Nhiara 65 - Alkitab bahasa Luang

Ra'uli-rawedia Uplerlawna onnila hihi'ini-yapyapni

¹ Daud nhiar ya'ulli-yawedni maka ha rala la mak khi' o'ta la mak kwatunu-kwahniara:

² Matroma! Lol talanni pa am di de mak kden la Sion ma'uli-mawedi O'a, ne am miana mhoratreria a nnio' mamni la O'a.

^3-4 O' nanpena ed mak kreiniana-ka'nana a sniumbain mamni pede riy la' meni-meni to'a maka kler olek la do'a-hala ralamni rma rkola tieru-rawur nehla tiy O'a. A do'a-hal mamni wert oleka la mai ami wa. Mere O' ed mak kamou-kawitna a do'a-hal mamni.

⁵ La'a riy mak ha Mpualir niana re pa rmai lia roma kreimu de rler nek la kalwiedwedni! Hota la' honon am di de mlernana ralam tiertiernu la' O rommu mak Omdiella de, mak kpenpuen lia mounu-witanni.

⁶ Omrieiniana-mua'nan a polpuol mamni-wakwak mamni pa Mual am pia mler la yamori-yalewna. Omhi' neka haneka-harahu wawannu mak kamehi-kayona, pa ma Mumori-mulewn ami. O' ed maka riy honona mak kwatiawua hairi-hairi nor wutga noh pa'etu-rai piatatra re rawniair la O'a.

⁷ Omual O rurmu-lai wamuehemu pa mua Muriri-mukdeda wo'or lalawna re honona, totpena riy rat niohora O prehemu-mkaimu.

⁸ O' ed mak kayer limmu de yo'or tutulu de mana ema rhai wadidnia la'a hletan lawna ne la'a kniokna-riarnia la lodna-hairi la'a noha wawannu mana O' ed maka kpolliohora de mtie'el taruma.

⁹ Mak kmori-kdar lia meni-meni to'a ra'unni-ramta'at nande honona re rtuk pua rru'u-rtowar rer lia O gaimu ralamni, yoma ramkek memna la matni la'a hihi'imu-yapyapmu. Makden la nohkerna uhunu-ewatni ewatni-lahwani ramkek nande rahepuepru pa ra'uli-rawedia O'a.

¹⁰ Tani miak kden la noha wawannu de Orgahamu Mutiak kalwiedweda, pa Muala otna pa ma Mupe'era-mupah'ia totpena npoti-nkaduw nohora yawulli-yatniamni. Ne la'pa ger wawau liawna mana rwag'eti lahwa la elwa-elwa re honona. Me la' walia awrieha nora gandum wetra' lawna mana lol meni-meni to' pa rtikil wutu-rha'al wutga.

¹¹ O' ed mak kalgota gera pa nwau liola elwa klihira la tan miaka kpoklihira-kpoknai, pa otna ntur pua napahia ne ortawi-autiawi mana rpoti-rkaduw la.

¹² Yoma O kalwiedmu la wolla-wolla, anni-anni pa nte'ela wolanni dewade rieiki-wnio'ora lol meni-meni to'owa. Pede Omliol meni-meni to' de noha yehi-yawra la'a ya'ana-yemnu.

¹³ La'a noha-rai mtatna, de nhiuri-wnia'ana pipi-duma, keledai nanie'er la, me wo'ora-kawru re de polpuolu-hawuaun nohora yahe'i-yaheparnu.

¹⁴ La'a wewan mota plahwani la'a rai mtatanni de duma nanie'era mniniha, ne la'a wo'ora-kawru re ho'mana metma wetra' lawna npupun nan momuoga re. Honona re ramuki-rahepur nohora wniatunu-wniahniara lol etnu-liolli.