Nhiara 44 - Alkitab bahasa Luang

Arwalli re ral ir la yawa, mere rha'ar neka aranni la Uplerlawna yoma hota E Ntulla-nsayni nan ira

¹ Tunu-nhiar maka Korah duratni-waitni rala ra rwatutu-rwaye'a. Tunu-nhiar di, rala la mak khi' o'tani la mak kwatunu-kwahniara:

² Uplerlawnu ne, a orgah miamni mmeh'a matlin olekwa la'a a up mamni-tgar mamni de e rakot nohora O hihi'mu-yapyapmu mak kamehi-kayon la'a upa-tgara lerni.

³ Omueh'a ed maka khokra-klaiya hairi-hairi mak kaplin niohor O'a, totpena O mutmu-rahamu rodi plolli la' leta-leta re. La' hairi-hairi re de Omtiota la yatyatni mere la'a O mutmu-rahamu de Muolin doinia re pa rpeha-rlawna.

⁴ Nohanna-taniarat mak ha rdella re de ir edonna rlernana onnila rala poka-hidara rala ra'ar nana, onde rnairia ruri wamueheni, mere onnila O plolmu-mnehemu rurmu-laimu ira'unut nana noha-rai miaka ha rholi-rlet de. Yoma Omuor ir talla me O ralammu e nod rer lia ira.

⁵ Matroma! A Ra'yu O'a, Uplerlawnu ne! O' ed mak kala unut della mai mutmu-rahamu.

⁶ Amaru'u-matowar targa a' arwali mamni onnila O plolmu-mnehemu. Onnila O rurmu-laimu pede ampeyata-mpaniawua re.

⁷ A'g edon gha'ar a mormio'ru la a ra'pu meranni onde a wehla-ta'wu plokarni yoma hare edonna rrei a lia gera tlinni-ai aratni.

⁸ Mere la O' nanpena ed mak kamori-kalewn am lia'a arwali mamni, me maru'u-matowra riy mak sukni tia'ala la' mai ami.

⁹ Pede ama'uli-mawedi reri O' Uplerlawna, pa nodi liarni, onnila O hihi'imu-yapyapmu mak kareh mieman de.

¹⁰ Mere dodo'ondi de, Omuolin doin am lia pa amla' yawa, yoma O' edonna Muor rewre'wa am pia tpehela ga'a la' ar ralma.

¹¹ Omuolin doini limmu me Mpue'er rormu la mai ami pede arwal mamni rhokra-rlai ami, ne reyahru a hononami hyonni-hyanni hewewatni-naniayarni.

¹² Omuolin doin am pia rwunu-rwenn am die emeknekama pipi-duma maka ha wniakloli-wniaklali, ne Mue'era-mhuakar targ' amlia'a noha-rai dom to'a.

¹³ Mu'olga am die, a weli mamni edonna la' walia hya' mak kodia untu la' O'a.

¹⁴ Mhi' am die Muodia niniha-malmial lia'a hairi-hairi makden la it walli-walli mak kapolu-kaliella ami.

¹⁵ Omual am pia riy rhi' am lia yatut niha-yawedi ltieri la'a hairi-hairi, pa nhi'nande honona re rdikdik o'tani ne rapolu-raliel ami.

¹⁶ La' lera-ler nekpa utlin neka wniohora-tniatra mak khi' a' pua riu' reri-tiowar reri.

¹⁷ Yoma a tlin mamni npen lia'a lir yamola-yama'a lawan rehia, mak kwatiaga riy mak khi' am lia arwalli.

¹⁸ Nhi'inde ami e mhoratreri O'a me ami' edonna mawlar dioinia O nnio'omu-niatmu mai ami, mere emkade ho'mana la' hare honona re amlernan momuog oleka wa,

¹⁹ A ralam mamni edonna nkoil nan kuku'ula O'a. La' O titmu mai am die am edonna mkenia la a to'or mamni.

²⁰ Mere Omhuoplial am lia ohpora-ahdiawra letgarni pa rlihir matmata-rhaw riarara ami. Mkeni am lia'a melli-kalamni.

²¹ Mere ami e mru'u-mtowar rer lia O omueh'a me ami' edonna mru'u-mtowar la hairi-hairi dom to'a uplerni-upmatni.

²² Uplerlawna hota Natga, yoma Enamkek eti-lahwa hya' mak kden la yawunamnu.

²³ Lelera-melmel de, amapalia matmiati-molmuolu la' O rerieimu Uplerlawnu nee! Rhi' am die emeknekama duma maka ha riwra rotna tiernu.

²⁴ Matroma! Mupriri-mukdeda! Mhueri tlinmu-mpuali matmu. Yana Mpuayotlia am pia nodi liarni.

²⁵ Nihya'pa Mude'u? Ne hya'a nrei pia Mhuort aplinga nniahora-nniala'a kropna-krieutu maka amlernana?

²⁶ Amtuin la tani wawannu ne koda-awu npupun nan ami.

²⁷ Uplerlawnu ne! Mupriri-mukded pa mua Mtiulan-msiayn Mumori-mulewn nan mai ami ee! Yoma O sniayn lawanmu mak kodi liarni!