Nhiara 48 - Alkitab bahasa Luang

Sion de Uplerlawna letni inhatte

¹ Hadi de Korah duratni-waitni nhiar ya'ulli-yawedni:

² Plola! Orgahi-Orha'a de ha Nmeh'a taru! Nden la ya'uli-yawedi ononni. Mmiai pia ta'uli-tawedi it Uplerlawanni la'a E letni mak kden la wo'or mak kmou-kwitna.

³ Uplerlawna letni Sion de samoga me nawniatat lia wo'ora hananni la walli ra'i. Uplerlawna Nla' Ray makodi plolli la haneknek wawannu, ne riy mak kdella nohkerna-rai miaran di, honona re ralamni rahepru onnila ra'ani-pallu mak kwatiawua E letni de.

⁴ Uplerlawna Nmeh'a neka Ndella let de ralamni pede orgahani Nwal lia kruwun geni la' riy honona makden la' let de.

⁵ Tamkek to'ola pena ray-ray re honona rawok pa rma riwra rka'ma temna.

⁶ Mere rkillia wo'or de takenia rpar nana. Dewade kniokan wa, noma rawlari die idma lierni.

⁷ Honona re rdiwra-rda'al nande ge'eni rutu, ne hikiknu ramilu-torni ra'ahg'o'ta. Honona re rpolpuolu-rwakwak nohora on mehra-apun mehra pa emeknekama pat mak kiwra kayori.

⁸ Honona re klololi-klalalia pa emolmolla puou-kapli lalawna mak kpah'a nana re, onnila anin lawna.

⁹ Tatlin oleka ha rwahaur nohora la'a ulul genni, mere dodo'ondi de tala it matni tamkek memna hya' ed maka Orgahi-Orha'a Makodi Plolli la Haneknek Wawannu de, Nhi' nana la' E letni. E' de it Uplerlawanni E'a ne hota orgahani Natiak rer nieka E letni pa nodi liarni.

¹⁰ La'a O rommu nayanni de amparor neka Matro'mu O tniulanmu-sniayanmu yoma Omsiayn rer niek ami.

¹¹ Lol meni-meni to' de O nanmu nawnioh'a-nawnianni ne ra'uli-rawedi la mai noheri woru-lyanti nayanni. Omniairia plola-mneha pa ma Mtiorna-mriautu.

¹² Lima-rora Sion nora Yehuda neniehu-tertera la yamuki-yahepru, yoma O' ed mak knairia rhi'ina leltiutu-relan mahmera pa ma Mhudi-mpuara riy (Mhudi-mpuara la plol wawna).

¹³ Mila' pa mpiakdioria Sion letni, me mriekna rom tutulu re honona.

¹⁴ Mimkek teka kruwun geni harahu me watu liari-au pidarni re yarurni-yalaini totpena orgahami mmieh'a mpiahaur nohora la' miy duratmi-waitmi:

¹⁵ “Orgahi-Orha'a Uplerlawna-Mempulwatnu yarurni-yalaini nayamkek memna la' E' letni de, ne E' ed mak kla' it Uplerlawanni. Hota Nalakr ita pa nodi liarni la'pa nhorwua.”