Nhiara 55 - Alkitab bahasa Luang

Nsumbain pa nwaka Uplerlawna Nruwun reri e'a la'a arwalli re hihi'ini-yapyapni

¹ Daud kieheni-nhiarni maka ha rala la mak khi' o'tani la mak kwatunu-kwahniara pa rwahniar de rnairia hitara-fiola tnietni. Daud sniumbaini:

² Uplerlawnu ne! Mhueri tlinmu mai a polpuo'lu. Matrome! Yana Mhuoitio'or la a sniumbainu.

³ Mlin reri-muat rer a'u, me Mpuahla nana a li'ru. Yoma a'uwniaye'era onnila a su'su lawan rehia.

⁴ A ih'ru-ralmu to'a-taiya, yoma arwa'lu re riwra hota rhi' yatyatni-halalli mai a'u. Alier meman la riy yatyata re nniutanni-dniahlani. Ir rhi'a sus a'u, ne rodia hankerna-ralmha'arni re pa ra rtota-rwudi a'u.

⁵ A ralmu emeknekama ha wnieyata. Awuarora de emeknekama a'g e muatiti'ir la umkek reria a matmia'tu onni.

⁶ Aliol to' meni-meni de adiwdiwar la yamta'ata, me la' walia ino'nu emeknekama nmatrutni.

⁷ Ah! La'pa atiaru liwra pa emeknekama ma'nu lmo'ma mana aniem olek pa uhaka gen miaka atiai tiar lia.

⁸ Neh! La' kalwiedwedni de aniem olietlet meman pa lia gholi-liet la wo'orletna-kawurloini.

⁹ Alia'a pleta-plet pa uhak neka gen pia ghollia, totpena uyaheu lia me'eta-anni.

^10-12 Matrom e! Muala arwa'lu re pa rhakomu-rhakam lia genni. Muala re pa idma edonna natlina-natailla ida. Yoma, Matroma, la' leta ralamni de umkek nan memna rhi' yatyatni-halalli. Ir ralamni rapal niana pudi-akla ohpa-lahara. Lelera-melmel de rlol neka meni-meni pa rhi' kokokna-rariarni. Ne la' meni-meni nekpa rweyata-rwaniaga rira genni-tienni pa rhi'a yahuri-yawo'ora, matmera-wulkgaulu, wniarui-wniate'la la' ya'olu-yala' geni.

¹³ Yanhi'pa arwa'lu ed maka khi'a mola-ma' a'u, de a'utekal pa adien nek la a ge'nu, la'pa riwra mak ktutri a'u ed maka krurui-kpirpir a'u, de uhak talan pa ude'a-umoin a ino'nu pa yan namkek a'u.

¹⁴ Mere mak khi' a'u de, a mutwua'lu hade, de riy mak nhi'inde a gora mhi' kalwiedweda. E' ed maka kwaldioinia pa kapolu-kaliel a'u, me mak klokra-khaut a'u.

¹⁵ La' ululu de amawok pa mpaloi wiutu, ne amla' wutga la Uplerlawna roma kreini.

¹⁶ Pede awuakwak pa Uplerlawnu Nolin doinia arwa'lu re pa plinu-plin niekama rtuwun du'urnu-rhokal gaini pa rmati, Nolin doinia la'pa rler rerun la noh mati-rai miolu. Yoma lera-ler nekpa yata-hala e rpenpuen lia'a ir romni ralamni.

¹⁷ Mere apuol lia Itmatromlawanni Makdenreri E'a, totpa hota E' ed mak kamori-kalewn a'u.

¹⁸ Lelera-melmel de alului-nurnuhrg' a'u, ne a li'ru de e Natlin reria.

¹⁹ Pa E' ed mak kamori-kalewn a lia'a arwa'lu mak kmaryohmu pa riwra rwenna a'u.

²⁰ Uplerlawna mak kodi plolli la'a ulul genni ma'ta la'pa nodi liarni ed maka katlin la mai a' pua Nal ir la yawa. Yoma ir ra'o'ta watu pa rahmena rhopliala nhiolli-liet yatyatni, ne rakleha ya'unni-yamta'at la E'a.

²¹ Maka nhi'inde agora mhi' kalwiedwed de nler temna mutwualli am pia nora ami mawdiordorin la yawunu-yawenna. La'a hya' maka ha nwakonis targ' oleka de, de edonna nala la rekna-waiti.

²² Nhar lirni de mnapla me nmalui-nmahera, mere ralamni de yata. Wniahaurnu de samoga mere emeknekama wehla ara ploklokra.

²³ Muotil neka maluimu-mahermu rella'a Itmatromlawanni Makdenrer die, yoma hota E' ed mak hota ktulan la o'a. Yoma la'a riy mak kden la plola wawannu de hota E' edonna Nollia pa riy rhi' hakomu-hakamua.

²⁴ Mere O'a Matromlawnu ne! Hota O' ed maka khoplia ir la hu'ula-liena kdieldelma. Ir er maka ka'ohpa-kalahara me ktowria riy rarni, de mormiorni edonna rletargar wali ne ha matia. Mere a' di de pesia'yu Matroma.