Nhiara 68 - Alkitab bahasa Luang

Nhiara la'a mak ka'unut la ar ralma

¹ Daud nhiar ya'ulli-yawedni maka ha rala la mak khi' o'ta la mak kwatunu-kwahniara:

² Uplerlawna Naprir lia genni-tienni pa Nhi' apie'era arwalli re pa to'a-taiya la' genni-tienni. Me riy maka ralamni rkoil la Uplerlawna de honona ema reirawria la'a E gaini ralamni.

³ Uplerlawna Nhokar doinia re de emeknekama anni nten dioinia ai miokla pa ema rgaidioinia. Tamkek la de emeknekama lilli nmadger la ai ralamni. Emkade wal lia'a riy yatyata-halala rmat mieman la Uplerlawna gaini ralamni.

⁴ Mere la'pa riy maka kden rer lia plol wawannu, de ramuki-rahepur reri la'a Uplerlawna gaini ralamni.

⁵ Mmiai pia twahniar la E gaini ralamni pa ta'uli-tawedia kotni-nanni. Twahi'a-twayodia loi-talan la, yoma E' ed mak kmai die Nha' nana kakam lorlora-anin tentieni. Nanni de Itmatromlawanni Makdenreri. Tahe'i-tahepru pa tloi-tsek la E gaini ralamni.

⁶ Uplerlawna mak kden la'a E genni mak kmou-kwitna ralamni, ed maka khi' Am la a'na riyi patyata, me mak kodniana palpuallu.

⁷ Uplerlawna ed mak kala likti-lara la'a riy maka kmemeh'a, me Nwe'er doinia riy mak kden la roma nhio'la pa rler la pripanni-fa'anni. Mere la'pa riy maka kmalawan la E'a, de hota rmori-rdari lia' nohanna-taniarat maka kerna-khau me kpok lihira-kpok nai.

⁸ Matromlawnu ne! La'a ler maka orgahamu Muodia O rimormiormu re, de Muala pa rlola wo'or letna-kawur loini mak kerkerna.

⁹ Dewade noha nrur diwdiwra-dada'al nande otna ema rhuriernia la'a O gaimu ralamni, yoma O'a, Israel Uplerlawanni mak kaltier lia ir la wo'or Sinai de, Omuai wia.

¹⁰ Omuala ger otanmu de nape'era-napahia noha wawannu, pa na nhernu-nwauga noh marna-rai miaran maka kerna-khau pua kpok lihira-kpok nai.

¹¹ Dewade O rimormiormu er mak kden la tan die. O kalwiedmu de, de Omtiutga la'a riy mak kakleha-kaplara.

¹² Dewade Uplerlawna Nhar lirni pa Nakota Niwra ta'unut nan olekwa, dewade patke'a harahu er maka kodi gota pnio'ona, riwra:

^13-14 “Ray-ray re ror wut nieka mak kodi kekni-rautnu re rawlari momuou wua!” Rawlari pia rlergot de emeknekama lmo'ma wok maka kurna-kiatar la nemnemni pa rla'awa. Ne patke'a mak kmai lia likti-likti re rhakre'era leli-mah maka ha rawlari dodioinia re. La'pa emkameni ho'ola Uplerlawna rimormiorni mak edonna rre' pa ror la yawunu-ya'ara ho'mana, ya'unut lawna ed' olek la' ir limni ralamni wa.

¹⁵ La'pa Uplerlawna Makodi Plolli-ktaryatnu Nalgota ray-ray miak kden la hande, tah'i mutni (salju) ntuin la wo'or Salmon wawannu.

¹⁶ Wo'or Basan mak sapon lawan memna nor wutga uhunu-darni mak harahu!

¹⁷ Mere nihya' pede wo'ora Basan nor wutga uhunu-darni re rkillia mai handi la wo'or Sion, de gaini re rpetan reri? Yanpa rwarora de Uplerlawna Nwalir niana wo'or Sion pa Nhol lia? Plola yoma la' wo'or Sion de ed maka Itmatromlawanni Makdenreri E'a, de Nhol lia pa nodi liarni.

¹⁸ Orgahi-Orha'a Nwatiawua Sinai pa Nmai lia genni maka kmou-kwitna. Uplerlawna Nmai die Nodia karetni riwnu-halli.

¹⁹ Matroma, O Mhua'at la gen tutullu. Riy mutliawan mak ha Mtioran nana re mana Muodi momuoga re. Mhuoi limmu pa Mua'ala himima-rere' maka rimormiori meni ha nala la O'a, reriehenu walia la riy mak nhi'inde kmalawan la O'a ral walia himima-rere'a, totpa hota ror owa'an O'a rhol wiut lia hande. Riwra rora Uplerlawna Makdenrer die rdella' gen ida.

