Nhiara 42 - Alkitab bahasa Luang

Riy mak kwak meman pa nawali owa'an la nohoni me Uplerlawna roma kreini totpena nkola tieru-nawur nehla owa'an la E'a

¹ Tunu-nhiar maka Korah duratni-waitni rala ra rwatutu-rwaye'a. Tunu-nhiar di, rala la mak khi' o'tani la mak kwatunu-kwahniara:

² Hota emolmolan nekama rusa maka tiernu kerna pa nahaka ger pa nemnia, de emekwalima a' arnu mana niwra nahak reria O'a Uplerlawnu ne!

³ Agiwra uhak reria Uplerlawna O'a mak kodi plolli. Hota mowen nianpena a lia'a O rommu pa kuola tieru-gawur nehla la O'a?!

⁴ La' lelera-melmel de, a'g edon 'una-gemnu hadomdoma mere agko'a-gkakur to'owa. Lera-ler nekpa arwa'lu ratian a'u riwra a Matromlawnu etla hanmeni?

⁵ A ralmu nmawal doin la yoma aghoratnana la ulul geni, de la' ler maka alia'awa la'a Uplerlawna roma kreini de agod gai lia riy rahu pa am la mhi'a lerlalawna mak ha riwra ler lelpawu pniahnani-wa'du radeutu, de am riarni-riarin la loi liawna-talan lawna ne ampatunu-mpahniara.

⁶ Nihya'pa a ralmu nden rer lia lui-nuhru pa yanina-yamat onna? La' samomuounu de a arnu nahnia'ar to'ola'a a Uplerlawnu. Yoma hota E ed mak kamori-kalewn a'u pa a'u'uli-uwedi owa'ana E'a.

^7-8 La'a geni-tien maka ha rhopli-rnaklia it la di, de a ih'ru-ralmu emek ha wniakoha-wniananna. La' hade pede a ralmu nhoratnan a Uplerlawnu. Emeknekama Omhi' ger wawau liawna pa nwau dioin olek a wua. Ralam maduka-madaka ntai a' die emeknekama ger wawau mak kayetin pa kerun de yetanni emeknekama gerlawna Yordan mak kwatiaga wo'or Hermon nora wo'or Misar.

⁹ Itmatromlawanni Makdenrer die, Ntutga sniayanni la' lelera, nhi'nande awuatunu-wuahniar de la melmela, de asiumbain la Uplerlawna mak ktorreria a mormio'ru.

¹⁰ A'ukot la Uplerlawna mak kruwun reri a'u giwra: “Matroma! Nihya'pa Omhuoratdoin a lia?! Hya'a nrei pia alier nek la lului-nurnuhru onnila arwa'lu re rwatei-rwahapar reri a'u?!”

¹¹ A ih'ru-ralmu nmawal doin meman la pa emeknekama wehla ploklokra maka ha ra rteti-rlaiya pa ra rkokia la ihru-ralmu yoma arwa'lu re rapolu-raliell a'u de rakleha ya'unni-yamta'ata mai a'u. Ratiantian nek a'u riwra: “O Uplerlawanmu etla meni?”

¹² Nihya'pa a ralmu nden rer lia lui-nuhru pa yanina-yamat onna? La' samomuounu de a arnu nahnia'ar to'ola'a a Uplerlawnu. Yoma hota E ed mak kamori-kalewn a'u pa a'u'uli-uwedi owa'ana E'a.