Nhiara 58 - Alkitab bahasa Luang

Sniumbain maka ra rwaka wniahla la riy yatyata-halala

¹ Daud kieheni-nhiarni maka ha rala la mak khi' o'tani la mak kwatunu-kwahniara, totpena rwahniar de rtotnohora nhiara nialoini maka ha rweta la: “Yana mpuaye'era-mpuaniawu”. Daud sniumbaini:

² Hoi! Rimormior mak kodi plolli miy, de yawerta-yatailmi re, e rlol talla me edonna?!

³ Miy mpiarora-mpialaiya yatyatni-halalalli, me mhi'a iwra-wo'ora la'a noha-rai di.

⁴ Mere la' riy yatyata-halala re rler olek la klieratni wa la inni apannu ralamni memna. La'pa rtor doinia la nohkerna wawannu, de rahle'et nan oleka putra-palka.

⁵ Namni re rwalawar de emeknekama niy miaka namni khena. Me rtotpa rhodal tlinni de

⁶ emeknekama niy liawan mak ktotpa nhatilu totpena hota edonna nhe'du nana riy mak kamaru niy lirni.

⁷ Uplerlawnu ne! Makdenreri O' e! Mlio'wa dodioinia ohpora-ahdiawra trapriapi re nihini no' gai rieranni.

⁸ Rolin doinia re pa rmati-rmolu pa emeknekama gera mak kodaw doin la, me ra'p'ih miaka tutnu pokpokna.

⁹ Rolin doinia la de emolmolla kuliawan maka ihini kawdiadia'i to'a. Me emekwalima papay miaka inni nakur dioin targa la.

¹⁰ La'pa edonna rler ma'ta la hamto'oni-hape'eni lerni dewade plinu-plinnianamde rler olek la matmiati-molmuolu ralamni. Me edonna npa'ei-npahal la'a ruwnu-penta maka kmota-kawul ma'ta, mere anin lawna nten diodioinia de emeknek targ' ho'ama wewan kerna nora purni makamnu.

¹¹ Tkillia de riy yatyata-halala re rlernana niukum lawna, mere riy makden la plol wawannu re niniha-malmialia, ne rohma lakni la'a riy yatyata re rarni mak ha rawoh'a nana.

¹² Ne hota riy riwra: “Plola! Riy kalwiedweda re rlernana wniahlani la Itmatromlawanni, yoma Uplerlawna ed maka kawerta-katailia noh di wawannu.”