Nhiara 33 - Alkitab bahasa Luang

Nhiar ya'uli-yawedi la Itmatromlawanni Makdenrer die!

¹ Mak kden la plol wawannu, mpianehu-mpiater nohora la'a hya' maka Imatromlawanni ha Nhi'a la miy. Hota plola pa riy mak kholi-klet rer lia plollolli de ra'uli-rawedia Itmatromlawanni.

² Miala hitara-fiola pa ma mihepur nohora Itmatromlawanni de mpiatunu-mpiahniar nohora.

³ Mpiol nhiar warwuaru, nor wutga mtieta tiwla-prai de mtieta samomuoga, me mriarin de riarn ida.

⁴ Yoma Itmatromlawanni lirni-tunnu la'pa tulanni-kniarni honona raplollol momuou pede ha rpesiaya.

⁵ Itmatromlawanni kalwiedni nayamkek memna la nohkerna-rai miaran di. E sukni la hihi'a-yapyap miak kaplele'era. Yoma hihi'a-yapyap miak kdella plola wawannu re rhi' nan E ralamni pa Nahepur reri.

⁶ Orgahi-Orha'a Nhar lirni dewade lyanti nor wutga wolla-wtiona rhari momuou. Hare honona rwatiaw mueman la E lira nhiopanni.

⁷ Gera-tah'i honona Nawok tar lia la geni ida. Hletna yoiri de, E' ed mak ktahan targa la hu'ula yawok gen liawna ida.

⁸ Pede makden la' noh di wawannu hononmi, mi'unni-mimta'ata Itmatromlawanni! Mak kholi-klet la noh di wawannu, de miatu mhiu'ru-mhielam la E'a!

⁹ Yoma hare honona la'a nohkeran di de Orgahi-Orha'a Nal nek lirni pa na Na'ohi-na'ara re. Orgahi-Orha'a Nhar lirni dewade hare honona rden olek la wa.

¹⁰ Itmatromlawanni Nwayotlia hairi-hairi re lirni maka ha ret' olek la wa. E' ed mak klaran pa yana rhi'a la'a hya' maka ha rwaror nana.

¹¹ Mere la'pa hya' maka Itmatromlawanni ha Nwaror nana de hade ed maka ha rnairia pa nodi liarni. La'a hya' maka ha Nrora-nlai tiarga de, hade ed mak kawniau pua rnairia la' tuwu-tuwu.

¹² La'a lodna-hairi meni ed mak ka'aw niana Itmatromlawanni Makdenrer die, emeka Uplerlawanni de hota rlernana unut lawna! Maka Ha Nwalir niana pa rla' E mutnu-rahanu de, de hota ralamni re rahepru!

¹³ Enden nek la Ilyamou-Watyatoha pa Natotla la yawa, de Nlin nana-nmat nana rimormiori honona.

¹⁴ Nden nek la genni pa Nlina-nmata riy honona mak khol lia'a nohkerna-rai miaran di uhunu-ewatni ewatni-lahwani.

¹⁵ E' ed mak khi'a-kyapia riy ihranu ralamni, me Nat niohora ita nhiolli-lietni.

¹⁶ Ray edon na'untu yoma mak kodi keki-rautu harahu, me mak kodi keki-rautu mak ka'ara edonna rlewan la ar ralma yoma la'a raruri-ralai.

¹⁷ Yana rha'ar aranni la kuda, yoma kuda rurni-laini re de hota edon nodia mormiori-lewlewna.

¹⁸ Mere Itmatromlawanni Natiak reria riy mak ra'unni-ramta'at E'a pa rha'ara aranni la E'a mak ksayn reri it pa nodi liarni.

¹⁹ E' ed mak kalewna ir la'a matmiati ralamni, me Namor reria ir la' ler mak rler la rehka-lara ralamni.

²⁰ Pede it tsa'ar it aranni la Itmatromlawanni Makdenrer die. E' ed mak kodnian ita, me E' ed mak ktulan mai ita.

²¹ It tamuki-tahepru onnila hihi'ini-yapyapni. Itpesiay E'a yoma nanni nmou-nwitna.

²² Ampakwak de O' ed mak ktulla-ksayn reria ami, Matroma! Yoma ami e mha'ar to'a a' aran mamni la O'a.