Nhiara 47 - Alkitab bahasa Luang

Uplerlawna Enmeh'a ed mak kodi plolli

¹ Hadi de Korah duratni-waitni nhiar ya'ulli-yawedni mak ha rala la mak khi' o'ta la mak kwatunu-kwahniara:

² La' rimormiori honona mak kden la lodna-hairi re, hononmi mriarni-mriarin pa mpiok limmi. Ne mi'uli-miwedia Uplerlawna de neniehu-tertermi.

³ Yoma Orgahi-Orha'a Makden la Tutullu-Lolo'oni de preheni-mkaini it edonna tpar nana. E' ed mak kmeh'a kodi plolli la'a noheri woru-lyanti nayanni.

⁴ Enal it pa ta'unut nan momuoga ray-ray honona ror wutga limni-rorni re mak kden ulga la noha Israel di.

⁵ Enala tan lia noha-rai mak ha Nwalir niana di la' it maka Ensaynia de. Yakop duratni-waitni ita tahepur nohor memna tan di.

⁶ Uplerlawna orgahani Nla' oleka genni-tienni la'a liwangenni-mtatangenni de rala tiwla-prai, he'i-hepru, me noknoka nora sraki yetni waran lola etnu-liolli pa ra rawliohora Itmatromlawanni.

⁷ Mpiatunu-mpiahniara nhiara ya'uli-yawedi la'a Uplerlawna. Mpiahniara nhiara ya'uli-yawedi la it Rayni.

⁸ Yoma Uplerlawna E' ed mak kla' Ray pia ktorna-kraut la'a noheri woru-lyanti nayan di. Ta'uli-tawedia de tala wniatunu-wniahniara mak it taloiya de yatlinni samoga.

⁹ Uplerlawna Naliwna la mtatangen miaka kmou-kwitna. Yoma Enkukmu-nto'ma noheri woru-lyanti nayanni.

¹⁰ Mak khi' o'ta-mat la lodna-hairi re honona rmai tiemna la Abrahama di'nani-lohorni mak kola tieru-kawur nehla la Uplerlawna. Yoma Uplerlawna ed mak ha rweta la Ray, la'a ray-ray honona matromlawanni. Yoma E' ed mak kden la'a hititni-lomlomarni mak wamueh geni.