Nhiara 36 - Alkitab bahasa Luang

Rimormiori yatni-halli nora Uplerlawna kalwiedni

¹ Hadi de Daud wniatunnu-wniahniarni maka ha rala la mak khi' o'tani la mak kwatunu-kwahniara. Daud di mak khima-kre'a Itmatromlawanni:

² Do'a-hala nkar lia'a riy yatyata ihranu ralamni, ne rakleha ya'unni-yamta'ata la Uplerlawna.

³ Rwarora de ir inonni lawn' oleka la hare honona, la' hade pede edonna rhoratnana inonni, ne edonna rna'eritnana ir do'oni-halli totpa rhopliala.

⁴ La'a lirni-tunnu re yata-hala mamaini, ne wniarorni re pudi-akla wotwotra-hawautu nden reri. Rakleh oleka kirkira-ralma rior samomuou pede hya' ed mak kaplola re edon rhi' nan owa'an wa.

⁵ La'a yanin genni de rwaror mamainia kdiori-kdieha ohpa-lahara. Nhiolli-lietni illu-wniehwani de edonna rlernan etia samomuounu oke'a. Yata-hala de edonna rwayotlia.

⁶ Matroma, O sniayanmu mak kodi liarni de, nkokar la lyanti, me kalwiedmu maka Omtiut rer nieka de, nwahipin la darta letgarni.

⁷ Ne O nhiol kalwiedmu de tullu emeknekama wo'or tutulu, me Omtioran reria plola-mneha de emeknekama hletna-yoiri kdieldelma. Rimormiori makdella noheri woru-lyanti nayanni di nor wutga nhiuri-wnia'ana, mak kawrika-kawriai, kawlola-kawniaiti, mak kpora-kdawra la'pa i'na-ya'ana honona, O' ed mak kpiara-klakoya, me Mhuri-mpua'ana.

⁸ Matrome! Uplerlawnu ne! O sniayanmu welli edonna rpar nana! Rimormiori e rakruwun targa la O'a emolmolan nekama hiwi tei mak kreka-krek a'nani la liwarni nayanni.

⁹ Honona re de rlernana ra'amu-palmu mak ta'enniana nhor lia'a O rommu nayanni, me remun la ger maka kwawuau reri-kopopil reri.

¹⁰ O' de, de ger mormiori-lah'u mormiori. La'a O lelermu de am mamkek nana lelerni.

¹¹ Ampak de Omtiulla-msiayn reria riy mak katg' O'a, me O kalwiedmu de Muala la'a he' maka ralamni kaplele'er la O'a.

¹² Yana Muolli a' pua mak kpo'ona-kraka rper temna a'u pa rwatei-rwahapra a'u, onde riy yatyata rhokra-rlai a'u.

¹³ Mimkek teka! La'a riy maka kwehwa-klakat la yata-hala re de rlitir pa rtuwnu hgotni-rhokal du'urnu, raniewat pa ta'enniana raprir wia.