miemna ruri-lai.

⁵ Orgahi-Orha'a Nhi' nande a'g edonna unin a ma'tu la' mel tetema. A' ih'ru ntepul nande ukleh lira wawa.

⁶ A nhiortu nla'a-nmai owa'an la ulul genni la' ler maka Mtiutg ma'ta ralam kalwiedmu de mai a'u.

⁷ La'pa nmel wa, dewade a wniaro'ru-wniala'yu la hya' ed mak krei piede dodo'ondi de emkadino?

⁸ Hota emkadi nekpa nodi liarni de Orgahi-Orha'a Nwanikli-nwayotlia a hononami?

⁹ Yanpa E sniayanni mai am di nhorwua? Yanpa hota edon Nhi' nana hya' maka ha Nakottarga olek la mai ami?

¹⁰ Yanpa Uplerlawna Nhoratdoinia oleka sniayanni. Yanhi'pa la' yawenanni pede edon Ntutga ralam kalwiedni owa'an wa?

¹¹ Dewade agiwra: “Hadi de emeknekama rkokia wehla la ih'ru ralmu, de Makden la Tutullu-Lolo'oni Nherun doin pa edon Ntutg owa'ana rurni-laini pa Namori-nalewan nana ami.”

¹² Dewade awuaror owa'ana. Agiwra ghoratnan O tniulanmu-kniarmu Matroma! Aghoratnan owa'ana tniulanmu-kniarmu mak kamehi-kayona la' ulul genni.

¹³ Agiwra wuaror samomuoga la'a hya' maka ha Mhi' oleka wa. La'a hya' maka ha Mtiulla-mkiari niana de, la' riy id mana edonna ntot nohor nana.

¹⁴ Matroma! La'a hya' maka ha Mhi' nana re de rmou-rwitan momuou. Uplera-upmati maka ha rhoi-rtania re edon rora a Uplerlawan mamni ramneneha. Yoma, O'a, Uplerlawna Nareh dioin momuoga re!

¹⁵ Uplerlawna, O' inhatti mak khi'a hihi'a-yapyapi mak kamehi-kayona. Omtiutg oleka O tniorna-riautmu re honona la hairi-hairi mak kden la noheri woru di wawannu.

¹⁶ Omual oleka rurmu-laimu ma Mulewan doinia O rimormiormu la Yakopa nora Yusupa duratni-waitni la'a wutwutu-kokuohu ralamni.

¹⁷ La'pa, gera-tah'i ramkek la O'a Matroma, ramta'at wenna, me hletan lawna-yoir lawna mana ndiwra-nda'al la genni.

¹⁸ La'pa Omuai die, wowat lawna nturga otna-anni. Me kukru-gauru yetni warna ne la'pa layera ho' de nahyol lia tipru warta-ra'i tranna, pa emeka O ra'pa ihimu mak klol la meni-meni to'a.

¹⁹ Kukru-gauru yetanni emolmolan nekama kereta ya'ara yetanni, hita-tlena npokaili-npokaili ne noha nkaruru.

²⁰ Ne Omula' lola yo'ora tutnu, la' hletan lawna-yoir lawna, mere yehemu edonna nayamkeka.

²¹ Omtiutmuata-mkewra'a (Mpualir niana) Musa nora Harun pa rodi rimormiormu emolmolan nekama mak kheri-klai ida e nodia pipni-dumni.