Nhiara 56 - Alkitab bahasa Luang

Rler la susa ralamni mere rha'ara aranni la'a Uplerlawna

¹ Daud kieheni-nhiarni maka ha rala la mak khi' o'tani la mak kwatunu-kwahniara. Nhiar di rtotnohora nhiara lmo'ma maru mak ktilu-kwakla (moumou) mak kwatiaga noh olietleta. Nhiar di nakot nohora la' lerni la riy Filistina rtorna Daud la' Gat. Daud sniumbaini:

² Uplerlawnu ne! Mtiulla-msiayn nan a'g e! Yoma riy riwra rte'la la a wua. Arwa'lu re rutni-rdahla a' pua nodi liarni.

³ Lelera-melmel de rwatei-rwahapr a' pua nodi liarni. Rira liawanni rhi' a lia la arwalli. O' ed Makdella Tutullu-Lolo'oni

⁴ La'pa a'umta'ata agha'ar nek a ralmu la O'a, Matroma.

⁵ A'u'uli-uwedia Uplerlawna yoma E' ed mak kano' hota Namori-nalewan nan a'u. La'pa apuesiaya dewade leretniekla a yamta'atu nmol wua. Rimormiori id mana edonna naruri nian a'u.

⁶ Lelera-melmel de arwa'lu re rla' lir id pa rhi' yatyatni mai a'u, totpa rodi a lia kropna-krieutu.

⁷ Nhi'inde rawok tar lia'a ir yade' genni ne rwuw lia'a-mai nieka a wniehwu, totpena rlernan talan pa rwehwa doin a lia.

⁸ Matromlawnu ne! Mukmua re! Yana rler la yamori-yalewna, yoma yatyatni-halalli re. Mual ir la yawa, yoma ir nhiolli-lietni yatyatni-halalli mak kod O la' yawunu-yawenna.

⁹ Matroma! O' ed mak kwarekrekan nohora kropna-krieutu mehra-ma'u maka aliernan de, me O muat niohor walia a koko'u-here'ru liawanni. Omtiulsi olek hare honona la puka id ralamni.

¹⁰ La'awa ler mak apuol lia O' dewade arwa'lu re rrei lia li'iru pa rawlar wia. Pede agat niohora de O' ed mak kher lia mai a'u.

¹¹ A'g ed mak ka'uli-kawed reria O'a, Orgahi-Orha'a Uplerlawna-Mempulwatnu Makdenreri O'a, yoma O nnio'omu re.

¹² A pesia'yu la O'a, pede a'g edonna umta'ata, yoma la rimormiori id mana edonna naruri nian a'u.

¹³ Hota a'g edonna ghortaplinga hya' mak a'ukottarga la O'a Matroma, ne leretniekla godia nhioi-tniani pa a'u'uli-uwedi O'a.

¹⁴ Yoma O' ed mak kamori-kalewn a lia'a matmiati-molmuolu. O' ed mak katiak a' pua edonna tiuini-diai, la' hade pede amuormiori lia O limmu ralamni mak kodia rimormiori la lelerni.