Nhiara 71 - Alkitab bahasa Luang

Riy mak khape'a-khamto'owa nsumbain la Itmatromlawanni

¹ Matroma, O' orgahamu ed mak kruwun reria-ka'ahla reria a'u, yana Muolin doin ir pa rhi' amola-ma' a'u onnila ral olek a lia yawa.

² Mtiulan mai a'u, Matrome! Yoma hihi'imu-yapyapmu rden la plol wawannu. Mutlin reria a polpuo'lu-wakwa'ku pa Muodia a lia gera tlinni-ai aratni.

³ Mhi' a' die emeknekama a'g etla let mak ka'illi-kawatga wa'ura-watmuetma mak nhi'inde aghol lia, yoma O Muet' olek la de hota O' ed maka Mumori-mulewn a'u. O' ed mak karuwnu-ka'ahla rer a'u.

⁴ Uplerlawnu ne! Muolin doin a lia riy yatyata-halala ror wutga riy mak kwuhura-tekla (kejam) re limni ralamni.

⁵ Yoma, la' lerni la adien ma'ta la tuwari-laweru lewatni la'pa ntutu-nte'ela lera-mela ri, de a'g e uwniair to'ola O'a, Matroma. O' de Orgahi-Orha'a Makdenreri O'a.

⁶ O' ed maka kpiara-klakoi a lia'a lerni la a i'nu ntor a lia'a noha wawannu. La' a mormio'ru plahwani di de, agha'ar rer tio' a arnu la O'a. A'u'uli-uwed re'ru.

⁷ La' a mormio'ru-dardia'ru di de a'g emolmolla nhior lawra nora ahwa lioda (contoh). Yoma O' ed mak kukmu-kto'ma rer a'u.

⁸ Lera-lera nekpa awuahaur nohora O prehemu-mkaimu.

⁹ Matroma! La'a lera-mela maka a mortu rwahr olekwa ri de yana Muolin limmu-mpue'er rormu mai a'u, yoma a to'ru ntutu me a' o'nu nwerat wa.

¹⁰ Yoma mak sukni atia'ala mai a'u ri rapupu-raher a'u. La' riy mak kiwra kwunu-kwenn a'u re e rawoka-rale'g olekwa.

¹¹ Honona rwahaur pa riwra: “Uplerlawna Nhoitio'or olek la hade wa, pa mmiai pia tsokra pa ttorna, yoma hota riy id mana edonna ntulan la hade.”

¹² Matroma! Yan olie'tu la mai a'u Uplerlawnu ne! Mmuai pia Mtiulan mai a'u.

¹³ Totpena la'a riy maka kler temna a'u ri de riy ral ir la yawa la' pa rho'or dodioinia momuou wa. La' talan emkade pede riy mak kiwra kod a lia yatyatni-halalli yatlorni-yatra'ani re rler la yahe'i-yamali yapolu-yaliella.

¹⁴ Mere la' a' die, a'g e uhnia'ar to'ola O'a Matroma, ne hota yeher to' pa u'uli-uwedi O'a.

¹⁵ Lera-ler nekpa awuahaur nohora O tulanmu-kniarmu mak kaplola la meni-meni to'a, me la'a O yamori-yalewanmu maka riy edonna ratu rwarekan nana.

¹⁶ Matromlawnu ne! O' ed Makodi plolli! Pede amuai pia wuahaur nohora tulanmu-kniarmu mak kamehi-kayona, karuri-kalai totpena riy ratlin nana. O hihi'imu-yapyapmu mak kaploi-kaple'era rmeh'a er maka a'ukot nohora totpena riy rat niohora.

¹⁷ Matroma! O' ed mak kwatutu-kwaye' nan a lia' adien ma'ta la tuwari-laweru lewatni pa nodi nieka la la'pa dodo'ondi de, de a'g e ultier nohor la'a O tniulanmu-kniarmu wawannu, de riy rwer rer wawni.

¹⁸ Pede apuol lia O'a Matroma, yana Mhuoitio'or la mai a'u, la'pa nodia la a mortu rwahra wa di. Totpena a'ukotkot reria O tnioranmu-riautmu mak karuri-kalai lia'a tuwu pa nodia la' tuwu.

¹⁹ Matroma! Plolmu-mnehemu la'pa rhi'ina-relanmu (keadilan) nkokar la lyanti ne tulla-kniarmu edonna nora rira hanni ramneh wutu.

²⁰ La' emkameni ho'mana O' ed mak kal a' pua lier nek la kropna-krieutu, mere hota O' nekpa ed maka kolin doin a lia hare honona. O' ed mak kamori-kalewna a lia'a hoi-kietra ralamni.

²¹ Ne O' ed mak khi' a' pua na'nu nla' heyanna, me Mhi' a ralmu pa namtiertiernu.

²² Hota a'u'uli-uwedi O' de godia tiwla-prai lioi-nhieka. Yoma Omdien rer lia mai a'u Matroma. O' di de Mak kakleha do'a-hala. Makden Israel rkola tieru-rawur nehla rer lia O'a.

²³ Umuki-uhepur den to'ola a su'ku wa. Pa wuatunu-wuahniara de u'uli-uwedi rer O'a. A godia a ino'nu tetema pa ga wuatunu-wuahniar nohora O'a, yoma la O yamormu-yalewanmu mai a'u.

²⁴ Lera-ler nekpa a'ukot nohora O plolmu-mnehemu lol to' meni-meni yoma la'a riy mak ktot a lia yatyatni-halalli de Mual olek ir la' yawa nhi'nande rmola-rma' oleka wa.