Nhiara 61 - Alkitab bahasa Luang

Rsumbain pa rwaka tniulan la Uplerlawna

¹ Daud nhiarni maka ha rala la mak khi'a o'ta la mak kwatunu-kwahniara. Rwahniar de rnairia hitara-fiola:

² Uplerlawnu ne! Mutlin reri a polpuo'lu-wakwa'ku la O'a. Mutail reria a sniumbainu.

³ La'pa oliet a lia a noha-ra'yu de apuolu-wuak la O'a, yoma aruple'a nal a'u. Muodi a lia ili-watu mak ktutulu totpena kruwun reri a'u.

⁴ Yoma O' ed mak kruwun reri-khepun reri a' pua arwa'lu re ta'enniana rawo'la a'u.

⁵ Muodi a' pua dien rer niek la'a O roma kreimu totpa Mriuwun reri-mu'ahla reri a lia O liwarmu nayanni.

⁶ Yoma orgahamu Mutlin oleka la'a hya' maka a'g e niel tiarga Matroma! Me Mual a' pua aliernan walia la' hya' mak Omhi'targa la riy mak ka'unni-kamta'at O'a.

⁷ Ampakwak tiy O'a totpena ray nholi aplahwa la nohkeran di wawannu totpena nodia tuwu la' tuwu.

⁸ Ampak pa e nodi plolli pa nodi liarni emeka ray miaka ha Mpualir niana Matroma. Mriuwun reria de Muala sniayanmu me Mdien rer lia onni.

⁹ Ne hota la a' die de gala nhiara ya'uli-yawedi pa wuatunu-wuahniara la O'a. Totpena la' lera-ler nekpa hota agala tiy O'a hare honona maka ukottar oleka re.