Nhiara 32 - Alkitab bahasa Luang

Rahepuepur nohora yoma Itmatromlawanni Makdenrer die, Namou-nawitn oleka do'oni-halli

¹ Daud nhiarni mak ha rala ra rwatutu-rwaye'a: Unut lawna la riy maka Itmatromlawanni Nhap dioinia do'oni-halli pa Nhoratdoin oleka!

² Unut lawna la'a riy maka Itmatromlawanni edonna Natian la'a-natian mai do'oni-halli wa me maka wniarora putputra-palpalk id ho'mana edon ndel oleka la ihranu ralamni.

³ La' ler maka a'g edonna ukot nohor ma'ta a do'u-ha'lu la Itmatromlawanni de yeher to'a pa a ino'nu nakleha ruri-lai wia yoma la' lera-ler nekpa polpuolu-wakwak a'u.

⁴ Yoma la' lelera-melmel de O' ed mak kterna a lia yawa Matroma. A ru'ru-la'yu de emeknekama ler pahna nhita akerna oleka wa.

⁵ Dewade a'ukot momuoga a do'a-ha'lu, yoma ageti' olek la de hota id mana a'g edonna riehera la O'a. Dewade O' ed mak kolin doinia a lia'a do'a-hala re.

⁶ La' hade pede miy hononmi mak klernohora Itmatromlawanni, de hota mpiolu-mpiak la E'a la' ler maka mlier la kropna-krieutu ralamni. La' ler de de emeknekama mlier la kowlora-pah'a meti, mere Itmatromlawanni hota Nrei miy la gera tlinni-ai aratni.

⁷ Matroma, O' ed mak khi' kruwun la mai a'u. Pena Omuollia a lia'a kropna-krieutu ralamni. Pede aniehelia heyanna, yoma Omumori-mulewn a'u.

⁸ Itmatromlawanni Niwra: “Hota A'g ed mak ktutga loi-talla mak ha miwra mliola. Hota A'g ed mak kodia o limmu, me Uwewla o' pa mula' lola talan de.

⁹ Yan emolmolan nekama kud mak kakleha wniarora-wnialai pa rkenia tali la nurnu totpena nlernohora.”

¹⁰ La'a riy mak khi' do'a-kyap hiala de hota rler la kropanni-krieutnu nniahora-nniala'a polpuol inni-wakwak amni. Mere la'pa he' ed mak kha'ara aranni la'a Itmatromlawanni Makdenrer die, de hota Itmatromlawanni Nsaynia pa Nruwun reria.

¹¹ Miy makden la plol wawannu de mihepur nohora Itmatromlawanni Makdenrer die. Mriarin la! Mniehu-mtier nohora riarinmi!