Nhiara 74 - Alkitab bahasa Luang

Rpolu-rwak la Uplerlawna yoma arwalli rweyata-rwaniawua Uplerlawna roma kreini.

¹ Asaf nwatutu-nwaye' de nnairia nhiara de niwra: Uplerlawnu ne! Hota Omuolin limmu la am pia nodi liarni?! La'a hya'a nariei pia O' orgahamu Muwenan la O rimormiormu, de pipmu-dummu mak Omuodia?!

² Matroma, orgahamu Mhuoratreria O rimormiormu mak ha Mpualir nian oleka la' ulul genni, de la'a luwu-a'na maka Mpue'er doin oleka la wutwutu-kokuohu, totpena Mhi'a la O gah wamuehemu. Mhuoratreria wo'or Sion maka orgahamu ha Mhi'a la genmu-tienmu.

³ Mmuai pia Mhuapar tek la genmu-tienmu maka klitri-kpurn' olekwa. Yoma la'a hya' mak kden la O roma kreimu nayanni honona, de arwalmu re rwakoha-rwananin momuog olekwa.

⁴ Arwalmu-arwalmu re polpuolu-hawaunia la'a roma krei die ralamni, na'nama rwannia hairi-hairi yahepru lol walli-walli yoma ra'unut nan oleka wa.

⁵ Tamkek la re de emeknekama riy mak kiwra kran la wro'ona pa ketan dodioinia ora-au mak kden la wo'ora.

⁶ Au muaka ha ra'ukir nana la krei die ralamni honona re de rala tniu'tu, wro'ona ra rtu'tu-rdawar mkokoh momuoga.

⁷ Na'nama O roma kreimu de rtutni-rharan mutmutnia, pa rhi akdeha-aktiahlia la gen miaka nhi'inde amsumbain la O'a onnila rtu'tu-rdawar mkokoh momuoga la tani wawannu.

⁸ Hare nnia'ohmani de riwra raru'u-ratowar momuoga a hononami. Ne rtota geni-tien maka nhi'inde amhi'a krei iskol la re pa rtutni-rharan momuoga la'a leta-leta maiya noha-rai mamni di.

⁹ Makwohorulu-ktatrulu dodo'ondi de edon rden olekwa pa ami edon mamkek nan oleka hihi'a-yapyapi mak kamehi-kayona, me la' riy id mana edonna nat niohora hota hadi mowen nianpena mamkek emkade owa'ana.

¹⁰ Uplerlawnu ne! Hota la' mowen nianpena arwalmu re edonna rapolu-raliel O'a?! Hota ha rapolu-raliel O' pa emkadella pa nodi liarni?!

¹¹ Matroma! Hota la'a hya' pede O' edonna Mkilli mat la mai ami?! Nihya'pa Omuolin limmu mai ami?!

¹² La' ler ululu la' pa ntutu-nte'ela lera-mela ri de a Ray mamni O'a. Matromlawnu ne! Re'eni wo'ir oleka, O' ed mak kamori-kalewna am pia.

¹³ Omuala O rurmu-laimu mak ta'enniana ha rtemteman nana pa Muala ma Mpuet era gera-tah'i, ne ma Mpuo'wah'a niy liawan lora re o'tani re.

¹⁴ O' ed mak karu'u-katowar nana niy liawan lora maka ha rweta la Lewiatan pa ma Muala la hamormiori mak khol lia wo'ora-kawru re yamananni.

¹⁵ O' ed mak khi'a ger wawuau re matni pa ropli-rha'a, ne ger wawuau liawna mana, Omuala re pa rkerna-rhau.

¹⁶ O' ed mak khi' nana lelerni nora melmelli na'nama Mtiutga lera genni hanmeni, me wolla genni hanmeni.

¹⁷ O' ed mak ktutga nohkerna-rai miarna tiemni-lyannu, me Mhi'a ler warnu nora otan warwarta-tiptipru.

¹⁸ Matroma Makdenreri O'a, Mhuoratreria la emkameni la arwalmu re rapolu-ralielan nek O wa! La'a hairi mak kakleha kirkira-ralma rior samomuou ed maka kapolu-kaliella O'a.

¹⁹ Yana Muala rimormiormu maka kla' ta'eni-kmai ta'eni re la'a arwalli re limni ralamni. Yan nalo'ona, yana Mhuoratdoinia O rimormiormu re mormiorni-dardiarni mak kler la punyaini-nernerni.

²⁰ Matro'mu! Mhuoratreria nnio' maka orgahamu ha Muno'targa mai ami. Yoma la' meni-meni to'a maka melmelli-kalkalamni de, riy maklekla-makdiaini re rawoka-rale'ga.

²¹ Matroma! Yana Mumkek rer nieka riy maka ha rwatei-rwahapra re totpa rler owa'an la molmola-mama'a. Rwaldioin la de Mhi' totpa riy mak kler la susa ralamni re hota ra'uli-rawedi reria O'a.

²² Mupriri-mukdeda Matroma! Orgahamu mak ketlia O lirmu-tunmu. Yoma la' lera-ler nekpa riy mak kakleha wniarora-wnialai samomuou rwohora-rtatr O'a.

²³ Matroma! Mtia'wa reria tlinmu la'a O arwalmu mak kokokna-rariarni re. Mpuahla nan mak kmalawna O'a re hihi'ini-yapyapni.