Nhiara 31 - Alkitab bahasa Luang

Rha'ara arna la'a Itmatromlawanni Makdenrer die

¹ Hadi de Daud ya'ulli-yawedni la wniatunnu-wniahniarni maka ha rala la mak khi' o'tani la mak kwatunu-kwahniara:

² Matroma! La' O' nampena a'ukruwun rer a lia O nayanmu. Yan Muolin limmu mai a' pua rhi' amola-ama' a'u onnila ral olek a lia yawa. Mulewn a'u Matroma yoma hihi'imu-yapyapmu rden la plol wawannu.

³ Mhueri tlinmu mai a'u Matroma, ne Muhal doin a lia kropna-krieutu di wawannu. Omhi' a' die emekwalima ili-watu maka uro'wa targa a ino'nu totpena alier la mormiori-lewlewna.

⁴ Hota plola Matroma! O' de emolmolan nekama ili watu maka a'g e uro'wa targ olek a lia. Yan Muolin limmu mai a'u, totpena O nanmu de ha ra'uli-rawed reria.

⁵ Muewar doin a lia'a tniokal mak ha rweran targa la mai a'u. Yoma la O' nanpena ed mak kruwun rer a'u.

⁶ Agala ino'nu pa Mkienia la limmu rora ralamni! Mulewn a'u Matrome! Yoma O' de Uplerlawna maka puesiay reria, onnila Omhi'nan hya' maka Muno'targ oleka re wa.

⁷ O sukmu tia'al la'a riy mak kola tieru-kawur nehla la'a uplera-upmati mak edon kodi untu. Mere la a' di de, a pesia'yu nden rer lia O'a Matroma.

⁸ Hota la O tniulanmu-sniayanmu makodi liarin de pede adien rer lia'a kaniha-kamali. La'a kropna-krieutu mak a liernana re de, O' edonna mumat yat la re. Mere Mhueri tlinmu la a polpuo'lu pa Mtiulan nan mai a'u.

⁹ O' edon Mumkek rer niek pa a' arwa'lu re riwra rhopan pa arian li'mu la ira. Mere Omuod a' pua la riy id la arwa'lu re mana edonna nheik la mai a'u.

¹⁰ Matroma! Mtiulla-msiayn a'u! Yoma la'pa a lier tar lia susa ralamni de a ma'tu rpetna-rmour tar lia knio'a-kniakru. A'ukleh oleka ruri-lai la' a' ino'nu tetema.

¹¹ A mormio'ru di hota edon naplahwa yoma adien to'ola'a ihru teplu-ralam mawla ralamni. A ru'ru-la'yu nhorwua yoma la' a ya'tu-ha'lu rerieini.

¹² A' arwa'lu re rmakriarni a'u. A rom heiwia'lu nekane, la'pa ramkek nana ramuki-rama'ala a' die ramta'ata. Ne maka nhi'inde kor a' pua kala' wutu re, rwer rer wiawni. Riy mak agora mpatrom la talla ralamni de rawlari pia rahal doin a lia.

¹³ Rhoratdoin a lia de emeknekama amuati olekwa. Ne hota a'g emeknekama yohya' mak ha rasral oleka wa.

¹⁴ A'g e umta'at wenn a'u yoma la' meni-meni to' pa utlin de idma napup lia id pa riwra rtutria (rhi' yatyatni mai) a'u. De arwa'lu re de e rtepartar lia nnia'ohma pa rtutri a'u totpena ratuinia a arnu.

¹⁵ Mere a'g e uhnia'ar to'ola O'a Matroma. Yoma agatga de a Uplerlawnu O'a, Matroma.

¹⁶ A mormio'ru etla O limmu ralamni, Matrome! Mtiulan pa Mulewan a lia arwa'lu, de la' riy mak khokra a'u re!

¹⁷ Wuakwak de Mhuria ralam kalwiedmu mai a'u, mak khima-kre' O'a. Hota Mumori-mulewn a'u Matroma, onnila sniayanmu mak kodi liarni!

¹⁸ Matroma, yana Muolin doin a' pua aliernana molmola-mama'a. Yoma a'g e puol rer lia O'a. Muolin doinia pa riy rhi' amola-ama'a' a arwa'lu re nek wa. Ndella pa rerun la noh mati-rai miolu, la' gen miaka ta'enniana raltier owa'ana.

¹⁹ Mhuodal targa riy po'ona mak nurnu-tiernu ka'ohpa-kalahara. Nhi'inde rapupu-raheria riy mak edonna khi' do'a-kyap hiala, me ralernu-raha'a ir nan kalwiedni.

²⁰ Matrome! La O' nanpena Murehelia kalwieda-paitiota la mak ha Mhi'targa la maka ka'unni-kamta'ata khu'ru-khelam la O'a. La he'a-he' to' pa e rat niohora kalwiedmu-paitiotmu mak ha Muala, la riy mak kakruwun reria la O nayanmu.

²¹ Riy yatyata-halala rwaghala riy mak ka'unni-kamta'at O'a re me rna'ohma-rnakati yatyatni la. Mere O' ed mak kade'a-kamoin targ riy maka ka'unni-kamta'ata O'a la O' onmu totpena riy yatyata re ta'enniana rhi' hadoma la ira.

²² Ya'uli-yawedi nden rer lia O'a Matroma! Yoma O tniulanmu-sniayanmu mak kodi liarin de, a'umkek nan memna la lerni la' arwali re rle'lu rer lia a le'tu.

²³ La' ler de a'umta'at nande agatniekama O' e Mhuoplial olek a lia O matmu ralamni. Mere Omutlin nana a polpuo'lu-wakwa'ku la O'a.

²⁴ La he' mak kla' oleka la Itmatromlawanni Makdenrer die, limni ralamni de, ralammi re rod rer nieka la' Itmatromlawanni! Yoma E' ed mak kruwun reria la he' maka kden rer lia E'a. Mere la'pa la'a riy mak kpo'ona-kraka de hota E' ed mak kukmua re rlernohor meman la ir nhiolli-lietni!

²⁵ Miy hononmi mak kha'ar aranni la Itmatromlawanni Makdenrer die, mial ralammi re pa ratehra momuou lia E'a.