Nhiara 73 - Alkitab bahasa Luang

Tahnia'ar to'ola Uplerlawna yoma Nhi' hare honona de nlola plol wawannu

¹ Asaf nhiar ya'ulli-yawedni: Plola! Uplerlawna samounu la E rimormiorni mak ralamni naplele'er la E'a.

² Mere a ih'ru ralmu to'a-taiya, yoma a pesia'yu nhi'pa nmol wua.

³ Yoma a ralmu npahna rer lia riy maka kpo'on lawna, yoma a su'ku tia'ala riy yatyata-halala re rlernana unut la mensiarni ralamni.

⁴ Yoma ir edonna rlernana mehra-mau, ne inonni re rapetan pa nhi'nande rmolmola.

⁵ Edonna rler tar lia susa, pa emeknekama mutu korni.

⁶ La' hade pede po'oni re ral toto' memna, pa nhi'inde rheri-rhewat nek wa pa rmaklekla-rmakdiain la rimormior wialli.

⁷ La' ralma-riorni re de e rwaltiar momuoga yatyata-halala honona la, rmori-rdar lia rna'ohma-rnakat nieka yatyata-halala.

⁸ Rlol meni-meni rapolu-raliella rwohora-rtatra rira, ne la' ir po'oni re pa rawenan la ir rimormior wialli riwra: “Hota ampenan nan miy!”

⁹ Ne rwohora-rtatar neka Uplerlawna-Mempulwatnu mak kden la Ilyamou-Watyatoha, me rapolu-raliella rimormior wialli la nohkerna wawannu.

¹⁰ La' hade pede Uplerlawna rimormiorni mana rhoitio'or la E' pa rlernohor ira, yoma rpesiaya ir lirni-tunnu mak ha rakota re.

¹¹ Ir lirni de riwra Uplerlawna Makdella Tutullu-Lo'oni nek de Naplin niohora hya' ed mak ir rhi'a.

¹² Emkade mamain la'a riy yatyata-halala re nhiolli-lietni, mere emkade ho'mana ir rdella mtiertierannu me re'eni-tniarnu re ra'ititar rerlia.

¹³ A ralmu namehra nande agiwra: “Persum to'ola aghi' a ihru ralmu pa nmou-nwitna. Aghi' a ino'nu pa olieta la do'a-hala ralamni mana persum to'a.”

¹⁴ Yoma lera-ler to' pa alier la kropanni-krieutnu. La'a lera-ler nekpa lera matni npah'a dewade alier niek la yatlorni-yatra'ani yatyatni-halalli.

¹⁵ A'g edon ukot nohora a ralma-rio'ru mak emkade totpa riy ratlin nana de, mere awuarora-wualai emkade la a ralmu to'a. Mere la'pa a'ukot nohora de, emeknekama a'g edonna tiut rieria ralam kalwie'du (setia) la riy mak klernohora O'a, Matroma.

¹⁶ La'pa awuaduran rer miemna totpa a o'tu kriahlu napie'er totpa agat niohora nihya' pede riy yatyatni-halalli re rler nek la samomuounu, mere a tia'eni wuaror nana.

¹⁷ Mere la'pa hohoni dewade alia'a O roma kreimu, na'nama ania'erit nana niukmua maka hota riy yatyatni-halalli re rlernana.

¹⁸ Plola! Matromlawnu Omkenia hare la'a loi-talan mak kwasyoru-kwasye'era, ne Matro'mu, Omuolin limmu la' hare totpena rwasyoru-rwasye'er pa rtuwun gaini rwag onni la mdididanni pa nodia la weran teti tuini kdielma ralamni.

¹⁹ Plinu-plinnianama emeknekama wat lialawan mak ha rwaklol niohora re rutin wenwenna re pa rmol mueman la' noha wawannu.

²⁰ Mormiorni re emeknekama it mi'ini la mel di, pa repar dewade nmol wua. Matroma! La'pa Ommuai pia Mtiulan nan a'u dewade riy yatyatni-halalli re rmol muomuou.

²¹ Plola pa nhi'inde a ralmu namehra rer lia riy yatyatni-halalli re nhi'nande a ihru ralmu emeknekama kokoki-tawta'wa.

²² A'g e puodku-puadku la O gaimu ralamni, Matroma, emeknekama nhiuri-wnia'ana mak kaplinu kwaror nohora hadomdoma.

²³ Mere, la'pa emkade ho'mana adien rer lia O' onmu Matroma. O' ed mak kte'la rer lia a li'mu walli malganna.

²⁴ Pa O' ed maka ktutga talan plollola mai a'u. Ne hota Omhi' a' pua aliernana yatota-yawawa.

²⁵ Hota he' ed maka a ralmu nod rer lia la'a Ilyamou-Watyatoha?! La' nohkeran di la'pa la' Ilyamou-Watyatoha mana, Omueh'a nekpa ed maka a'uhnia'ar rer lia.

²⁶ La'pa emkameni ho'ola a ino'nu nakleha ruri-lai me nhi'wu-nhio'nu orloi-orta'ara, mere la' O' nanpena a ru'ru-la'yu to' O'a. La' hare honona mak kden tiy O' de a gah'u momuoga re pa nodi liarni pa nodi liarni.

²⁷ Plola la'pa he' ed mak kolin doin O la pa nler la walli id to'a, de hota nmat miemna. Yoma hota O' ed maka kuhi-kho'or doin riy mak edonna kden rer lia O' onmu.

²⁸ Mere la' a' di de talman to'ama adien rer tio'ola O onmu. Yoma la' ululu la'pa ntutu-nte'ela lera-mela ri, de a'g e uwniair to'ola O'a, Matrome! Yoma O' ed mak kruwun reri a'u. Ultieri-utian die ukot nohor mamainia hya' maka O Mhi' nana.