Nhiara 52 - Alkitab bahasa Luang

Riy mak khi' yatyatni-halalli la rimormior wialli hota rlernana Uplerlawna niukamnu

¹ Hadi de Daud kieheni-nhiarni maka ha rala la mak khi' o'tani la mak kwatunu-kwahniara. La' nhiar di Daud nsumbaini

² pa nakot nohora riy id nanni Doeg, makden Edom de, nma nodia kot la Saul niwra Daud nte' olek la'a Abimelek romni nayanni wa:

³ Hoi, riy metam keranni ee! Hya'a nariei piede mpuo'on nohora yatmu-halmu maka mhi'a la riy maka la' lera-ler nekpa Uplerlawna Ntulla-nsayn reri rena?

⁴ La'a mormiormu plahwani, de mnia'ohma yatyatni-halalli. Mpuahak neka pudi-akla klili-kdiori. Nammu emeknekama ta'wa nierta mak ka'ana to'orni-gaini.

⁵ O sukmu matmiat lia yatyatni-halalli, ne o ralammu edonna nod lia kalwiedwedni. Sukmu toto'ola muodia nuru lalahara, ne o nurmu edon netia nheik nana lira plollola kuku' et miemna.

⁶ La'a lira-tun muaka ha mukota re, de kdiori-kdeh momuoga re. Suksukmu de totpena mnia'ohma riy yatyatni-halalli yatlorni-yatra'ani.

⁷ Mere la o' di de hota Uplerlawna Nwau watia o du'urmu la' tani kierna wawannu. Hota rtornu la'a o rommu nayanni, pa rnunia o la'a matmiati ralamni.

⁸ Riy makden la plol wawannu la' Uplerlawna yamkekni hota rlin nana-rmat nana pa rheduma. Ne hota ira kaniha-kamal lia pa riwra:

⁹ “Elekde! Edon nhi' Uplerlawna la e kruwun genni, mere eneknek to'ola nha'ara mormiorni la re'eni-tniar mutliawanni me hihi'ini-yapyapni mak kweyata-kwaniawu e rimormior wialli.”

¹⁰ Mere la a' di de emeknekama kmir ona-wa'du ona (pohon saitun) mak kmota-kaul ma'ta, pa adien rer lia'a Uplerlawna romni nayanni. Apuesiaya, de hota Uplerlawna ed mak ktulla-ksayn reri a'u pa nodi liarni.

¹¹ Matroma! A'u'uli-uwed reri O'a pa nodi liarni onnila hare honona maka Omhi' nan oleka re. Me la'a O rimormiormu rawoka-rale' tiarga la' hanmeni de hota awuahaur nohora O kalwiedmu-paitiotmu de.