Nhiara 46 - Alkitab bahasa Luang

Uplerlawna Ntulan mai ita

¹ Hadi de tunu-nhiar maka Korah duratni-waitni rala ra rwatutu-rwaye'a. Hota rala la mak khi' o'tani la mak kwatunu-kwahniara. Rwahniar de rtotnohora Amalot:

² Uplerlawna ed mak khi'a kruwun lawan mai ita. Enaruri-nalai nian ita. E' ed mak ktulla-ksayn rer it la'a kropna-krieutu ralamni.

³ La' hade pede hota it edon tamta'ata la'pa noha nruru-rai nwo'la pa nhi'nande wo'or tutulu ema rkowra-rwalia la yoir hletan lawna ralamni.

⁴ Tah'i nayo'ora nha'at pa nma nhaplia wo'ora pa nhi'nande wo'ora-kawru wolwo'la-wawainia ho'mana yan tamta'ata.

⁵ Hota la' ger wawuau lihir ed maka kahepur nana riy mak kden la Uplerlawna letni. Ger de nwawuau lia gen miaka Uplerlawna Nholi-nlet la. E' de Uplerlawna-Mempulwatnu Makdella Tutullu-Lolo'oni.

⁶ La' hande ed maka Uplerlawna Ha Nhollia, pede let de hota arwalli edonna rweyata-rwaniawua. Uplerlawna ed maka ktulan la let de la'pa lera matni npah'a la tipur matni.

⁷ La' lodna-hairi nor wutga luwnu-a'nani re kokokna-rariarin nohora polpuollu-wakwakni. Lodna-hairi re honona pala tuinia ne kwerwera-kwawah niohora rurni-laini la'pa preheni-mkaini. Uplerlawna Nhar lirni emeknekama kukru-gauru dewade nohkerna-rai miaran di nmadgera mkokoha.

⁸ Yoma Orgahi-Orha'a ed Makodi Plolli la Haneknek Wawannu. E' de Itmatromlawanni Makdenrer die, pede Nlin reri-nmat reri ita. E' de Yakopa Uplerlawanni inhatte pa Nruwun rer ita.

⁹ Mmiai pia tamkek memna hya' ed maka Orgahi-Orha'a Nkar niana! Tamkek la me! E Nhi'a-nyapia hihi'a-yapyap miak kamehi-kayona la nohkerna-rai miaran di wawannu!

¹⁰ De Orgahi-Orha'a Nhi'a rimormiori honona totpa yana ra'ar owa'an wa. Tamkek to'ola! Enmeh'a neka Nweyata-nwaniawua tera-ra'pa wehla-ta'wa me nawoka keliau-halwa'ana (perisai) pa Nnaklia la ai ralamni.

¹¹ Uplerlawna Niwra: “Hadewa la ya'ara! Totpa miatga! A' di de Uplerlawna A'u. A'ukleha nhiaparwutu. A'g ed makodi plolli la rimormiori nohkeran-rai miaran di pa hota ra'uli-rawedi rlilili-rmamuau A lia tutullu-lolo'oni.”

¹² Orgahi-Orha'a ed Makodi Plolli la Haneknek Wawannu. E' de Itmatromlawanni Makdenrer die, pede Nlin reri-nmat reri ita. E' de Yakopa Uplerlawanni inhatte pa Nruwun rer ita.