Nhiara 5 - Alkitab bahasa Luang

Rsumbain pa rwaka yatiaka

¹ Hadi de Daud nhiar ya'ulli-yawedni maka ha rala la maka khi' o'tani la mak kwatunu-kwahniara. Rwatunu-rwahniara de rnairi floiti:

^2-3 Mutlin la a polpuo'lu-wakwa'ku pa Mtiulan la mai a'u, Matrome! Yoma la O' nanpena a'g e siumbain tiy O'a, Matromlawnu ne! O' mak kla' a Uplerlawnu me a Ra'yu.

⁴ Matroma, Makdenreri O'a! Mhueri tlinmu mai a lia la' yawyawra. La' yawyawar de a'g e godia a hi'mu-re'u tiy O'a, ne a'g e wuei reri o lira wniahlamu mai a'u, Matroma!

⁵ O' de Uplerlawna mak edonna kreiniana-ka'nana yatyatni-halalli. Riy yatyata-halala de hota edon ror O'a la' gen ida.

⁶ Mak po'ona ta'enniana rtutrier lia O' gaimu ralamni. O ralammu namehra la riy maka khi'a yata-hala.

⁷ O' ed maka kwakoha-kwanannia rimormiori miaka kden rer lia klili-kdiori putra-palka. Me maka kwunu-kwenna me mak ka'ohpa-kalahara re O' edon Mtielan nana-muaut nana re.

⁸ Mere la O sniayn lawanmu mak kodi liarni de pede hota atiy O rommu nayanni pa upal lia O genmu maka kmou-kwitan de pa ariu'u-tiowar de a'u'unni-umta'at O'a.

⁹ Matromlawnu ne! Makdenreri O'a! A arwa'lu harahu rehia. Mtiulla-msiayn nan a'u pa Mu'it rer lia a li'mu totpena aghi'a hya' maka O ralammu ha nala, Mtiutga O talanmu maka Omiwra aliola.

¹⁰ Yoma a' arwa'lu lirni-tunnu de edonna naplola. La' hare ralma-riorni de rpenpuen lia yata-hala mak kodi riy lia klieratni. La'pa raltier die ir lirni re emolmolla hoi-kietra mak kwer reria wawni mak kalgot neka lira-tunu yatyata-halala. Ne putra-palka nwailiola wawni re ralamni.

¹¹ Uplerlawnu ne! Muetlia ir halli me Mukmua re. Ndella pa ir nnia'ohmani yatyata-halala nhi'nande ir orgahani rler la kropanni-krieutnu. Mhuokar dodioinia re yoma do'oni-halli harahu rehia, yoma honona re rmalawna olek la O gaimu ralamni.

¹² Mere wuak de riy honona maka kruwun rer tiy O'a de honona ramuki-rahepru pa rwatunu-rwahniar pa nodi liarni. Mriuwun reria riy maka ralamni kden rer tiy O'a, totpena ralamni re rahepur nohora.

¹³ Yoma la he' maka kden rer lia plol wawannu de O' ed maka ktera-kdema. Omriuwun reria ir de Mniairia O sniayanmu.