Nhiara 38 - Alkitab bahasa Luang

Rsumbain la susa ralamni

¹ Daud polpuollu-wakwakni la'a ler mak e nala hoihoi-tantiani la Uplerlawna totpena Nhoratreri e'a:

² Matroma Makdenreri O'a! Yana Mukmua a lia'a O yawenan lawanmu di ralamni. Yana Mliwra-mkaklia Mniahora-mniala'a a lia'a O hankeranmu di.

³ Ra'pamu ntuin doin la pa nahliawar la a ino'nu. U'eram reria O limmu weratni nutin reria a'u.

⁴ A siaki werwerta yoma la O yawenanmu. A ino'nu ramehra-ramau momuou yoma la a do'u-ha'lu.

⁵ A'utniepar la' a do'u-ha'lu maka kwalia la ger wawau liawna. Takeni ukwar nana do'u-ha'lu mak aghi' nana mai noh keran di wawannu.

⁶ A no'a-ra'ru ri de rpohra-rgehpa la ino'nu tetema, yoma la'a atlinnon kernu nora apodku-padku.

⁷ A to'oru nkoil reri-ntowar rer lia'a lelera-melmela, ne amualui-muaher nohora a mormio'ru di la'a nohkeran di wawannu.

⁸ Tema pniahna ntern' a'u, me ino'nu tetema emeknekama ha wnianalga.

⁹ Ino'nu nmatloi-nmatlawra, pa ukleh ruri-lai olekwa, ne kukunu-popoh a lia' a ge'nu.

¹⁰ Matroma! O' ed mak kat niohora a ralmu ha nwahaka, a polpuo'lu-wakwa'ku de edonna nayade'ela O gaimu ralamni.

¹¹ A ihru nteplu-nteplu, me a ru'ru-la'yu nhorwua, la' walia a ma'tu nek de yamkekni npon wa.

¹² A yahe'wia'lu honona la' id mana edonna nayamkeka, yoma la a nie'nu. La a wnialoi wutu re ho'mana rawlari doin a lia.

¹³ Riy mak kiwra kwen a'u re, de lol meni-meni to' pa rwerat tar wutwutga tniokla nora rapra'pa la mai a'u. Yoma hare ralma-riorni de rpenpuen lia yata-hala mak kodi a lia klieratni. Lera-ler nekpa rwahak talan mak edon kaplola pa rwunu-rwenn a'u.

¹⁴ Mere a' die, de tli'nu edon natlina, emeknekama riy maka hatilu, me uplinu ultieri emeknekama riy hakamu.

¹⁵ Plola a'g emeknekama riy mak edonna katlina, pa narieiniande a'g edonna wuahla me a'g edonna ukotkot hadoma.

¹⁶ Mere Matrom e! Agha'ar to' a arnu la O'a, ne Matrome, a Uplerlawnu O'a! Pen neka O' ed mak kwahla.

¹⁷ Yana Mumkek rer nieka a' arwa'lu re ramkek a' die kaniha-kamalia. Rpo'ona-rak nohora a lia mutwualli re, yoma alitri.

¹⁸ Trema-trema alitir pa atiai lia yawa, yoma a snia'ku di lawarehia.

¹⁹ A do'u-ha'lu honona re de ukot nohor momuog oleka, Matroma. A ih'ru ntepul wenna la'a a do'u-ha'lu re.

²⁰ Ne a' arwa'lu re de riy rahu. Hota irahankeran la mai a' die rakleha wniatikilgeni (alasan).

²¹ La' riy mak nhi'inde kala yatyatni kwahla a kalwiedwe'du de honona rhi' a lia ir arwalli, yoma la a mormio'ru di de nhi'inde a ghi'a kalwiedwedni la rimormior wia'lu.

²² Matromlawnu ne! Yana Muolin limmu mai a'u! Yana Mhuoitio'or mai a'u Uplerlawnu ne!

²³ La'pa Mutlin nan a li'ru de yana palo'onu. Yoma O' nanpena ed maka kamori-kalewn a'u.