Nhiara 45 - Alkitab bahasa Luang

Nhiar maka ha rwahniara la ray mehlimni

¹ Hadi de tunu-nhiar maka Korah duratni-waitni rala ra rwatutu-rwaye'a. Hota rala la mak khi' o'tani la mak kwatunu-kwahniara totpa rwahniara de rtot nohora nhiara maka ha rweta la Bunga Bakung. Rwahniar de, de rakot nohora muanke' ida ralamni nal nana patke'eni:

² Agiwra wuahniar nhiar samomomuou id pa ray natlin nana. A ih'ru ralamni npenpuen niohora lira-tunu mak kla' nana rira ihranu ralamni. Ne la'pa awuahniara nhiar samomuounu de a' die emeknekama mak katu ktulsi (mak khi'a) poisi ida.

³ La' o' de muanu mak inonni namanmuanu me gaini samomuou rehia. Omultier de ltiermu nkerna la plollol wawannu. Yoma Uplerlawna Ntera-ndem rereri o'a.

⁴ Dodo'ondi de mua'ala wehla plalahwamu totpena mudehla reria. O' di de ray maktorna-krautu me prehemu-mkaimu de riy honona ramkek nana.

⁵ Emkade pede mlier pa mlia' a totpena o' ed maka ka'unut nan memna, yoma rurmu-laimu reh niana. Muala riy yatyata-halala re la' yawa yoma omtiorna-mriautu de nodi plola-mneha, me rhi'ina-rella (hya' mak kaplola) nden rer lia o ralammu,

⁶ Ra'pamu ihini natuinia arwalmu waholanni pa mhuelkiai-mhuakpera hairi-hairi re la ar ralma.

⁷ Uplerlawnu ne, lodanmu-hairmu nawniau kdededa pa nodi liarni. Omtiorna-mriautu de nodi plola-mneha.

⁸ Rhi'ina-rella (hya' mak kaplola) nden rer lia o ralammu, ne edonna mpuehwa tar lia yatyatni-halalli. La' hade pede Orgahi-Orha'a o Uplerlawanmu, Nwaliri o'a pa omdiella tutullu-lolo'oni totpa rira ratota-rawaw o'a, rahepru-rayak niohora o'a. Genmu-tienmu de nareh dioinia mutwualmu re.

⁹ La'a naniayarmu re rahuwu-ragania wu'ru me ortawi-autiawi maka huwnu mikmikri, ne riy rahe'ya hitara-fiola, tiwla-prai lia'a ray nhiol gen miaka liplipa-kamka'ma nohora leli (gading), nhi'nande o lelewru-tartiarnu.

¹⁰ La'a ray genni-tienni de pat hararar harahu erla, ne ray upni-a'nani hararara re rden wal lia. La'a liwangeni walli malganan de ray patke'eni ntutrier die liplipa-kamka'ma nohora mah molanni.

¹¹ Pa'tu nee! Mutlin reria a li'ru ri. Yana mhuoratreria marna-wuhurmu, nor wutga nohwalmu me inmu-elmu ammu-narmu.

¹² O samoumu nla' nana ray ralamni, o matrommu hade! Pa mhu'ru-mhuelam la nayanni.

¹³ Mak kden la Tirus rodia limtutnu-lakga'ani pa rma rhu'ru-rhelam la o'a. Mak kre'a-ktaru rahak talan pa ra'ala o ralammu.

¹⁴ Ray a'na patni mak kiwra kor ray rmehlima de nler la rialam de nlipa-nka'ma nohora komle'etni, de ral'arnana la maha liplipa-kamka'ma.

¹⁵ Naniayarni namrehi-namda'ar nohora horni pa rlidan nohora e' la' ray lo'mani ralamni. Rala hararar walli re pa rlidan nohora e'a.

¹⁶ Honona re riarni-riarin pa neniehu-tertera, yoma rodia la ray nhiol genni.

¹⁷ O'a raiya! Hota omliernana a'na rahu totpena rhernu-rwau pua ramtatan la upmu-tgarmu genni-tienni. Hota honona re rodi plolli la noheri woru-lyanti nayanni.

¹⁸ Agala nhiar di pa gala u'uli-uwe'du la tuwu pa la' tuwu, ne hota makden la lodna-hairi ra'uli-rawed rer o' pa nodi liarni.