Nhiara 60 - Alkitab bahasa Luang

Rsumbain pa rwaka Uplerlawna Nal arwalli re la' yawa

¹ Daud nhiarni maka ha rala la mak khi' o'tani la mak kwatunu-kwahniara. Rwahniar de rtotnohora nhiar bunga bakung maktutrier niohora (kesaksian). Hadi de Daud sniumbaini la wniatunu-wniahniarni mak nhi'inde rnairi totpa rwatutu-rwaye'a.

² Me nhiar di nakot nohora la' ler maka Daud nora mak kden Aram Mesopotamia me riy Aram-Soba ra'ara. La' ler de Yoab nawal wia ne nala riy Edom riy riwnu termida wehrani wor lia yawa la' genia Lembah Asin:

³ Uplerlawnu ne! O' ed mak kwayotlia ami Matroma! Ne Omuolin doinia am pia riy ral am lia yawa, yoma Omuwenna mai ami. Mere la' dodo'on di de am mpak pa mua Mtiuwu-mhuai nian owa'an ami.

⁴ Matroma, Mdiok oleka nohkeran di totpena ema rweta, pede ampak pa Muktem owa'ana noha pokni-pah'ani re, yoma la'a upkarururu enienni.

⁵ O Muolin doini oleka rimormiormu ami pa amler la kropna-krieutu werwerta pede am emeknekama riy mak kma'wu ktuwun gaini-kler onni la watgau ralamni.

⁶ O' ed mak kwagahniorta riy mak ka'unni-kamta'at O'a, totpena amlewan la arwal mamni mak kodi tera-ra'pa.

⁷ Matroma! Mumori-mulewna am lia'a O rurmu-laimu. Mpuahla nana a wakwak mamni totpena la' rimormior miaka Omtiulla-msiayni ri amler la mormiori-lewlewna.

⁸ Uplerlawnu ne! Omdien nek la genia mounu-witanni pa orgahamu Mhuar lirmu pa Mukot oleka Miwra: “Yoma Urehi olek la ar ralma de hota Agala geni-tiena Sikhem nohananni-taniaratni me lembah Sukot la A rimormio'ru.

⁹ Noha Gilead nora Manasye de A tieman reria. Noha Efraim de emeknekama karpusa pi'ra-tnieri mai A'u, ne la' noha-rai Yehuda de A lie'enu la'a A lodnu-hairu.

¹⁰ Mere Moab nohoni-raini de A niohma lak ge'nu. Ne hota Ariarni-riarin nohora A'unut nana Filistea. Ne la' Edom de Aghopil targa A la'ku wniowni la' hande, de emekwalima A gah'u hade.”

¹¹ Pede dodo'on di a'utiana O'a Matrome! Hota Omuor a' tialla pa itla' Edom me edonna? Hota O' ed mak kalakr a lia'a let maka arwali yaro'wa genni dena?!”

¹² Uplerlawnu ne! Omukottar oleka hota Omual a' arwal miamni la' yawa! Nihya' pede la' dodo'ondi de O' edonna Muor am talla?! Hota O' edonna Mpuer nohora makodi keki-rautu mamni rena?!

¹³ Matrome! Mtiulan pa Mdieh'a reria arwali mamni re, yoma hota ampaka tniulan la rimormiori de hota edonna nodia hadom mai ami.

¹⁴ Mere amora Uplerlawna O'a de hota a hair mamni nawnianin pa nodi liarni. O' ed mak kala a arwal mamni la yawa.