Nhiara 75 - Alkitab bahasa Luang

Uplerlawna ed maka ktoran reria watghudi lokarni

¹ Asaf nhiar ya'ulli-yawedni maka ha rala la mak khi' o'ta la mak kwatunu-kwahniara, totpena rwahniar de rtotnohora nhiara nialoini maka ha rweta la: “Yana mpuaye'era-mpuaniawu”:

² Matroma! O inponmu, pa ma'uli-mawedia O'a. A ralam mamni nahepur toto' memna yoma Omdien rer lia a' on mamni. Me ami e makot nohora O hihi'imu-yapyapmu mak samomuou muemna.

³ Uplerlawna Niwra: “La' ler maka Anieltiaru oleka de, de hota Agetlia plol toto'a la tatiaili pniarni me watghudi lokarni (Agetlia rira lirni-tunnu la plola wawannu).

⁴ Nohkeran di ihini-mniotni honona rdiwdiwra-rdada'ala yoma noha nruru-rai nwo'la. Mere A' nianpena ed maka ktuwnia riri niohora pa ga' ururi-ulaiya noha tirni-ga'arni.

⁵ La'pa riy yatyata-halala mak kpo'ona-kraka de A'ukot la totpena yana herwalia rpo'ona-rakwa.

⁶ A'ukot la totpena hadewa la rhi' inonni de emeknekama riy mak kal oleka arwalli re la yawa. Yana orgahi re rran inonni pa inponni, ne yan raltier die po'ona-peiya.”

⁷ Yoma hota mak kran it la heyanan de edonna nwatiaga tipru onde warta, me hota edonan walia nwatiaga ra'i onde tranna.

⁸ Mere hota la' hade de Uplerlawna nanpena ed maka ketlia hare honona. E' nanpena ed mak kal id pa ndella yawa, ne nal id to'pa natul lia heyanna.

⁹ Orgahi-Orha'a yawenanni de emeknekama lari niemun geni mak kden la E limni ralamni mak kpenpuen lia arak wuwuhura (anggur kras). Uplerlawna ed maka khuria pa riy kaplialiahana la' noha wawannu remni ahorga.

¹⁰ Mere hota a' di de ed mak kakot nohora Orgahi-Orha'a, mak kla' Yakop Uplerlawanni de, hihi'ini-yapyapni me wuatunu-wuahniar nohora kalwiedni-paitiotni pa u'uli-uwed reria.

¹¹ E' ed maka krukit watia riy mak kawuhura re rurni-laini. Ne la'pa riy kalwiedweda re, demade rurni-laini ra'itar rer lia.