Nhiara 37 - Alkitab bahasa Luang

Hya' ed maka riy yatyata hota rlernana

¹ Daud nhiarni: Yana herieri-walwialmi yoma mhioratnana riy yatyata rler la pripanni-fa'anni. Yana ralammi namehra la'a riy mak khi' do'a-kyap hiala onnila irlernan ha samomuounu.

² Yoma hota plinu-plinnianama rmol wua emeknekama wewan motmota la'a otna tniurnu mere la'pa ler pahna ntaiya dewade nkeran wa.

³ Mere mpiesiay reria Itmatromlawanni Makdenrer die, me mhioli-mliet de lola samomuounu. Mdiella nohanna-taniarat di maka Enala tiy miy de miatu mitlina-mitaili.

⁴ Mihepuepur rer lia Itmatromlawanni, ne hota E' nanpena ed mak kala hya' maka miy ralammi ha rwahaka.

⁵ Miala mormiormi-dardiarmi la Itmatromlawanni, mhia'ara inonmi la E'a, ne hota E' ed mak ktulan la miy.

⁶ De hota E' ed maka ktutga de miy mdiella plol wawannu totpena ralma plele'ermi nayamkek memna, emolmolan nekama ramkek nan memna lera mak kha'ata pa nwal lia lera nwawuau ro'onni.

⁷ Mpiei reria Itmatromlawanni, de miala ralma ploi-ple'era me ralma-riora mak kamtiertiernu. Me la'pa miwuwu-miweiya de, yana ralammi namehra la' pa riy yatyata re ra'itar la re'eni-tniarnu onnila rhi'a pudi-akla ohpa-lahara.

⁸ Yan miwenna me yan ralammi npahna, yoma hade ed mak kodi miy lia yatyatni-halalli.

⁹ Yan ralammu npahna, hota Itmatromlawanni Nala ir wniahlani, yoma hota he' ed mak khi'a yatyatni, de hade ed mak ha rdi'na-rlo'wa, mere la'pa hameni ed mak kha'ara aranni la'a Itmatromlawanni, de hade ed mak kodi plolli la'a nohanna-taniarat de.

¹⁰ La'a riy yatyata-halala, hota pleta-plet nekpa nmati-nmol wua pa yeheni mana rdi'na, lia'arni mana rlo'wa. (Riy rwahaka mana edonna rlernan oleka wa).

¹¹ La'pa riy mak katu khu'ru-khelam la'a rira nayanni de hade ed mak kodi plolli la'a nohanna-taniarta mak ha rwettarga la, ne e' ed mak yehi-yawra la noh de wullu-we'elli.

¹² Riy yatyata-halala ed mak kna'ohma yatyatni la'a riy kalwiedweda, ne la'pa namkek nan de gaini npetan wenna.

¹³ Mere Itmatromlawanni hota Nahe'i-namalia riy yatyat de, yoma Enatga de riy yatyat de mormiorni kpuria.

¹⁴ La' riy yatyata de nhei dioinia wehlani la! Ne ntokal ra'pani totpa nwunu-nwenna riy mak kakleha-kaplara. Riy samomuou re, de riy yatyat de nal wehlani totpa na ndawra akwera-akwahaya.

¹⁵ Mere hota riy yatyata re wehlani-ta'wani ratniwr owa'an la orgahi re apun lawanni, ne ra'pani re mana ema rtewar watwiatia.

¹⁶ La' samomuounu de itla' riy mak kden la plol wawannu, la' emkameni ho'mana itakleha-taplara. Yana itla' riy mak kyata-khala mak kre'a-ktaru.

¹⁷ Yoma riy yatyata re plolli-mneheni la'pa tnioranni-riautnu de Itmatromlawanni Nte'la la pa Ndorin watia la yawa. Mere Nhilpai-nmanatga riy mak kden la plol wawannu honona.

¹⁸ Itmatromlawanni Natu Natiak reria riy mak katu klernohor reria E'a. Pa hota rden rer niek la nohanna-taniarta maka E Nalla ir pa nodi liarni.

¹⁹ Rakleha-raplara ho'mana Itmatromlawanni Nala hya' mak ha rakleha. La'pa rler la rehka-lara hota ir edonna rlernana hade susni.

