Nhiara 51 - Alkitab bahasa Luang

Rsumbain pa rwak Uplerlawna totpena Namou-nawitna do'oni-halli

¹ Daud ya'ulli-yawedni maka ha rala la mak khi' o'tani la mak kwatunu-kwahniara.

² Daud nwahniar nohora la' ler meni makwohorulu-ktatrulu Natan npolliohor e'a, yoma nora Batsyeba raliai:

³ Uplerlawnu ne! Mtiulla-msiayn a'g e! Yoma O' de, sniayni onni etla O'a. Mtiulan la a' pua Mhuo'a-mhuai dioinia a do'u-ha'lu maka aghi'a-yap niana.

⁴ Mkuhi-mhuo'or doinia a do'u-ha'lu rella, totpena amuou-witan la honona.

⁵ Yoma orgah'u gatga de alier olek la do'a-hala ralamni. Do'a-ha'lu re, de aghoratreria re.

⁶ Matromlawnu ne! Omueh'a ed maka aghi'a do'a-hal la! Ne aghi'a-yapia hya' mak edonna kla'nana O ralammu. La' hade pede la'pa Mukmua a' die hya'a maka Omukota de nden rer lia plol wawna. Ne hota Omuplola la'a nhiudi-pniara.

⁷ Plola la a ya'tu-ha'lu, de agodia la' lera a i'nu ntor doini a lia noha wawannu, ne aliernana memna do'a-hala la i'nu apannu ralamni.

⁸ Mere maka ha Mpuahaka de ralma ploi-ple'era. Matroma! Muala kirkira-ralma riormu samomuounu ma mdieh'a nana a ihru-ralmu.

⁹ Mumou-muwitn a'u, totpena amuou-witna. Amuou-witan pa emeknekama mou-witan mak wahrani rehia ahwa wawahra.

¹⁰ Mual a' pua lier la muki-hepru totpena a ralmu maka Omhi' pa nmawaldoin la de nawali owa'an la muki-hepru.

¹¹ Matroma, Mhuap dioinia do'a-ha'lu re honona me Mhuoratdoinia la!

¹² Orgahamu Mual a' pua a ralma-rio'ru rden la ploini-ple'erni, Matroma. Mual a' pua liernana ralma-rior warwuaru totpena agala a ru'ru-la'yu ih'ru-ralmu honona pa aliernohor reri O'a.

¹³ Yana Mhuoitio'or la mai a'u Matroma! Ne yana orgahamu Mmua' owa'an la nhiwmu-nhionmu mak kmou-kwitan della mai a'u.

¹⁴ Mhi' a' pua lier owa'an la muki-hepru yoma Omumori-mulewn a'u, ne Mhi' a pua awualeran meman pa aliernoho'ru,

¹⁵ totpena a' muana wuatut walia O yala'amu la'a riy mak kden la do'a-hala ralamni, totpena ir mana rawali owa'an la O'a.

¹⁶ Uplerlawnu ne, Mulewna a lia'a matmiati ralamni, yoma O' nanpena ed maka kamori-kalewna rimormiori, ne hota awuahniar pia wuahaur nohor O hihi'imu-yapyapmu re, agodia ralma hepuepru.

¹⁷ Matroma, Mtiulan mai a'u totpena ultier die u'uli-uwed reri O'a.

¹⁸ O' edonna Mrieiniana-mua'nana hoihoi-tantiani maka ha rtunu-rharna la'pa hoihoi-tantiani korni re. Yoma la'pa Omrieiniana re de hota agala tiy O'a.

¹⁹ Mere hoihoi-tantiani maka Omrieiniana de, de riy mak ihranu ralamni nmawaldoin la onnila e do'oni-halli, ne nwaldioinia pa natu nhu'ru-nhelam la O lirmu-tunmu.

²⁰ Matromlawnu ne! Orgahamu Mtiutga kalwiedmu la' Sion, de Yerusalem letni de, pa Murir owa'ana ili-watmu la' hande.

²¹ Totpena orgahamu Mrieiniana-mua'nan owa'ana hoihoi-tantiani mak kaplola, mak kla' nana O ralammu. De hoihoi-tantiani mak ha rtunu-rnahua, emeka nhiuri-wnia'ana sapi muanu mak ha riwra rtunu-rharna la katri'ana wawannu.