Nhiara 6 - Alkitab bahasa Luang

Rsumbain la Itmatromlawanni Makdenrer die, la' ler mak rler la susa ralamni

¹ Hadi de Daud nhiar ya'ulli-yawedni maka ha rala la mak khi' o'tani la mak kwatunu-kwahniara. Rwatunu-rwahniara rnairi hitara-fiola. Rwahniar de rlernohora mak ha riwra mak kla' wo'awa:

² Matroma Makdenreri O'a! Yana Mukmua a lia'a O yawenan lawanmu di ralamni. Yana Mliwra-mkaklia a lia'a O hankeranmu di.

³ Msiayni a'u Matroma yoma a ru'ru-la'yu rhorwua. Mual a' pua ururi-ulai yoma amuahwenn olek a wua. Mhi' a' pua hota a kalwied owa'ana.

⁴ A ralmu nmolu-nhelma olekwa. Hota la lera wo'ir owa'ana Omultarg a'u pa a'g emkadi Matrome?!

⁵ Mpualdioinia pa Mua Munawar doinia a lia, Matroma. Mulewn a'u yoma la'a O sniayanmu mak kodi liarni de.

⁶ Yoma hota la'a noh mati-rai miol die hota edon rakot nohor owa'an O hihi'imu-yapyapmu re, de la riy id mana hota edonna na'uli-nawedi olek O la' hande.

⁷ Amuahwenn a'u, yoma a'g e puolu-wuak tiy O la' lelera-melmela, de a lu'yu ntuin la a le'wu wawannu.

⁸ Onnila a arwa'lu re, pede akoko'a-kiakakur nande a ma'tu ramehra me ta'enniana ramkek samomuou.

⁹ Itmatromlawanni Makdenrer die, Natlin nan oleka a puolpuo'lu-wakwa'ku, pede la' dodo'ondi de mak khi' yatyata-halal miy re, rhawlakarmi la hande looo!

¹⁰ A polpuo'lu-wakwa'ku, de Itmatromlawanni Nreilili-na'mamuau wua.

¹¹ Hota a arwa'lu honona re rheduma ne rmola-rma' nande rrei lia li'iru pa rmeh'a rahihi'a.