Nhiara 4 - Alkitab bahasa Luang

Sniumbaini la' melmela

¹ Hadi de Daud nhiar ya'ulli-yawedni maka ha rala la mak khi' o'tani la mak kwatunu-kwahniara. Rwatunu-rwahniar de rnairia hitara-fiola:

² Uplerlawnu ne! Matmu reprepar la tulu-lyanti, me tlinmu mana Mhuer tiarga la a polpuo'lu! Yan Muolin limmu-mpue'er rormu la a'u. O' ed maka kodnian a'u. La'pa alier la polpuol inni-wakwak amni de O' ed mak ktulan mai a'u. Uplerlawnu ne! Mtiulla-msiayn nan a'u. La' dodo'ondi de Mhima-mrie'a a lia la a siumbainu di.

³ Oi! Rimormiormi re, ler wo'ir owa'an pa miy mipolu-miliella mpiohor weyata-mtiatra weyat a Uplerlawnu?! Hota la' ler wo'ir owa'an pa miy ralammi nod rer lia lira mak edonna kperkuna rena, me miy sukmi mikot nohor lira-tunu mak edonna kaplola re?!

⁴ Totpa miatgo! Itmatromlawanni Makdenrer die Naliri-natoh nan olek riy maka klernohor reria E ralma-riorni pa Nhi' E wamueheni. La'pa apuollia de, Nheri tlinni mai a'u.

⁵ La'pa miwenna, de yana yawenanmi nodia miy lia do'a-hala ralamni. Mpiarora-mpialai hare honona la ihrami ralammi de namtemtemna la'a dud genmi wawannu.

⁶ Miala hoihoi-tantiani mak kaplola la Itmatromlawanni de, me mpiesiay toto' meman la E'a.

⁷ Rirahu pala yatianni: “Hota he' ed maka ktera-kdem it o?” Ampakwak de Omtiutga ralam kalwiedmu mai ami Matromlawnu ne!

⁸ Omhi'a a ralmu yeher to'a me nahepru, nareh dioinia la riy hepueparnu, maka na'nama nreiki-nwo'ora nohora nhyi' penpuenu!

⁹ Hota unin a'u de uplin niohora ino'nu ha lolola yoma enekneka O' nanpena ed mak khi' a mormio'ru pa namtiertiernu me uplinu lier la kokokna-rariarni!