Nhiara 39 - Alkitab bahasa Luang

Mak kler la susni nwaldioin pa nakot wahyaria do'oni-halli la'a Itmatromlawanni

¹ Hadi de Daud nhiarni maka ha rala la Yedutun mak khi' o'tani la mak kwatunu-kwahniara totpa rwahniara:

² La' a wniaro'ru de agiwra utiak a nu'ru la wniahauru totpena yana lier la do'a-hala la'a nu'ru-tie'ru. La'pa riy yatyata erla a o'nu de, yan neka ukotkota hadoma.

³ A'g emeknekama riy mak hakamu. La' lir rahu-tun riahu ho'mana nohaiti nheri' aplin nieka wa. La' lir mak kaplola id ho'mana a'g edon ukota. Mere hade nariei piede yeher to'a pa a ralmu namehra.

⁴ A'g emeknekama ha yawrehla targ a'u. Nhi'inde awuaror nohor a sniu'su la a ralmu nhi'nande a ralam meh'ru yeher to'ama na'ititar rer lia pede a'utiana:

⁵ “Matroma! Mhi' a o'ta-kriahlu pa naphyar wia totpena a gat niohor meman de a mormio'ru di de edon naplahwa.”

⁶ Matroma! Omuetlia a mormio'ru di de kpurni ne! Yoma la Matro'mu yamkekni de a mormio'ru di emeknekama hadom mak pleta-plet pa nwatlena pa nmol wua. Plola la'a rimormiori ami, de emeknekama aran mamni mak amparan doinia la a iran mamni nora a waw mamni ralamni.

⁷ A mormior mamni rlar doin la de emeknekama memnu-tatar to'a. La'a hya'a mak am kokokna-rariarin nohora la mormior mamni di ralamni de hade edonna nodia hadoma. Mormior mamni di mhi'a-myapia re'a-tniaru, mere hota he' ed mak khewta-knairia?!

⁸ Pa hota la dodo'on di de hya' ed mak awuei-niar owa'ana? Matroma! Agha'ar neka a arnu la O'a.

⁹ Muolin doin a lia'a do'a-hala maka aghi'a-yapi ri. Yana Mual a' pua rimormiori mak kaplinu-kaplol nohora hya' ed mak kaplola rkakroma-rkamatr a'u.

¹⁰ Agherer wia, pa a'g edonna ukotkot hadom eti, yoma la O' nanpena ed maka Nhi' olek a pua alier la kropna-krieutu di.

¹¹ Matrome! Muolin doin a lia niukammu di, yoma tre ma'ta oke' pa a arnu nhorwua yoma la'a O liwliwarmu de!

¹² Nhi'inde Mukmua rira onnila do'oni-halli re. Ompueyata-mpuaniauga hya' ed mak rimormiori rapal niana emeknekama erieri ra'ana hadoma. Meman neka la plola! Rimormiori emeknekama a' aran mamni maka klergot lola a' irun mamni onde a waw mamni ralamni.

¹³ Matroma! Mutlin reria a sniumbainu, me Mutail rer lia a polpuo'lu-wakwa'ku la O'a. La'pa akiakur de yana Mhuerer niek wa. Yoma la'a lera ho'ke'eni di de adien wut lia O' la' nohkeran di pa emeknekama do'ona-dakna ida, pa emekwalima a u'pu-tga'ru re wali.

¹⁴ Matroma! Hota edon nalo'on wali ne amuat wia! Mpualdioinia pa Mhuria ralam kalwiedmu owa'an mai a'u totpa hota uhepru owa'ana, la' ler mak amuormior ma'ta di!