Nhiara 41 - Alkitab bahasa Luang

Rsumbain pa rwaka nnieni-nhiena yana nkulit rer lia inonni

¹ Daud nhiar ya'ulli-yawedni maka ha rala la mak khi' o'tani la mak kwatunu-kwahniara:

² La'pa hameni ed mak ktulla-ksayni riy mak kakleha-kaplara onde mak kakleha ruri-lai, de hota nlernana unut lawna. Yoma Itmatromlawanni Makdenrer die, ed mak kolin doini e' la' ler maka nlernana kropan lawna-krieut lawna.

³ Hota Itmatromlawanni nanpena ed mak kroka-khep reria, me ktera-kdem reria de. Hota e nlernana hima-re'a limtutu-lak ga'a la Itmatromlawanni, totpena ndella nohananni-taniaratni, de ralamni nahepuepru. Ta'enniana arwalli re rala la yawa.

⁴ Hota Itmatromlawanni Namtatan reria pa la'pa nlernana nnieni-nhiena, de E' ed mak ktulan la totpena nler la tema prana.

⁵ Ukot la: “Matroma! Aghi' oleka do'a-hal la O'a, mere awuak pa yana Mkienia harella ralammu Matroma! Mual a' pua kalwied la nnieni-nhien di Matroma!”

⁶ La' arwa'lu re de, e rakot neka lir yata-tun yat la mai a'u. La' ira wakwakni de plet pa amuati, totpena rhoratdoin nek a lia.

⁷ La'a riy mak ktomra-knah'a a'u de la riy id mana ralamni edonna nsayn a' pua ta'enniana puesiay ira. Rmai die onnila suksukni ratlin nohora lier olek la yatyatni-halalli, na'nama rla rodi kiota-ral de'et la' meni-meni to'owa.

⁸ Mak sukni tia'al a'u honona re rapupu-raheria a'u. Rwahaur neka hota alier la yatyatni-halalli yatlorni-yatra'ani.

⁹ Rwahaur pa riwra: “Halerna nnieni nwerta. Hota plet pa nmati yoma edon namat olekwa, ne nomi-nweh' tio'ola genni.”

¹⁰ Yaho'ame mak kora a' pua ama'ana-memun wut lia' wrag' ida me am mro'a mak klunu-klun ida, de hade ho' de reriehenu, e' ed maka kmalawn a'u.

¹¹ Matroma! Msiayn a'u. Mual a' pua kalwieda! Totpena awuahla mak ralamni edon kal a'u re hihi'ini-yapyapni.

¹² Agat muemna de aghi' oleka O ralammu pa nahepru, yoma O' edon Muolin doin a arwa'lu pa ral a lia yawa.

¹³ Omtiulan la mai a'u yoma a ralmu e naplele'er la O'a, me Omual a' pua gor O' talan pa tden rewre'wa la geni-tiena id pa nodi liarni.

¹⁴ Haleluya ya'uli-yawedi nden rer lia Orgahi-Orha'a Uplerlawna-Mempulwatnu maka riy Israel rkola tieru-rawur nehla la de. Ta'uli-tawed reria la dodo'ondi pa nodi liarni pa la nhoru. Hare honona de hota emkade. Plola!