Nhiara 50 - Alkitab bahasa Luang

Kniola tieru-niawur nehla mak kaplola la Uplerlawna de, totpena ita'uli-tawedia E'a

¹ Nhiar ya'uli-yawedi la wniatunu-wniahniara maka Asaf nwatutu-nwaye'a: Orgahi-Orha'a Uplerlawna Makodi Plolli la Haneknek Wawannu Nhar lirni. E Npol lia mak kden la noheri woru-lyanti nayanni. Lirni nkukur la tipru warta-ra'i tranna.

² La' Sion let mak samomuou memna de mak kamrehi-kamda'ar nohora hititni-repreparni, yoma Uplerlawna Nden la hande.

³ It Uplerlawanni edonna Nriw limni me Nanin matni mere Nmai totpa Nawerta-nataili rimormiorni. Uplerlawna Nmai die ai lomlomar pa nram lol pa nala'ulga E'a, ne kakmoran lawna nawloi-nawga' pa nle'lu reria.

⁴ Uplerlawna Nhar lirni la lyanti nora noh marna, totpena ramkek nan memna E Nawerta-natailia E rimormiorni lola plola-mneha wawannu.

⁵ Nhar lirni pa Niwra: “Miwoka-mile'u momuoga A rimormio'ru re honona, mak klernohora A li'ru-tu'nu. Ir er mak Agora rpa mkohg' oleka lima la' ler maka amrotna nhiuri-wnia'ana la katri'ana wawannu.”

⁶ Lyanti nakot nohor walia Uplerlawna Nnairi rhi'ina leltiutu-relan mahmera pa ma Nhudi-npara riy (Nhudi-npara la plol wawna). Yoma hota Enmemeh'a ed mak kawerta-katailia rimormiori.

⁷ “Mitlina! A'ultier lia A rimormio'ru miy. Hoi! Israel miy! Agiwra tiutrier niohor la miy. A' di de Uplerlawna maka mkiola tieru-miawur nehla la de.

⁸ A'g edonna goi reri miy onnila nhioi-tniani maka ha rtunu-rharna la katri'ana wawannu onde nhioi-tniani korni maka miala mai A'u. Mak ha miala mai A'u re, de erla genni pa umkek reria.

⁹ A'g edonna muahlie'wa miy hayormi mak kden la tnioran geni re, onde miy pipmi-dummi mak kmaryohmu la'a nhiur geni.

^10-11 Yoma nhiuri-wnia'ana, mak kpora-kdawra la' wo'or mou-wewan mota la' nohkeran di wawannu de A gah'u momuoga. Onu-ma'nu mak knema-ktai la'a wo'ora-kawru re honona nek de A gah'u re.

¹² La'pa A'uplar de A'g edonna ukot miy. Yoma la' nohmaran di wawannu wullu-we'elli de A gah'u re honona.

¹³ A'g edonna 'una hayori pipi ihini-rarni.

¹⁴ Mere la' hya' ed maka Awuahaka de, totpena mi'uli-miwedi A'u, onnila Agal olek la miy wia. Hade emeknekama nhioi-tniani maka miala mai A'u. Me Awuak pa mhioratreria hya' mak ha mikottaru la'a A'u Makden la Tutullu-Lolo'oni, pa hota mhi' nana re.

¹⁵ Hota la'pa mlier la kropanni-krieutnu de mpiol lia mai A'u. Hota A'g ed maka kanawar doinia miy lia'a wutwutu-kokuohu ralamni, nhi'nande mi'uli-miwedi A'u.”

¹⁶ Mere la'pa riy yatyata-halala de Uplerlawna Nakot la Niwra: “Hoi! Nihya' pede nhi'inde mikot nohora A deulu-tatru?! Yana mtiota inonmi emeknekama riy samomuou miy pa mpiahaur nohor la'a hya' mak A'uno'targa!

¹⁷ Yoma miy edonna mrieiniana lira pniolliohoru, me la' walia hya' maka A'ukota re, de mpiayotil momuoga re.

¹⁸ Nhi'inde mior riy mak kamna'a re mpiatamputu, ne sukmi mtiaur tikil nohora riy mak kalira-kaliai.

¹⁹ Miy sukmi matmiat lia mpiahaur nohora yatyatni-halalli. Ne mpiahi' tar pua mpiaklili-mpiakdior wia.

²⁰ Sukmi mipupu-miheria ammi hyalmi-inmi narmi ne mpiohora-mtiatra ama-hyali raralammi.

²¹ Hya' mak ha mhi'a re de Agherer niek wa, pede la' miy wniarormi de A'g emekwalia miy?! Mere la' dodo'ondi de Awuaghal miy. Ne A'ukot nohora hihi'imi-yapyapmi mak edon kaplola re.

²² Mtia'wa tlinmi pa mitlina! La'a riy mak khortaplinga A'u, Uplerlawanmi de, mitiak kalwiedweda inonmi, yanhi'pa Awueyata-wuaniawua miy. La' ler de de hota riy id mana edonna npolliohor A'u.

²³ La'pa riy mak ka'uli-kawedi A'u onnila hya' maka Agal olek la e'a, hade emekwalima hoihoi-tantiani maka enala mai A'u, riy' de ed maka khu'ru-khelam la mai A'u. Ne he' to' mak klernohora talan mak kaplola de hota A'umori-ulewn e'a.