²⁰ Mere la'pa riy yatyata re de hota rler la yatyatni-halalli yatlorni-yatra'ani. Maka nhi'inde khi' arwal lia'a Itmatromlawanni de honona rmol tietema pa emeknekama bunga mak kden la rai mtatanni, me emeknekama ai miokla mak anin nten pia nmol mueman wa.

²¹ Hota riy yatyata re ra'otna-ra'ar de edonna rherun nan ir otanni. Mere la'pa riy samomuou de nhiolli-lietni de rara'a-rapalu rira de ralamni raplele'era.

²² La'a riy mak Itmatromlawanni Nara'a-napalga de hota nodi plolli la'a tan die, mere la'a riy mak klernana niukum la' E'a de hota rhokar doinia la.

²³ Riy maka illu-wniehwani nla' nana Itmatromlawanni ralamni de, hota edon ntuini yoma Itmatromlawanni Nalakra riy mak katu khu'ru-khelma.

²⁴ La'pa ntuini ho'mana hota edonna namno'a werwerta, yoma Itmatromlawanni ed mak ka' reria e limni.

²⁵ La' a mormio'ru tetem di de a'g edon umkek ma'ta Itmatromlawanni ntot pa naplin niohor riy samomuou de rler la kropna-krieutu, onde duratni-waitni rmeh'a rawakwaka.

²⁶ Riy samomuou de nhi'inde nara'a-napal reria rimormior wialli, ne upni-a'nani hota emeknekama re'a-tniar liawna la e'a.

²⁷ Mhioitio'or la mak kyata-khala ne mpiehwa-mliakat la samomuounu, totpena duratmu-waitmu nden' aplahwa la'a nohanna-taniarat maka Itmatromlawanni Nala tiy miy.

²⁸ Yoma Itmatromlawanni sukni la nhioli-liet samomuou nora ha plollola. La'pa riy mak kdenrer lia E'a de hota edonna Nolin limni la. E' ed mak kruwun reria ir pa nodi liarni pa la ntut lia honi. Mere la'pa riy yatyata duratni-waitni nora di'nani-lohorni de hota matmiati-molmuolga.

²⁹ Mere la'pa riy mak kden rer lia plola wawannu de hota gahani tan die. Ne gahani tan die pa nodi liarni pa la ntut lia honi.

³⁰ Riy mak kden la plola wawannu yaltierni de nwatiawu kirkira-ralma rior samomuou, ne naltier die naplele'era.

³¹ E Uplerlawanni riorni-liaini nden rer lia e ihranu ralamni ne edonna nawlar dioinia hade la'a e mormiorni.

³² Riy yatyata re sukni rwuwua riy samomuou pa riwra rwenna lola klieratni.

³³ Mere hota Itmatromlawanni Makdenrer die, edonna Nollia re pa irtuin la'a riy yatyata re limni ralamni, onde rlernana niukmu la'a ler maka ha rhudia la watghudi lokarni.

³⁴ Mhia'ara aranmi la Itmatromlawanni me mliernohora la E lirni-tunnu totpena E' ed mak krana o' pa muodi plolli la'a tan die. Me hota mumkek memna rahorga riy yatyata re honona.

³⁵ Aghoratrer mia'ta riy yatyata mak kpo'ona-kraka ida, nhi'inde npo'on de plolli nek la sukni wa, de emeknekama ora-au sapon lawna ida mak kpoti-kadwu me onni-ga'arni de naruri-nalai.

³⁶ Mere la'pa alieret owa'an e' genni de ha nmolg' oleka wa. Awuahakhak e'a mere rho'ordoin olek e'ewa.

³⁷ Mere tamkek to'ola riy samomuou mak ralma plele'era re. Yoma riy maka nhi'inde kmori-kdar lia'a ralma mtiertiernu de hota rlernana mormiorni la'a tuw li'iru-a'na ga'a.

³⁸ Mere riy mak khi' do'a-hala re rler la yatyatni-halalli yatlorni-yatra'ani me duratni-waitni ho'mana rkuhi-rho'or doini.

³⁹ Mere Itmatromlawanni Makdenrer die, Namori-nalewna riy mak kden la plol wawannu me la'pa rler la kropna-krieutu de E Nmai pia Nhi' nohora re.

⁴⁰ E' ed mak ktulan la ir pa Namori-nalewna la'a gera tlinni-ai aratni. Me Nahal doinia la'a riy yatyata ha ndella, yoma Enatiak reria he' ed mak kahniu'ru la E'a.