Nhiara 72 - Alkitab bahasa Luang

Rsumbain la ray

¹ Rakot nohora Salomo: Matroma! Mpuatutu-mpuaye'a mak kla' ray totpena natu nhudi-npara riy nlola rhi'ina leltiutu-relan mahmera (keadilan). Muala plola-mnehemu la ray a'nu muan die.

² Totpena e netlia Matro'mu upni-a'nani lirni-tunnu, de nlola plollolli. Hota nodniana riy makakleha-kaplara mak kler tar lia klieratni onnila riy rtern ira, yoma nden nek la plola wawannu.

³ Totpena a noha-rai miamni nler la pripanni-fa'anni, me luwu-a'na re rmori-rdar lia plola wawannu.

⁴ Ne awuak de ray de hota nodniana e limni-rorni mak kler la riy yatyata-halala re limni ralamni, de yana namat yat la'a mak kakleha-kaplara onde nolin limni la a'na riyi patyata re maka riy rutni-rdahla.

⁵ Awuak de e ntoran pa nodi liarni la' tuwu-tuwu, pa emekwalima wolla nor lera maka idma nherun to' idla' genni pa nodi liarni.

⁶ Awuak de hota e' emeknekama otan ma ktur lia rai mtatanni, me mak kwaug' eti-lahwa yahnyi' gen miaka kerna-khau.

⁷ Ne la'pa ntorna-nraut de yaweratni nden rer lia rhi'ina-rella, me la'pa limni-rorni mana rler nek la pripanni-fa'anni la'pa nodia pa nhoru.

⁸ Awuak de hota tnioranni-riautnu la'a lodna-hairni de nawnieran la etnu-lioli, ne nanietar la lera ha nha'ata la pa nodia la' lera ha ntuin la' warat matni.

⁹ Me totpena riy mak kholi-klet la' wo'or letna-kawur loini mana rru'u-rtowar la e hairni nayanni, me arwalli re mana ruh' idma-rrama lia'ar la.

¹⁰ Ray-ray no' Tarsis hota ror neka mak kden la noh pa'etu-rai piatatra re mana rmai die rodi miemna-ral memna lima wniowni la. Ne ray-ray no' Arap me Etiopia rmai die rodi miemna ira lima wniowni wali.

¹¹ Ray-ray honona hota rwak pa ruhg' idma-rrama lia'ar la ne rtuk lia e gaini ralamni, me luwu-a'na liawanni rla' at la.

¹² E' ed mak kwe'er doinia riy mak kla' ta'eni-kmai ta'eni la'a riy mak ktern ira, ne nalewan doinia a'na riy patyata mak kwaka tniulan la E'a.

¹³ Nsaynia riy maka kla' ta'eni-kmai ta'enia la'a tiernu-apannu, me nara'a-napalga mak kakleha-kaplara totpa yana rmati.

¹⁴ E' ed mak kolin doin ir la'a wutwutu-kokuohu nor neka nhiopan la'a-nhiopan mai rimormiori re de rakleha siewa. Nhi' emkade yoma nsaynia ira.

¹⁵ Awuak pa mak kla' ray die nmormiori plalahwa. Awuak pa mak kden la Arpa re rmai die rodi miemna-ral memna leli-maha. Ne hota riy rsumbain rer mamain e la'a lera-lera plahwani totpena Uplerlawna Nara'a-napalga.

¹⁶ Awuak de hota la'a metma wetra' lawna mana rtikil wutu-rha'al wutga la leta-leta re honona, ne la' walia wo'ora-kawru honona re de rpenpuen lia wullu-we'elli. Nohanna-taniaratni de emekwalima uhu-dar miak kden la Libanon, me hota lima-rorni re ra'ititar rer lia leta-leta pa emeknekama wewan mak mota-kaulla rai mtatanni.

¹⁷ Me totpena rwetwet reria nanni la' tuwu-tuwu, ne nan kalwiedni de na'itar rer lia pa nodi liarni de emekwalima lera nhit to'owa pa nodi liarni, totpena rimormiori mak kden la noha wawannu mana rwak la Orgahi-Orha'a pa rlernana ra'a-palu pa emekwalia e'a, ne hota riy honona rwet la e' de mak kre'a-mak targa de.

¹⁸ Mmiai pia ta'uli-tawedia Itmatromlawanni Makdenrer die, de Uplerlawna mak kden la tutullu-lolo'oni, maka riy Israel rkola tieru-rawur nehla de, E' ed mak khi' nana-kyap niana hare honona mak it tamkeka de twer reria it wawni de.

¹⁹ Ya'uli-yawedi nden rer lia E nanni mak kden la tutullu-lolo'oni pa nodi liarni. Awuak pa mai noha wawannu di riy honona ramkek nan memna E plolli-mneheni, preheni-mkaini, kalwiedni-paitiotni, hititni-repreparni. Hade emkade naplol toto' memna! (Amin).

²⁰ Emkadella'a Isai a'nani Daud sniumbaini re.