^20-21 Ta'uli-tawedia Itmatromlawanni, Makdenrer die, yoma E' de Uplerlawna mak kamori-kalewna inhatte, me lelera-melmela Entulan la ita yoma E 'ed maka ktutulu-klelewua hya' ed mak khi' awert ita. It Uplerlawanni de E' nekpa Orgahi-Orha'a inhatta maka kamori-kalewna it la'a matmiati-molmuolu ralamni.

²² Uplerlawna arwalli re moratnu plahwa ne rmormior lia do'a-hala ralamni. Mere Uplerlawna ed maka hota karu'u-katowra arwalli re honona.

²³ Orgahi-Orha'a Niwra: “Arwa'lu mak kawlari oleka re hota Agodia honona re rwatiaga Basan pa rmai wia, la'pa mak kade'a la'a hletna wikwikni mana godi wialia.

²⁴ Totpena mtiutga de murehi la ara, de hononmi miala rarni rella ma miohma lakmi kdeheni, ne ahu-ahu re rram kerkerna arwalmi rarni.”

²⁵ Hota riy honona rlina-rmata mak klidan nohor O'a, yoma la' O unatmu la ar ralma, Matroma, A Uplerlawnu nek O'a, a Ra'yu nek O'a pa rlidna-rtaur nohoru pa rla' roma kreimu.

²⁶ Mak kwatunu-kwahniara rden la lidna gaini, pat harara rlernohor reria rodia tiwla-prai me mak kodi hitara-fiola de rlola li'irnu. Nhiarni lirni lie'erni de emkadille:

²⁷ “Ya'uli-yawedi la Uplerlawna la' mutu letgara. Yakopa (Israel) duratni-waitni di'nani-lohorni mi'uli-miwedi reria Itmatromlawanni, Makdenrer die.”

²⁸ La'a Benyamina duratni-waitni mak doma rmeh'a, de rden la lidna gaini, ne Yehuda duratni-waitni mak kla' o'ta-mata lidanni plahwa. Sebulon nora Naftali amni-yeini rlernohor reria.

²⁹ Uplerlawnu ne! Mtiutga rurmu-laimu totpena rira ramkek memna, emeka Omtiutg oleka la' ler maka Omtiulan-msiayn olek am pia.

³⁰ Ray-ray honona hota rodia limtutnu-lakga'ani la O'a de rkenia la O roma kreimu mak kden la Yerusalem.

³¹ Matroma! Hota Muwenan la Mesir. Mesir de emolmolan nekama ohpora-ahdiawra nwuw tiar lia'a gelagah ruwannu ralamni. Mpuolliohora noha-rai dom mak emolmolan nekama hayori-orpau ordududlu re rora upni-a'nani mak kwatei-kwahapar pa rlernana maha wawahra. Uplerlawna ed maka hota kwahakr' apie'era noha-rai mak sukni la yawunu-ya'ara.

³² Ne hota o'ta-mat lalawna mak kwatiaga Mesir pa rmai die rodi miemna-ral memna pi'ra-tnieri (tembaga), me riy Etiopia rwakdieh'a pa rmai die rodia himimni-rere'eni la Uplerlawna.

³³ Ray-ray miy re! Mior wutga lupmi-a'nami mpiatunu-mpiahniar la Uplerlawna. Miy hononmi mi'uli-miwedi reria Orgahi-Orha'a.

³⁴ Yoma E' ed mak kla'-kmai lia lyanit tutulu maka Ena'ohi-na'ara la ler ululu memna. Mitlina Uplerlawna lirni. Lirni nhokar la lyanit marna de wniahlani nadiwra noha-rai wawannu.

³⁵ Takot nohora Uplerlawna rurni-laini totpena riy rat niohor memna. E' ed mak kodi plolli la Israel wawannu. Ne tamkek memna plolli-mneheni la lyanit marna.

³⁶ Uplerlawnu ne! Amamkek Omliergot la genmu-tienmu de, ma'unni-mamta'at O'a yoma O' ed maka kamehi-kayona! Israel Uplerlawanni O'a! O ed mak kala plolmu-mnehemu rurmu-laimu la O rimormiormu. Mmiai pia ta'uli-tawedi tsu'ru-tselam la Uplerlawna-Mempulwatnu la tutullu-lolo'oni!