Nhiara 40 - Alkitab bahasa Luang

Ra'uli-rawedi Itmatromlawanni Makdenrer die, me rpolu-rwak la E'a

¹ Hadi de Daud nhiar ya'ulli-yawedni mak ha rala la mak khi' o'tani la mak kwatunu-kwahniara:

² Awei-niara Itmatromlawanni Makdenrer die, himni-re'eni mai a' die a'g edonna muahruru. Dewade E Nlin reri-nmat reri a wua, noma Nwahla a li'ru.

³ Nhed a lia'a hu'ul lawna ralamni makod a lia matmiati-molmuolu, de hu'ul mak katro'a-kakdielam la loka-da'la ralamni. Na'al a' pua Ntitnia a lia'a wo'ora ili watu id wawannu. Pede a'ula' de a'g edonna litri.

⁴ Ne Enwatutg a' pua awuahniara nhiar warwuaru ida. La'a nhiar de, nhiar ya'uli-yawedi la it Uplerlawanni. Hota riy rahu rtutrier wial pia ramkek reri me ratlina la emkameni la Uplerlawna Namori-nalewn a'u, de honona re ra'unni-ramta'at pa narieiniande honona re rpesiay wiali Itmatromlawanni.

⁵ La'pa riy mak kpesiaya Itmatromlawanni Makdenrer die, de ra'unut matmiat miemna. La'a hare honona re de, riy mak edonna khu'ru-khelam la'a uplera-upmati, me la' walia la' riy mak edonna kwaka tniulan la riy po'ona.

⁶ Matroma Makdenreri O'a! A Uplerlawnu O'a! La'a O hihi'imu-yapyapmu mai am die lawan rehia! Hadom edonna nheik nohora O'a! La'a hya' mak ha Mpuarora-mpualai re, nhi'nande riy rwer rer wiawni. Hihi'imu-yapyapmu harahu rehia pede la' hare honona re de ta'enniana rwahaur nan momuoga re.

⁷ O edonna Mpuak nana nhioi-tniani, patuini-paro'onni maka ha rhoi-rtani. Mere Omuala a tli'nu pa natlin oleka O lirmu. O' edonna Mpuaka nhioi-tniani maka ha rtunu-rharna la katri'ana wawannu onde nhioi-tniani korni maka ha rala rwauga do'oni-halli.

⁸ Noma A'ukota: “A'g inhatti Uplerlawnu ne! Amuai die totpena emeka rakot oleka la Puka mak kapniopan de ralamni mai a'u.

⁹ A su'ku la liernohora hya' mak kla' nana O ralammu yoma deulu-tatra re honona de rpenpuen lia a ralmu.”

¹⁰ La'pa O mutmu-rahamu e rawok tar lia, de a'ukot nohora kot kalwieda-paitiota mak kakot nohora Omumori-mulewn oleka am pia. Nhi'inde a'ukotkot reria hade Matroma. O' e muat niohora hare honona.

¹¹ Kot kalwieda-paitiot de, de a'g edonna uwunmua la a ralmu. Tniulla-sniayanmu makodi liarni de a'ukotkot reria la'a O mutmu-rahamu yawokni-yale'enu gaini ralamni. Plollola pa a'g edonna gherer niohora, mere ukota-ulde'eta ralam kalwiedmu nora tniulla-sniayanmu re.

¹² Matroma! Yana Mupre'et la ra'amu-palmu mai a'u! Hota ralam kalwiedmu nora tniulla-sniayanmu mak kodi liarni de ma mriuwun rer a'u, Matrome!

¹³ Matroma! A'g etla la'a kropna-krieutu letgara-mneneheni. Liawanni yan takot memna. A do'a-ha'lu emeknekama a' arwa'lu maka khokra-klai a'u, pa nhi'nande ta'enniana umkek nana talla maka hota aliolola. Do'a-ha'lu re de takeni trekan nana liawanni, yoma la'pa it trekan nana de narehi memna it moratnu liawanni pa nhi'nande amadwier oleka wa.

¹⁴ Matroma! Mumori-mulewn a'u! Pleta-plet pa muai pia Mtiulan mai a'u.

¹⁵ Muolin doinia totpena riy meni mak kiwra kwarora-kwalaiya a matmia'tu, hota ratowra re, ne komu-kamua pa rawlari. Rolin doinia la totpena la' riy mak krarin nohora a su'su re de, rleran doinia re pa rwaliahokra, totpena ramola-rama' targ' ho'a re!

¹⁶ Totpena hameni mak kaniha-kamali a'u re, gaini wahra onnila ral olek ir la yawa nhi'nande rmola-rma' meman wa.

¹⁷ Awuak de riy honona mak kola tieru-kawur nehla la O'a rahepur nande neniehu-tertera, onnila O hihi'imu-yapyapmu re. Awuak de mak ka'uli-kawed reri O'a, onnila Mumori-mulewn ira, hota riarin pa riwra: “Plola, plola, Itmatromlawanni nanni ed mak kden la tutullu-lolo'oni!”

¹⁸ A' di de ukleha-uplara. Mere Matro'mu mua Mumkek reri a'u! O' ed mak ktulla-ksayn a'u, ne O' ed mak kamori-kalewn' a'u. Mmuai! Yan mupre'eta Uplerlawnu ne!