Nhiara 76 - Alkitab bahasa Luang

Uplerlawna mak kal arwalli re la' yawa

¹ Asaf nhiar ya'ulli-yawedni maka ha rala la mak khi' o'ta la mak kwatunu-kwahniara. Rwahniara de rnairia hitara-fiola:

² Rwahaur nohora Uplerlawna nan ya'ulli-yawedni la'a Yehuda. Yoma nanni de riy mak kden la Israel rwahaur nohor mamainia nan samounu.

³ E genni namtemteman la' Yerusalem, de la'a wo'or Sion.

⁴ Ne la' hande Nweyata-nwaniaga mak kodi keki-rautu la' ar ralma re honona, de mak kodi tera-ra'pa wehla-ta'wa mak khita-klomra.

⁵ Matroma, Omdien la tutullu-lolo'oni de Mhitita-mrieprepar la O genmu-tienmu. Tulmu-lawanmu de nareh dioinia wo'ora tutulu mak kawnianin la ululu-plialiaini.

⁶ Yaaa! Makodi keki-rautu mak parani re erla menio?! Hyonni-hyanni re reyahru nan oleka honona re wa. Rmati olekwa pa hota edonna ramat owa'an wa pede ta'enniana rhi' oleka hadompa.

⁷ Kud maka rodia pa ra ra'ara re mana rmati pia klololi-klalal niohora upni-matromni mak ka'ara re, yoma la' Yakopa Uplerlawanni Nkamot targa re.

⁸ Plola! La'a O plolmu-mnehemu mak kamehi-kayon de, Matroma! La'pa Omuwenan de hota he' ed mak ktutrier lia O gaimu ralamni?!

⁹ Omdien la lyanti pa Omukot nohora hya' maka ha Muetlia de noh marna ema rlu'ut targa la genni de nherieri tio'owa.

¹⁰ Muprir pia Miwra Muetlia lira-tunu totpena Mumori-mulewna rimormiori mak katnioran la niutni-dniahla ralamni mai nohkeran di wawannu.

¹¹ La' rimormiori mak sukni kawunu-kawenna re nek de hota rodi ya'uli-yawedi la O'a. Me arwalmu mak Omual olek la yawa re hota rhu'ru-rhelam O'a la lerlalawanni.

¹² Yan tawlari lia ita nnio'oni mak it takottarga la Itmatromlawanni Makdenreri de, it Uplerlawanni de. Hairi-hairi mak kwakrian reria mmiai pia miod miemna-mial memna limtutmi la Uplerlawna, mak it ta'unni-tamta'at de.

¹³ E' ed mak ktewar watia riy maktorna-krautu re wuhurni-tekalli. Uplerlawna Nhi' totpena ray-ray re ra'unni-ramta'ata rhu'ru-rhelam la E'a.