Nhiara 49 - Alkitab bahasa Luang

Itwarehelia re'a-tniaru de persuma

¹ Hadi de Korah duratni-waitni nhiar ya'ulli-yawedni mak ha rala la mak khi' o'tani la mak kwatunu-kwahniara:

² Mitlina-mitaili, la'pa nwaga la tipru pa nodia la warta, riy honona makden la noheri woru-lyanti nayanni di,

³ la'pa kuku'uni-lalawanni, mak ktaru, mak kakleha.

⁴ Agiwra ukot nohora kirkira-ralma rior samomuou mak kwatiawua a ih'ru ralamni totpena miat niohora hya' ed mak kaplola.

⁵ Atia'wa reria a tli'nu la lira nnio'a-wawa niatu mak kodia kirkira-ralma rior samomuou dewade a'uhe'i hitara-fiola pa awuatutu rira la' lir de nnia'eratni, de emkadile:

⁶ A'g edonna umta'at et lia hadomdoma la' lerni la alier tar lia kropna-krieutu. A'g edonna diwra-dia'al la'a lerni la riy yatyata-halala re rherit targa a lia'a kmah'ani.

⁷ Ir ralamni rod rer lia re'eni-tniarnu, me po'oni la'a hya' mak ha rodi.

⁸ Mere re'eni-tniarnu re edon nodia unut hadoma. Yoma plol toto' memna la' riy id mana kupanni-kaini edon ntu'tu pa nala na namori-nalewna inonni. Ta'enniana ntuwu-nhai nian e orgahani totpena edonna nmati.

⁹ La'pa hota hya' mak ha nala, mere edonna ntu'tu ma'ta. Yoma riy nhiwa (roh), de welli werta.

¹⁰ Ta'enniana rpairia totpena yana rler la matmiati, ne rmormior pia nodi liarni.

¹¹ Mere hota nayamkek memna de la'a riy mak katu mana rmati emekwalima riy mak kpodku-kpadku me mak kaplin niohor ma'ta talan mak kaplollola. Ir honona rewre'wa pa rmati ne rto'or la re'eni-tniarnu pa riy dom to'a rlernana.

¹² La' ululu ma'ta de ha rtarga nohanna-taniarta mere edon nodi unut hadom la ira yoma hota rmeh'a neka rden nek la'a lumanni-kietarni pa nodi liarni.

¹³ La' rimormiori id mana hota edonna nre'a-ntar pua nodi liarni. Emekwalima nhiuri-wnia'ana nek de hota rmati.

¹⁴ Emkadel la'a riy maka kpo'ona-kraka pa nawniair to'ola inon wamueheni. La'pa la'awa tuw li'ir de emkade walia la riy mak nhi'inde kwahaur lawna.

¹⁵ Emeknekama duma re, de rakottarga de hota rmati. Matmiati (maut) hota ed maka khi'a heri-lay lia ira. La' yawyawar ma'ta de riy makden la plol wawannu ral ir la yawa. Inonni re de rgehpa-rta'la la' noh mati-rai miolu, ne oliet rehia la ir geni-tien maka kapripna-kafa'ana.

¹⁶ Mere hota Uplerlawna ed maka Ntuwu-nhai nian a'u. E' ed mak hota kolin doin a lia'a matmiati.

¹⁷ Yan mimta'ata la'pa mimkek nana riy ida ntaru, ne re'eni-tniarnu ra'ititar rer lia.

¹⁸ Yoma la'pa nmati de hota edonna nkapil nan etia hadomdoma. Tniarnu re de hota ta'enniana irodia la noha mati-rai miolu.

¹⁹ Yan to'a la'pa riy ida ralamni nahepru onnila mormiorni mak penpuen lia pripanni-fa'anni la' nohkeran di, ne riy nhi'inde ra'uli-rawedi e'a onnila re'eni-tniarnu maka ha nlernana oleka re,

²⁰ hota e' nek de nmati emekwalima upni-tgarni re honona pa rden la melli-kalamni pa nodi liarni.

²¹ La'pa rimormiori mak klernan re'a-tniaru pripanni-fa'anni mere rakleha kirkira-ralma rior samomuou, ir emolmolan neka me nhiuri-wnia'ana mak hota rmati.